ភ្នំពេញ ៖ គិតត្រឹមម៉ោងជាង១១ព្រឹក ថ្ងៃទី១១ មករា ២០១៩នេះ អគ្គិភ័យដែលឆេះដេប៉ូប្រេងមួយកន្លែង នៅម្ដុំផ្សារបឹងសាឡាងថ្មី ភូមិបឹងសាឡាង សង្កាត់ប្ញស្សីកែវ ខណ្ឌប្ញស្សីកែវ បានរលត់ទាំងស្រុងហើយ បន្ទាប់ពីកម្លាំងសមត្ថកិច្ចជួយអន្ដរាគមន៍ ដោយប្រើប្រាស់រថយន្ដពន្លត់អគ្គិភ័យបាញ់ទឹក និងទឹកសាប៊ូ អស់ចំនួន១០គ្រឿង ។
បើតាមមន្ត្រីសមត្ថកិច្ចដែលចូលរួមអន្ដរាគមន៍ បានប្រាប់អោយដឹងជាបឋមថា ករណីគ្រោះថ្នាក់អគ្គិភ័យនេះ បណ្ដាលមកពីរថយន្ដដឹងសាំង ដែលមានចំណុះ ៦,០០០លីត្រ បានចូលមកដើម្បីបញ្ចូលប្រេងសាំងក្នុងស្ថានីយ៍ ដោយធ្វេសប្រហែស មិនបានពន្លត់ម៉ាស៊ីន ទើបឆ្លងជាចរន្ដអគ្គិសនី បង្កចេញជាអណ្ដាតភ្លើង ឆាបឆេះយ៉ាងសន្ធោសន្ធៅ តែម្ដង ។
សូមជម្រាបថា សមត្ថកិច្ចប្រើប្រាស់រថយន្ដពន្លត់អគ្គិភ័យចំនួន២១គ្រឿង ដើម្បីអន្ដរាគមន៍ ក្នុងនោះ រថយន្ដពន្លត់អគ្គិភ័យមកពីក្រុងជ្រោយចង្វារ៦គ្រឿង (បាញ់ទឹកសាប៊ូ២គ្រឿង), ក្រុងកោះពេជ្រ ២គ្រឿង និងស្នងការដ្ឋាននគរបាលរាជធានីភ្នំពេញ ១៣គ្រឿង ប៉ុន្ដែប្រើប្រាស់អស់ត្រឹមតែ១០គ្រឿងប៉ុណ្ណោះ ។ យ៉ាងណាអគ្គិភ័យនេះ មិនបណ្ដាលអោយមានគ្រោះថ្នាក់ដល់ប្រជាពលរដ្ឋណាម្នាក់ នោះទេ ៕