ភ្នំពេញ ៖ បុរសម្នាក់ត្រូវបានសមត្ថកិច្ចឃាត់ខ្លួនដោយជាមួយម្ចាស់ផ្ទះ និងនាងៗ នៅក្នុងហាងម៉ាស្សា យីហោ បាតដៃសម្រួលសរសៃបែបបុរាណខ្មែរ ដែលជ្រកក្រោមហាងផាត់មុខ និងធ្វើសក់ឈ្មោះ ស្រីពៅ សាឡន ដែលមានលួចលាក់បង្កប់សេវាផ្លូវភេទ ។
ហាងម៉ាស្សាដែលបានលួចលាក់បង្កប់សេវាបម្រើផ្លូវភេទ រហូតដល់ចង់ដុះស្លែទៅហើយ ត្រូវបានសមត្ថកិច្ចជំនាញ នៃមន្ទីរប្រឆាំងការជួញដូរមនុស្ស និងអនិតិជនបាន សហការជាមួយសមត្ថកិច្ចមូលដ្ឋាន ឆ្មក់ចុះបង្ក្រាបដោយឃាត់ខ្លួនមនុស្សប្រុសស្រីចំនួន៨នាក់ និងវត្ថុតាងមួយចំនួនផងដែរ ។
ប្រតិបត្តិការនេះធ្វើឡើងកាលពីវេលាម៉ោង៧និង៤០នាទីយប់ ថ្ងៃទី០៨ ខែមករា ឆ្នាំ២០១៩ នៅចំណុចផ្ទះម៉ាស្សាយីហោ «បាតដៃសំរួលសរសៃបែបបុរាណខ្មែរ» តាមបណ្តោយផ្លូវលេខ១៣៨ ស្ថិតក្នុងសង្កាត់ផ្សារដេប៉ូ២ ខណ្ឌទួលគោក ។
ម្ចាស់ទីតាំងហាងម៉ាស្សាលួចបង្កប់សេវាផ្លូវភេទនេះ មានឈ្មោះសុខ រតនា ភេទប្រុស អាយុ២៧ឆ្នាំ និងប្រពន្ធឈ្មោះដួង ស្រីពៅ អាយុ២៦ឆ្នាំ ស្នាក់នៅកន្លែងកើតហេតុ រួមនិងនារីម៉ាស្សាចំនួន៥នាក់ទៀត ។
តាមប្រភពពីសមត្ថកិច្ចដែលចុះប្រតិបត្តិការដោយផ្ទាល់ បានបញ្ជាក់ប្រាប់ថា ក្នុងប្រតិបត្តិការនេះ មានការចូលរួមពីអនុប្រធាននាយក ដ្ឋានការជួញដូរមនុស្ស និងកម្លាំងនគរបាលមូលដ្ឋាន ។ ដោយឃាត់ខ្លួននារីជាជនរងគ្រោះចំនួន៥នាក់ ម្ចាស់ទីតាំងប្តីប្រពន្ធ២នាក់ រួមទាំងបុរសម្នាក់ជាភ្ញៀវផងដែរ ។
ក្រោយឃាត់ខ្លួន នារីជាជនរងគ្រោះត្រូវបាននាំយកទៅមន្ទីរប្រឆាំងការជួញដូរមនុស្សអប់រំ ដោយឡែកជនសង្ស័យពីរនាក់ប្តីប្រពន្ធ ត្រូវបានកសាងសំណុំរឿងបញ្ជូនទៅតុលាការចាត់កាបន្ត ។ ចំពោះទីតាំងត្រូវបានសមត្ថកិច្ចបិទទ្វារបណ្ណោះអាសន្ន៕