ភ្នំពេញ ៖ សម្រាកព្យាបាលនៅមន្ទីរពេទ្យកាល់ម៉ែត្រអស់រយៈពេល២១ថ្ងៃ ដោយសារតែស្ថានភាពជំងឺហាក់គ្មានការធូរស្រាល និងថ្លៃចំណាយអស់ជិត១០,០០០ម៉ឺនដុល្លារ តារាកំប្លែងវ័យចំណាស់នាយ សានម៉ៅ ឈ្មោះពិត លោក ធូ ចំរ៉ុង ត្រូវបានក្រុមគ្រួសារសម្រេចបញ្ជូនទៅសង្គ្រោះបន្ត នៅមន្ទីរពេទ្យរបស់ប្រទេសថៃ ។
បើតាមប្រធានសមាគមសិល្បករខ្មែរ អ្នកនាង ចន ច័ន្ទលក្ខណា បានរៀបរាប់ថា តារាកំប្លែងមានប្រជាប្រិយភាពនាយ សាន ម៉ៅ ដោយការព្យាបាលនៅមន្ទីរពេទ្យស្រុកខ្មែរហាក់មិនសូវទទួលបានផល និងកាន់តែមានការព្រួយបារម្ភចំពោះសុខភាពផងនោះ មុននេះនាយ ត្រូវបានក្រុមគ្រួសារបញ្ជូនទៅព្យាបាលបន្តនៅឯមន្ទីរពេទ្យមួយកន្លែង នាទឹកដីប្រទេសថៃ ។
អ្នកនាង ចន ច័ន្ទលក្ខិណា បានបញ្ជាក់ថា ពេលនេះ លោកពូ សាន ម៉ៅ កំពុងសម្រាកព្យាបាលនៅមន្ទីរពេទ្យមួយ ដែលស្ថិតនៅខេត្តស៊ីសាកេត ប្រទេសថៃ កំឡុងពេលលោកពូព្យាបាលនៅមន្ទីរពេទ្យក្នុងប្រទេសខ្មែរក្នុងបន្ទប់សង្គ្រោះបន្ទាន់រយៈពេល២១ថ្ងៃ គាត់ចំណាយអស់ជិត១០,០០០ម៉ឺនដុល្លារ។ គ្រួសាររបស់លោកពូបានយកផ្ទះ និងឡាន ទៅបញ្ចាំបានថវិកាចំនួន១៥.០០០ដុល្លារ ដើម្បីយកលោកពូទៅព្យាបាលនៅមន្ទីរពេទ្យក្នុងប្រទេសថៃ ។
តារាស្រីអ្នកនាង ចន ច័ន្ទលក្ខិណា បានបន្តទៀតថា ហើយមកដល់ពេលនេះ គឺគាត់បានចំណាយលើថ្លៃរថយន្តសង្គ្រោះពី ភ្នំពេញដល់ព្រំដែនខ្មែរថៃអស់៣,០០០ដុល្លារ ហើយថ្លៃរថយន្តសង្គ្រោះពីព្រំដែនខ្មែរថៃ ទៅខេត្តស៊ីសាកេត ប្រទេសថៃ គឺចំណាយអស់ជាង៧,០០០បាតនេះ គ្រាន់តែថ្លៃរថយន្តដឹកអ្នកជំងឺទេ ថ្លៃព្យាបាលគឺមិនទាន់ដឹងនៅឡើយទេ។ ពេលនេះ ស្ថានភាពរបស់លោកបានធូរបន្តិចហើយ។ ខ្ញុំសូមជូនពរឲ្យលោកពូឆាប់ជាពីជំងឺទាំងឡាយ ។
គួរបញ្ជាក់ផងដែរថា នាយ សាន ម៉ៅ មានអាការៈជំងឺបេះដូងចំហរ និងហើមសួត ហើយអាការៈជំងឺនេះ បានធ្វើទុក្ខខ្លាំងមួយរយៈពេលចុងក្រោយនេះ ៕
