ព្រឹ​ត្ត​ការណ៍​សំខាន់​ៗ​ក្នុង​ឆ្នាំ​២០១៨​នេះ ផ្នែក​វេជ្ជសាស្ត្រ អ្នក​វិទ្យាសាស្ត្រសម្រេច​បាន​ជោគជ័យ​លើសមិទ្ធិផលចំនួន​៨ ក្នុង​ការ​ស្រាវជ្រាវ បង្កើត​ថ្នាំ​ថ្មី​ៗ និងរបក​គំហើញ​​ថ្មីៗ ក៏​ដូច​ជា​បង្កើត​បាន​ម៉ាស៊ីន​ស្កែ​ន​ម៉ូលេគុល ជាដើម។ល។

ក្នុងចំណោមសមិទ្ធិផលដែល​សម្រេចបានទាំង​​៨ គេហទំព័រ​ KBN ​សូម​លើកយក​ចំណុច​មួ​យ មក​បង្ហាញ​ជូនប្រិយមិត្ត ពិសេសដល់​មនុស្ស​ធាត់​ដេក​ស្រមៃ​ចង់​ស្គម​វិញ ។ រឿង​នេះ​តែងតែ​ឮ​ ស្រី​ៗ​និយាយ​គ្នា​រាប់​មិន​អស់ ។ វិធី​សម្រក​រាង​អាច​ថា​មាន​ច្រើន រួម​បញ្ចូល​ទាំង​ការ​ធ្វើ​លំ​ហាត់ប្រាណ តម​អាហារ និង​ការ​ប្រើប្រាស់​ថ្នាំ​ជាដើម ​ប៉ុន្តែ​ការប្រើថ្នាំសម្រកនោះ​ធ្វើ​អោយ​ស្មុគស្មាញ​ទៅ​វិញ​ទេ ព្រោះ​ប្រើ​ថ្នាំ​​មិនដឹង​ប្រភព​ច្បាស់លាស់ ។

ប្រហែល​នេះ ជា​ដំណឹង​ល្អ​ចំពោះ​អ្នក​ធាត់ នឹង​ចូល​ចិត្ត​ញ៉ាំ​ច្រើន ។ អ្នក​វិទ្យាសាស្ត្រ​នៅ​សកល​វិទ្យាល័យ​តិច​សាស៍ បាន​រក​ឃើញ​ថា អ្នក​ចូល​ចិត្ត​ញ៉ាំ​ច្រើន​ហើយ​ធាត់ កោសិការ​ខ្លាញ់​របស់​ពួក​គេ មាន​ទំនោរ​មិនសូវ​ចាប់​យក​ខ្លាញ់​ដែក​ស្តុក​ទុក​នោះ​មក​ប្រើ ជា​ហេតុ​ធ្វើ​ឲ្យ​ខ្លាញ់​ចេះ​តែ​កើនឡើង បណ្ដាលអោយ​មនុស្ស​​ធាត់ឡើងៗ​ ​។

ក្នុង​ឆ្នាំ​២០១៨​នេះ ក្រុម​អ្នក​វិទ្យាសាស្ត្រ សម្រេចបាន ក្នុងការ​​បង្កើត​ថ្នាំ​មួយប្រភេទ​ ដើម្បី​ទៅ​ទប់​ជាតិ​ប្រូតេអ៊ីន​ម្យ៉ាង ដើម្បី​ឲ្យ​កោសិកា​ខ្លាញ់ ចាប់​យកជាតិ​ខ្លាញ់ ដែល​ស្តុក​ទុក​ចោល​នោះ យក​មក​ប្រើ​វិញ ។ ក្រុម​វេជ្ជសាស្ត្រ​ បាន​យក​ថ្នាំ​នោះ​ទៅ​សាកល្បង ដាក់​ក្នុង​ចំណី អោយ​សត្វ​កណ្តុរ​ធាត់​ៗ វា​ស៊ី ទទួល​បាន​លទ្ធផល​ជោគជ័យ ។ សត្វ​កណ្តុរ​ធាត់​ខ្លាំង វា​អាច​ស៊ី​ចំណី​បាន​តាម​ចិត្ត តែ​ពួក​វា​​មិន​ឡើង​ទម្ងន់​ឡើយ​ ។

ទោះជា​យ៉ាងនេះ​ក្តី គេនៅ​រង​ចាំ​ភ្លើង​ខៀវ ​ពី​ទីភ្នាក់ងារ​ម្ហូបអាហារ និង​ឱសថ ជា​មុន​សិន មុន​នឹង​យក​ថ្នាំ​ប្រភេទ​នេះ ទៅ​សាក​លើ​មនុស្ស ២​ឆ្នាំ​ទៀត​យ៉ាងតិច ៕

ប្រភពពី ៖ sciencemag.org