ភ្នំពេញ ៖ ករណីជះ និងគប់កំប៉ុងស្រាបៀរទៅលើតារាចម្រៀងស្រីកញ្ញា ទេព បូព្រឹក្ស នៅលើឆាកតន្ត្រីក្នុងហាង«សមុទ្រ» ត្រូវបានដោះស្រាយបញ្ចប់ហើយ ដោយភាគីជនបង្កឈ្មោះ ឆេង រស្មី បានចេញមុខសុំទោសជាសាធារណៈ និងព្រមសងជំងឺចិត្តទៅឲ្យ ទេព បូព្រឹក្ស ចំនួន១ម៉ឺនដុល្លារ ។
នៅក្នុងសន្និសីទសារព័ត៌មានមួយ ធ្វើនៅរសៀលថ្ងៃទី២៨ ធ្នូ ២០១៨ នេះ កញ្ញា ទេព បូព្រឹក្ស បានបញ្ជាក់យ៉ាងដូច្នេះថា ខាងកញ្ញា និងជនបង្ក បានព្រមព្រៀងដោះស្រាយគ្នាបញ្ចប់ហើយ ដោយជនបង្កព្រមសុំទោស និងសំណងរដ្ឋប្បវេណីខូចខាតកិត្តិយស ដែលពីមុនកញ្ញាទាមទារ១០ម៉ឺនដុល្លារ ឥឡូវកញ្ញាព្រមត្រឹមតែ១ម៉ឺនដុល្លារប៉ុណ្ណោះ ។ ហើយសម្រាប់សំណងជំងឺចិត្ត១ម៉ឺនដុល្លារនេះ កញ្ញានឹងបរិច្ចាគទៅកាន់មន្ទីរពេទ្យគន្ធបុប្ផាចំនួន៣,០០០ដុល្លារ ហើយនៅសល់៧,០០០ដុល្លារទៀត ត្រូវផ្តល់ជូនសមាគមអ្នកសិល្បៈសម្រាប់ចាត់ចែងបន្ត ។
ចំណែកឯ ជនបង្កឈ្មោះ ឆេង រស្មី ក៏បានទទួលស្គាល់កំហុសផងដែរ ដោយលើកហេតុផលថា មកពីខ្លួនស្រវឹង មិនអាចគ្រប់គ្រងស្មារតីបាន ហើយសន្យាថា នឹងមិនឲ្យកើតមានជាលើកទី២ទេ ។
សូមរម្លឹកថា តារាចម្រៀងស្រីល្បីឈ្មោះប្រចាំផលិតកម្មរស្មីហង្សមាស កញ្ញាទេព បូព្រឹក្ស ដែលត្រូវបានបុរសម្នាក់ជះ និងគប់កំប៉ុងស្រាបៀរទៅលើរូបនាង ខណៈនាងកំពុងតែច្រៀងនៅលើឆាកតន្ត្រី ក្នុងភោជនីយដ្ឋានយីហោ “សមុទ្រ” មានទីតាំងស្ថិតនៅជិតមន្ទីរពេទ្យកុមារជាតិ ក្នុងសង្កាត់ទឹកល្អក់ទី១ ខណ្ឌទួលគោក កាលពីយប់ថ្ងៃទី២៥ ខែធ្នូ ឆ្នាំ២០១៨ ។
កញ្ញាទេព បូព្រឹក្ស កាលពីរសៀលថ្ងៃទី២៦ ខែធ្នូ ឆ្នាំ២០១៨ បានធ្វើដំណើរទៅកាន់ប៉ុស្តិ៍នគរបាលរដ្ឋបាលសង្កាត់ទឹកល្អក់១ ដើម្បីឆ្លើយបំភ្លឺប្រាប់សមត្ថកិច្ច និងរៀបចំដាក់ពាក្យបណ្តឹងតាមផ្លូវច្បាប់។ លុះក្រោយពេលចាកចេញពីប៉ុស្តិ៍នគរបាលវិញ កញ្ញាទេព បូព្រឹក្ស បានបញ្ជាក់ថា នាងបានដាក់ពាក្យបណ្តឹងឱ្យសមត្ថកិច្ចជួយរកយុត្តិធម៌ឱ្យនាងរួចរាល់ហើយ ដោយប្តឹងទៅលើបុរសដែលគប់កំប៉ុងស្រាបៀរចំកណ្តាលមុខនាងនោះ ទាមទារសំណងជំងឺចិត្ត ចំនួន១០ម៉ឺនដុល្លារ ៕