ភ្នំពេញ ៖ តារាចម្រៀងស្រីដ៏ល្បីឈ្មោះប្រចាំផលិតកម្មរស្មីហង្សមាស កញ្ញា ទេព បូព្រឹក្ស ត្រូវបានបុរសម្នាក់ ជះនិងគប់កំប៉ុងស្រាបៀរទៅលើរូបនាង ខណៈនាងកំពុងតែច្រៀងនៅលើឆាកនៅក្នុងហាង«សមុទ្រ» ។
ហេតុការណ៍នេះបានបង្កការភ្ញាក់ផ្អើលយ៉ាងខ្លាំងកាលពីវេលាម៉ោង១០និង០៥នាទីយប់ ថ្ងៃទី២៥ ខែធ្នូ ឆ្នាំ២០១៨នេះ នៅចំណុចភោជនីយដ្ឋានមួយយីហោ «សមុទ្រ» ស្ថិតនៅខាងកើតមន្ទីរពេទ្យកុមារជាតិ ស្ថិតក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។
គិតមកត្រឹមព្រឹកថ្ងៃទី២៦ ធ្នូ ២០១៨នេះ មន្ត្រីនគរបាលខណ្ឌទួលគោក នៅមិនទាន់បានទទួលពាក្យបណ្តឹងរបស់កញ្ញា ទេព បូព្រឹក្ស នៅឡើយ បើទោះបីពេលកើតហេតុភ្លាមៗ នាងនិយាយថា នឹងដាក់ពាក្យប្តឹងលើបុរសបង្កនោះក្តី ។
នៅក្នុងកម្មវិធីព័ត៌មានពេលព្រឹក នៅស្ថានីយទូរទស្សន៍ហង្សមាស លោកមាស រិទ្ធី ក៏បានលើកឡើងផងដែរករណីកញ្ញាទេព បូព្រឹក្ស ត្រូវបុរសម្នាក់ជះស្រាបៀរ និងគប់កំប៉ុងស្រាបៀរលើនោះ ដោយថា បុរសនោះគឺជាកូនម្ចាស់ហាង បន្ទាប់ពីកើតហេតុ ម្ចាស់ហាងបានលុបរូបភាពវីដេអីកាមេរាសុវត្ថិភាពចោលអស់ ។
លោកមាស រិទ្ធី បានរៀបរាប់ថា បុរសម្នាក់ដែលបានប្រើប្រាស់អំពើមិនសមរម្យទៅលើតារាចម្រៀងរូបនេះ ជាកូនម្ចាស់ហាងនេះផ្ទាល់ តែមិនបានប៉ុន្មានផង ស្រាប់តែពួកគេថា គ្រាន់តែជាភ្ញៀវប៉ុណ្ណោះ។ ចំណែកជនបង្កហេតុ ក៏តបានរត់គេចខ្លួនទៅបាត់ហើយ ។
លោករិទ្ធី ក៏បានបន្ថែមផងដែរថា កាមេរ៉ាសុវត្ថិភាពដែលបង្ហាញពីសកម្មភាពទាំងស្រុង និងមុខមាត់របស់ជនជះស្រាបៀរ និងគប់កំប៉ុងស្រាបៀរលើទេព បូព្រឹក្ស នោះ ត្រូវបានម្ចាស់ហាងលុបចោលទាំងអស់ ដែលមើលទៅហាក់ដូចជាគ្មានយុត្តិធម៌បន្តិចសោះឡើយ ។
លោកក៏បានបញ្ជាក់ថា យ៉ាងណា វីដេអូជាច្រើនក៏ចាប់ផ្តើមបែកធ្លាយបណ្តើរៗហើយនៅក្នុងបណ្តាញសង្គម ។ ហើយលោកក៏ចង់ឲ្យភាគីទាំងសងខាងបកស្រាយ និងពន្យល់ឲ្យបានច្បាស់ ទាក់ទងនឹងមួយនេះ ដើម្បីរកយុតិ្តធម៌ជូនតារាចម្រៀងខ្មែរ។
សូមជម្រាប់ថា ក្រោយកើតហេតុ កញ្ញាទេព បូព្រឹក្ស រៀបរាប់ទាំងអារម្មណ៍ឈឺចាប់ថា នាងបានមកភោជនីយដ្ឋានសមុទ្រ គឺត្រៀមច្រៀង៦បទ នៅក្នុងកម្មវិធី Hite X’mas Edition Party ដែលរៀបចំឡើងដោយក្រុមហ៊ុនស្រាបៀរហៃ Hite រួចទៅច្រៀងមួយកន្លែងផ្សេងទៀត ។ អំឡុងពេលដែលនាងកំពុងឈរច្រៀងនៅឆាកសុខៗ ស្រាប់តែមានបុរសម្នាក់ដែលគេសង្ស័យថា ជាសាច់ញាតិរបស់ម្ចាស់ហាង បានយកស្រាបៀរជះទៅលើ និងគប់កំប៉ុងស្រាបៀរលើនាង ធ្វើឲ្យនាងខឹងសម្បាជាខ្លាំង ។ ក្រោយពីបានធ្វើសកម្មភាពអសីលធម៌បែនេះហើយ បុរសខាងលើ និងមិត្តភក្តិផ្សេងទៀតបាននាំគ្នាគេចខ្លួនបាត់អស់ ។
ក្រោយកើតហេតុ គេបានឃើញមានវត្តមានខាងឪពុក កញ្ញាទេព បូព្រឹក្ស ក៏ដូចជាលោកងួន ចាន់ដេវីត បានទៅដល់កន្លែងកើតហេតុ លោកក៏បានប្រាប់អ្នកសារព័ត៌មាននៅកន្លែងកើតហេតុដែរថា កញ្ញា ទេព បូព្រឹក្ស មិនដែលមានទំនាស់ជាជនបង្កនោះទេ ហើយលោក បានស្នើរសុំឲ្យសមត្ថកិច្ចជួយរកយុត្តិធម៌ និងស្នើរឲ្យជនបង្កហេតុចូលខ្លួនដោះស្រាយឲ្យឆាប់បំផុត ។
ជុំវិញករណី ដែលធ្វើឱ្យប៉ះពាល់យ៉ាងខ្លាំង ដល់កិត្តិយស ទេព បូព្រឹក្ស នេះកញ្ញាមានការឈឺចាប់ខឹងរហូតនាងយំស្រែកយ៉ាងខ្លាំង ដែលទង្វើមិនឱ្យតម្លៃអ្នកសិល្បៈ ជាពិសេសគឺមិនឱ្យតម្លៃគាត់ដែលជាមនុស្សស្រីម្នាក់ ។
ភ្លាមៗ បន្ទាប់ពីកើតហេតុ នាងបានសួររកមូលហេតុ តែត្រូវជនបង្កគេចខ្លួនបាត់ នៅសល់តែស្ត្រីម្នាក់ទំនងជាថៅកែហាង ចេញមុខមកសម្រួលដោយនិយាយថា «បើមិនស្តាប់គាត់ទេ ចុះចេញពីហាងគាត់ ដោយមិនទទួលខុសត្រូវ» ។
ដោយឡែក សកម្មភាពអសីលធម៌របស់បុរសខាងលើនេះ ត្រូវបានមជ្ឈដ្ឋានមហាជន និងអ្នកសិល្បៈនានា រិះគន់ជាខ្លាំង ហើយបានស្នើសុំឲ្យស្ថាប័ននានា ជួយរកយុត្តិធម៌ចំពោះ ទេព បូប្រឹក្ស ដែលកំពុងរងគ្រោះ ព្រោះទង្វើរជះ និងគប់កំប៉ុងស្រាបៀរលើរូបនាងបែបនេះ មិនត្រឹមតែធ្វើឱ្យប៉ះពាល់ ដល់កិត្តិយសនាង ជាតារាចម្រៀងនោះទេ ថែមទាំងជាការមើលងាយ មិនឱ្យតម្លៃស្ត្រីភេទទៀតផង ៕