រាជធានីភ្នំពេញ៖ ប្រជាពលរដ្ឋជាច្រើនមានការព្រួយបារម្ភយ៉ាងខ្លាំង ដោយបច្ចុប្បន្នល្បែងអនឡាញចាក់បាល់ បានកំពុងតែបើកលេងយ៉ាងគគ្រឹកគ្រេង ជ្រកក្រោមបណ្តាហាងអ៊ីនធើណេត២៤ម៉ោង ហើយគេបានឃើញសមត្ថកិច្ចចុះបង្ក្រាបជាច្រើនកន្លែងហើយផងដែរ តែដូចជារាវចកក្នុងទន្លេអញ្ចឹង កាន់តែចាប់ កាន់តែបើកច្រើនឡើងនៅកន្លែងផ្សេង ដែលធ្វើឲ្យសង្គមមានភាពអសន្តិសុខ ដោយមានចោរឆក់ ចោរលួចច្រើន ។
កន្លងមកសម្តេចក្រឡាហោម ស ខេង ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាឲ្យគ្រប់ខេត្ត-ក្រុង លុបបំបាត់រាល់ល្បែងស៊ីសងទាំងអស់ក្នុងមូលដ្ឋាន ដើម្បីទប់ស្កាត់បទល្មើសលួច ឆក់ ប្លន់ ក្នុងគោលនយោបាយភូមិ-ឃុំ-សង្កាត់ មានសុវត្ថិភាពក៏ដោយ។
ប៉ុន្តែគេសង្កេតឃើញថាមួយរយៈពេលកន្លងមកនេះ ទីតាំងអ៊ីនធើណិត២៤ម៉ោង ជាច្រើនកន្លែងកំពុងតែរីកដុះដាល ដូច ផ្សិត ក្នុងរាជធានីភ្នំពេញមិនតិចជាង១០០កន្លែងនោះទេ ដែលបង្កប់ទៅដោយល្បែងស៊ីសងភ្នាល់បាល់។
គួរបញ្ជាក់ថា ទីតាំងភ្នាល់ធំៗមិនតិចជាង១០០កន្លែងនោះ គឺស្ថិតនៅតាមបណ្ដាខណ្ឌទាំង១២ ក្នុងរាជធានីភ្នំពេញ ហើយទីតាំងទាំងអស់នេះកំពុងតែដំណើរការដោយរលូន មិនមានអាជ្ញាធរ ឬសមត្ថកិច្ចជំនាញណាហ៊ានបង្ក្រាបនោះទេ។
ជាការពិតណាស់! ការឲ្យកើតមានបទល្មើសល្បែងស៊ីសង ការចរាចរថ្នាំញៀន បញ្ហាអសន្តិសុខ ឆក់ ប្លន់ ក៏ដូចជាអំពើហិង្សាក្នុងគ្រួសារ កាន់តែមានលក្ខណៈរសើបបំផុត ងាយប្រឈមការទទួលខុសត្រូវសម្រាប់ដែនសមត្ថកិច្ចដែនដីខ្លួនគ្រប់គ្រង ដើម្បីធានាឲ្យបាននូវ សន្តិសុខ សណ្តាប់ ភាព សុខសាន្តជូនប្រជាពលរដ្ឋ ស្របតាមទិសស្លោក «រាជរដ្ឋាភិបាល លើយន្តការអនុវត្តគោលនយោបាយភូមិ-សង្កាត់មានសុវត្ថិភាព»។
ប្រជាពលរដ្ឋរស់នៅក្បែរទីតាំងខាងលើបានលើកឡើងថា ផ្ទះអ៊ីនធើណេត២៤ម៉ោង ដែលជ្រកក្រោមយីហោសម្គាល់23K .28B .22B. P .MB .MK .MP និងតាមបណ្តាអ៊ីនធើណិតធំៗផ្សេងៗជាច្រើនទៀត កំពុងបើកចំហរទ្វារទទួលភ្ញៀវញៀនល្បែងចូលលេង ទាំងយប់ទាំងថ្ងៃ ពិសេសផ្តល់ឱកាសក្លាយជាជម្រកដល់ក្រុមអ្នកជួញដូរនិងប្រើប្រាស់ថ្នាំញៀនទៀត ដោយបើកលេងគគ្រឹកគគ្រេង គ្មានទេអ្នកបង្ក្រាប រហូតទាក់ទាញឲ្យសិស្សសាលាជាប់ចិត្តចូលលេងភ្លេចពីការសិក្សា បង្កឲ្យមានការក្តៅក្រហាយពីប្រជាពលរដ្ឋ នៅក្បែរខាង ដែលមានកូនចៅទៅចូលលេងល្បែងស៊ីសងទាំងនោះដោយពុំគិតពីការរៀនសូត្រ។
គួរបញ្ជាក់ផងដែរថា កន្លងមកលោក ឃួង ស្រេង អភិបាលរាជធានីភ្នំពេញបានមានប្រសាសន៍បញ្ជាក់ថា រដ្ឋបាលរាជធានីភ្នំពេញនឹងមានវិធានការបិទទីតាំងកន្លែងបើកអ៊ីនធើណិត នានា ណាដែលលួចបង្កប់ល្បែងស៊ីសងខុសច្បាប់។ គម្រោងនៃការមានវិធានការនេះ គឺក្រោយពីមានប្រជាពលរដ្ឋជាច្រើនបានលើកឡើងពីបញ្ហាដែលកន្លែងបើកអ៊ីនធើណិតមួយចំនួនបានលួចបង្កប់ល្បែងស៊ីសងខុសច្បាប់ បំភាន់ភ្នែកសមត្ថកិច្ច។
ការមានវិធានការបែបនេះត្រូវបានធ្វើឡើង ក្នុងកិច្ចប្រជុំមួយកាលពីកន្លងមក ជាមួយអាជ្ញាធរខណ្ឌទាំង១២ និងស្ថាប័នពាក់ព័ន្ធមួយចំនួនទៀត ដូចជាតំណាំងក្រសួងប្រៃសនីយ៍ និងទូរគមនាគមន៍ដើម នៅសាលារាជធានីភ្នំពេញ ដើម្បីពិភាក្សារកវិធានការដើម្បីលុបបំបាត់ ល្បែងស៊ីសងតាមប្រព័ន្ធអនឡាញនេះ។
លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញបានប្រាប់ថាលោកកំពុងមានវិធានការបង្ក្រាបរាល់ល្បែងស៊ីខុសច្បាប់ដែលកំពុងសម្ងំលាក់ខ្លួននៅតាមបណ្តាអ៊ីនធើណិត២៤ម៉ោងនានា។
លោកឧត្តមសេនីយ៍ឯកបន្តថា ដោយសារអ៊ីនធើណិត២៤ម៉ោងមានច្រើនកន្លែង អញ្ចឹងហើយលោកកំពុងរៀបចំនិងមានវិធានការបង្ក្រាបជាក់ជាមិនខាន។
បច្ចុប្បន្នប្រជាពលរដ្ឋកំពុងងឿងឆ្ងល់រហូតដាក់ការសង្ស័យថា ការមិនបង្ក្រាបមាន៤ចំណុច ទី១-មកពីមិនដឹង ទើបមិនបង្ក្រាប, ទី២-មកពីម្ចាស់ទីតាំងល្បែងមានខ្សែធំ ទើបមិនហ៊ានប៉ះ, ទី៣-មកពីម្ចាស់ទីតាំងល្បែងបង់លុយប្រចាំខែរួចហើយ ទើបធ្វើមិនដឹង និងទី៤- អាចមាន ចេតនាអនុវត្តផ្ទុយពីយន្តការអនុវត្តគោលនយោបាយភូមិ-សង្កាត់មានសុវត្ថិភាព ៕
ប្រភព៖ ដកស្រង់ពីសារព័ត៌មាន phnompenhtimes
