ភ្នំពេញ ៖ ក្មេងៗស្ទាវក្រុមអ្នកលេង ប្រមាណជាង១០នាក់ ប្រដាប់ដោយ ចប ប៊ែល ដំបង និងញញួរ ត្រូវបានក្រុមកម្មកររោងចក្រជាង៥០០នាក់ អះអាងថា ថៅកែរោងចក្រ ស៊ី ធី ស្ប៉ាក ជួលមកបង្កហិង្សា វាយមកលើកម្មករ អំឡុងពេលធ្វើកូដកម្ម ទាមទារលក្ខខណ្ឌប្រយោជន៍ការងារ កាលពីព្រឹកថ្ងៃទី១៨ ខែធ្នូ ឆ្នាំ២០១៨ ស្ថិតនៅខាងមុខរោងចក្រ ដេរកាបូប ស៊ី ធី ស្ប៉ាក ផ្លូវលំ ភូមិកន្ទោកជើង សង្កាត់កន្ទោក ខណ្ឌពោធិសែនជ័យ ។
តាមប្រភពពីក្រុមកម្មករ បានឱ្យដឹងថា រោងចក្រដេរកាបូបខាងលើ មានកម្មករបម្រើការងារសរុបចំនួនជាង៥០០នាក់ បានកើតទុកមិន សុខចិត្ត ចំពោះថៅកែក្រុមហ៊ុន ដែលមិនបានគោរពលក្ខខណ្ឌការងារ ដែលក្រសួងដាក់ចុះ ទើបនៅព្រឹកថ្ងៃទី១៨ ខែធ្នូ នេះកម្មករទូទាំងរោងចក្រ មិនសុខចិត្តប្រមូលផ្តុំគ្នា ធ្វើកូដកម្មទាមទារលក្ខខណ្ឌប្រយោជន៍១២ចំណុច ។
ក្រុមកម្មករបន្តថា ខណៈដែលក្រុមកម្មករកំពុងធ្វើការតវ៉ាដោយសន្តិវិធី នៅខាងមុខរោងចក្រ ស្រាប់តែលេចមុខក្រុមក្មេងស្ទាវ ជើងកាង សង្ស័យខាងថៅកែរោងចក្រ ជួលមកប្រដាប់ដោយចប ប៉ែល ដំបង ញញួរ បានព្រួតគ្នាដេញវាយ សំពង មកលើក្រុមកម្មករ បង្កឱ្យមានអ្នករងរបួស ផ្អើលឆោឡោទាំងសមត្ថកិច្ច ទាំងអាជ្ញាធរ ចុះទៅអន្តរាគមន៍ តែក្រុមក្មេងស្ទាវ ជើងកាងទាំងនោះ នាំគ្នារត់គេចខ្លួនបាត់អស់។
ការតវ៉ារបស់បងប្អូនកម្មកររោងចក្រខាងលើ រហូតមកដល់ល្ងាចថ្ងៃដដែលនេះ មិនទាន់មានដំណោះស្រាយ កម្មករ នៅបន្តប្រមូលផ្តុំ ខាងមុខរោងចក្រ។
សូមជម្រាបថា ជុំវិញករណីខាងលើនេះសារព័ត៌មាន KBN នៅមិនទាន់អាចទាក់ទងសុំការបំភ្លឺពីភាគីតំណាងរោងចក្រ បាននៅឡើយទេ ។ ទោះជាយ៉ាងណា យើងរង់ចាំការបកស្រាយបំភ្លឺពីគ្រប់ភាគីពាក់ព័ន្ធទាំងអស់ ៕