ភ្នំពេញ ៖ ក្រោយពីត្រូវតុលាការផ្តន្ទាទោសដាក់គុក១៨ខែ ព្រោះរឿងបាញ់គំរាមសម្លាប់ប្រពន្ធ អតីតឧកញ៉ា ហូរ ចំរើន ត្រូវបានលោក កូយ សៅ ចៅក្រមស៊ើបសួរ នៃសាលាដំបូងរាជធានីភ្នំពេញ ចេញដីកាឲ្យនាំខ្លួនមកសាកសួរ ពាក់ព័ន្ធរឿងឆបោកលុយកាក់គេ ។
នៅពេលបញ្ជូនខ្លួនទៅតុលាការ នៅម៉ោងប្រមាណជា១១និង៣០នាទីថ្ងៃត្រង់ ថ្ងៃទី១៨ ធ្នូ ២០១៨នេះ ជនជាប់ចោទឈ្មោះ ហូរ ចំរើន ត្រូវបានមន្ត្រីពន្ធនាគារព្រៃស ដឹកតាមរថយន្តម៉ាក Lexus RX300 ពណ៌ស ពាក់ស្លាកលេខ ភ្នំពេញ 2AP-2706 ដោយមានរថយន្តកងអង្គរក្សរបស់អតីតឧកញ៉ា ហូរ ចំរើន បើកតាមហែហមអមដំណើរផងដែរ ។
បើតាមប្រភពព័ត៌មានអោយដឹងថា បន្ទាប់ពីត្រូវចាប់ខ្លួនបញ្ជូនទៅដាក់គុកព្រៃស ព្រោះរឿងបាញ់បោះ អតីតឧកញ៉ា ហូរ ចំរើន នៅមានបណ្តឹងឆបោកប្រាក់ចំនួន ៣ករណីទៀត ក្នុងទំហំទឹកប្រាក់ប្រមាណជា២០០លានដុល្លារ ដែលពាក់ព័ន្ធគម្រោងវិនិយោគ កសាងមន្ទីរពេទ្យ សាលារៀន នៅក្នុងក្រុងតាខ្មៅ ខេត្តកណ្ដាលរបស់ក្រុមហ៊ុនចិន ដែលមានបុរសជនជាតិចិន ឈ្មោះ ហាន់ គឿក ជាដើមបណ្ដឹង ។
ក្រោយពីបញ្ចប់ការសាកសួរ អតីតឧកញ៉ារូបនេះ ត្រូវបានដឹកតាមរថយន្តប្រណីត ទៅដេកក្នុងគុកព្រៃសវិញ ដើម្បីរងចាំការកាត់បន្ថែម ពាក់ព័ន្ធនឹងបទល្មើសបោកប្រាស់ផ្សេងៗ ៕