ខេត្តត្បូងឃ្មុំ ៖ វីដេអូឃ្លីបមួយ ដែលបង្ហោះក្នុងបណ្ដាញសង្គមហ្វេសប៊ុកមួយចំនួនបានសរសេរថា ៖ «ប្រតិបត្តិការបង្ក្រាបរថយន្ត២គ្រឿង ដឹកឈើក្រញូង នៅស្រុកពញាក្រែក ដែលមានភាពចម្រូងចម្រាស់រវាងមន្ត្រីនគរបាលស្រវឹងស្រាម្នាក់ ជាមួយកម្លាំងសមត្ថកិច្ច» បុរសដែលពាក់អាវស ទំនងស្រវឹងផងនោះ ហាក់បីជាមានភាពក្អេងក្អាងជាខ្លាំងចំពោះសមត្ថកិច្ចដែលកំពុងតែធ្វើការបង្ក្រាបបទល្មើសព្រៃឈើ ជាពិសេសគាត់បានសម្តែងឲ្យឃើញថា គាត់ទំនងមានខ្សែធំ និងមិនមាននរណាអាចចាប់គាត់បាននោះទេ ។ រហូតដល់ថា បើសមត្ថកិច្ចហ៊ានចាប់រថយន្តដឹកឈើក្រញូងនឹងរលាយមួយខេត្តត្បូងឃ្មុំ! ហើយថា បើហ៊ានតែចាប់ឈើក្រញូង១ដុំយកចេញបាន គាត់ហ៊ានកោរសក់មួយចំហៀងក្បាល ដើរកាត់ផ្សារ ។
សូមជម្រាបថា កាលពីយប់ថ្ងៃទី១៥ ខែធ្នូ ឆ្នាំ២០១៨ កម្លាំងនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តត្បូងឃ្មុំ សហការជាមួយមន្ត្រីរដ្ឋបាលព្រៃឈើ បានបើកប្រតិបត្តិការតាមបង្ក្រាបរថយន្តចំនួន២គ្រឿង លួចដឹកជញ្ជូនឈើក្រញូង ស្ថិតនៅតាមផ្លូវជាតិលេខ៧ ស្រុកពញាក្រែក ខេត្តត្បូងឃ្មុំ ។ នៅវេលាម៉ោងចុះបង្ក្រាបនោះដែរ សម្រាប់តែលេចមុខមន្ត្រីនគរបាលម្នាក់ រួមជាមួយស្នងការរងម្នាក់ ក៏បានបើករថយន្តមកដល់ ហើយបានរារាំងប្រតិបត្តិការរហូតមានការជេរប្រមាថ មកលើកម្លាំងសមត្ថកិច្ចទៀតផង និងបានយកដៃទៅគ្រវាសសំដៅកាមេរ៉ាដែលកំពុងថតពីសកម្មភាពទាំងនេះ ។
មន្ត្រីនគរបាលដែលបង្កបញ្ហា និងបានរារាំង ដល់ប្រតិបត្តិការបង្ក្រាបបទល្មើសទាំងនោះ គឺមានអាការៈស្រវឹង នៅពេលធ្វើដំណើរមកដល់កន្លែងកើតហេតុ ។
មន្ត្រីនគរបាលរូបនេះមានឈ្មោះ យ៉ា សុផល តួនាទីនាយរងប៉ុស្តិ៍ស្អំ នៃវរសេនាតូចការពារព្រំដែនគោកលេខ៦១៥ ស្នងការដ្ឋាននគរបាលខេត្តត្បូងឃ្មុំ ។
នៅយប់កើតហេតុនោះ ក្រោយមកស្រែកឡូឡា នឹងឈ្លោះប្រកែកជាមួយកងកម្លាំងនគរបាលនោះ មន្ត្រីនគរបាល យ៉ា សុផល រួមជាមួយលោកស្នងការរង បានបើករថយន្តចេញបាត់ទៅ ហើយកងកម្លាំងនគរបាល និងមន្ត្រីរដ្ឋបាលព្រៃឈើបានអូសរថយន្តដឹកឈើទាំង២គ្រឿង ទៅរក្សាទុកនៅកន្លែងរដ្ឋបាលព្រៃឈើចាត់ការបន្តទៀត ។
ទោះជាយ៉ាងណា សម្រាប់នគរបាលឈ្មោះ យ៉ា សុផល នោះត្រូវបានលោកឧត្តមសេនីយ៍ស្នងការ បែន រ័ត្ន អះអាងថា នៅពេលនេះខាងជំនាញព្រហ្មទណ្ឌកំពុងសួរនាំ នៅការិយាល័យព្រហ្មទណ្ឌនៃស្នងការដ្ឋាននគរបាលខេត្ត និងស្រាវជ្រាវបន្ថែមទៀតដើម្បីចាត់ការបន្តទៀត ៕