ទីក្រុងសាន់ហ្វាន់ស៊ីស្កូ ៖ អ្នកនាំពាក្យក្រុមហ៊ុន Facebook និយាយនៅថ្ងៃនេះថា ក្រុមហ៊ុន Facebook បានជម្លៀសបុគ្គលិកចេញពីអគារមួយ នៅទីស្នាក់ការកណ្តាលរបស់ខ្លួននៅ Menlo Park បន្ទាប់ពីទទួលរងការគំរាមបំផ្ទុះគ្រាប់បែក នេះបើតាមការចុះផ្សាយរបស់សារព័ត៌មាន Channel NewAsia ។
អ្នកនាំពាក្យរូបនេះបាននិយាយនៅក្នុងសេចក្តីថ្លែងការណ៍តាមសារអេឡិចត្រូនិច ថា គ្រប់ៗគ្នាសុទ្ធតែមានសុវត្ថិភាព ហើយក្រុមហ៊ុនកំពុងស៊ើបអង្កេតអំពីហេតុការណ៍នេះ ។ ទោះយ៉ាងណា មិនទាន់បានបញ្ជាក់ថា តើមានបុគ្គលិកប៉ុន្មាននាក់ ដែលគេជម្លៀសចេញនោះទេ ។
នាយកដ្ឋានប៉ូលិស Menlo Park បាននិយាយថា បុគ្គលិកក្នុងអគារ និងរថយន្តនៅចំណត Jefferson Drive ចំនួន២០០ គ្រឿងត្រូវបានជម្លៀសចេញ ហើយអង្គភាពការពារ ការបំផ្ទុះគ្រាប់បែកកំពុងស្ថិតនៅកន្លែងកើតហេតុ និងជុំវិញអគារទីស្នាក់ការ Facebook ។
ករណីនៅទីស្នាក់ Facebook នេះវិញ ត្រូវគេរាយការណ៍ថា ដំបូងឡើយការហៅទូរស័ព្ទព្រមានពីការបង្កៃគ្រាប់បែកនេះ បានធ្វើឡើងទៅកាន់កម្លាំងប៉ូលិសនៅទីក្រុងញូយ៉កឯណោះទេ ដោយក្រោយមកទើបមានការបញ្ជូនដំណឹងបន្តទៅកាន់អាជ្ញាធរនៅ Menlo Park ។ យ៉ាងណា ខណៈនេះ គឺស្ថានការណ៍ជារួម កំពុងស្ថិតក្រោមការស៊ើបអង្កេតរបស់អាជ្ញាធរនៅឡើយ ៕
