រាជធានីភ្នំពេញ ៖ ផ្សាររាត្រីកុងតឺន័រ (Jet’s Container Night Market) បើកដំបូងបង្អស់នៅក្នុងក្រុងភ្នំពេញ ដែលមានទីតាំងជិតស្ថានទូតរុស្សី ស្ថិតក្នុងសង្កាត់ទន្លេបាសាក់ ខណ្ឌចំការមន ត្រូវបានរុះរើតូបជាបណ្តើរៗ និងបិទជាស្ថាពរហើយ ។
យោងតាមតំណាងក្រុមហ៊ុនវិនិយោគ បានអះអាងថា គិតមកដល់ពេលនេះ ទីតាំងត្រូវបានរើចេញស្ទើរអស់ទៅហើយ មូលហេតុដែលនាំឲ្យឈានដល់ការបិទផ្សារនេះគឺកត្តាតម្លៃជួលដីកើនឡើងខ្ពស់ ។
យ៉ាងណាមិញ ក៏មានការលើកឡើងថា នៅមុនពេលបិទនេះ អាជីវកម្មលក់ដូរនៅក្នុងផ្សារក៏កាន់តែថយចុះ ដោយពុំសូវមានអតិថិនដូចកាលពីមុន រហូតដល់អាជីវករដែលជួលទីតាំងខាងលើបានរើសម្ភាររបស់ខ្លួនចេញប្រហែលជិត១ខែមកហើយ បន្ទាប់ពីក្រុមហ៊ុនជូនដំណឹងពីការបិទ ។
សូមបញ្ជាក់ថា ផ្សាររាត្រីកុងតឺន័រ Jet’s Container Night Market គឺជាផ្សាររាត្រីកុងតឺន័រធំជាងគេក្នុងរាជធានីភ្នំពេញ ដែលបានបើកដំណើរការកាលពីជាង ២ ឆ្នាំមុន ដោយមានហាងលក់ម្ហូបអាហារ ភេសជ្ជៈ បារផឹកស៊ីតូចៗ និងវត្ថុអនុស្សាវរីយ៍ លក់នូវសម្លៀកបំពាក់ ចន្លោះពី ២០០-៣០០ ហាង តូប និងស្តង់ ដោយប្រើប្រាស់ទូរកុងតឺន័រសរុបជាង៨០ ។
បើតាមកាសែតភ្នំពេញប៉ុស្តិ៍ បានផ្សាយអោយដឹងថា លោក ឆាយ សុភ័ណ្ឌ ប្រធានគ្រប់គ្រងគម្រោងរបស់ផ្សាររាត្រី កុងតឺន័រ Jet’s បាននិយាយថា ដោយសារតែកិច្ចសន្យាជួលដីត្រូវអស់ ស្របពេលម្ចាស់ដីដំឡើងថ្លៃ និងមានបញ្ហាក្នុងការសុំច្បាប់មួយចំនួននោះ ក្រុមហ៊ុនក៏បានសម្រេចបិទតែម្តង ។
លោកថ្លែងថា ៖ «តម្លៃជួលដី អាចនិយាយថា ជាហេតុផលចម្បង ដែលមិនអាចអនុញ្ញាតឲ្យក្រុមហ៊ុនបន្តដំណើរការបានតទៅទៀត» ។
លោក សុភ័ណ្ឌ បានបន្តថា៖ «ក្រុមហ៊ុនកំពុងរុះរើសម្ភារ ដែលមានក្នុងទីតាំងខាងលើ យកទៅទុកនៅតំបន់វិហារសួគ៌ ដែលជាទីតាំងផ្ទាល់របស់ក្រុមហ៊ុន ខណៈក្រុមហ៊ុនមានផែនការអភិវឌ្ឍតំបន់វិហារសួគ៌ឲ្យក្លាយទៅជាមជ្ឈមណ្ឌលពាណិជ្ជកម្ម និងកន្លែងរស់នៅដ៏ល្អប្រកបដោយប្រណីតភាពបំផុត»។
លោក លី រតនៈអ្នកគ្រប់គ្រងហាង Beer Market បានប្រាប់ថា លោកបានជួលទីតាំងនេះ ក្នុងកិច្ចសន្យារយៈពេល១ឆ្នាំ ប៉ុន្តែបន្ទាប់ពីចំណាយពេលរៀបចំហាង និងបើកលក់បាន៦-៧ ខែ ក្រុមហ៊ុនក៏បានជូនដំណឹងពីការបិទតែម្តង។
នៅមុនជួលទីតាំងខាងលើ ក្រុមហ៊ុនប្រាប់លោកថា ក្រុមហ៊ុនបានបន្តកិច្ចសន្យាជួលដីជាមួយម្ចាស់ដីរួចរាល់ហើយ ។
លោកថ្លែងថា៖«ហេតុផលចម្បងដែលក្រុមហ៊ុនប្រាប់ពីការបិទផ្សារ គឺមានការប្តឹងពីស្ថានទូតរុស្ស៊ី ពីសំឡេងរំខាន ។ ការបិទនេះ ធ្វើឲ្យខ្ញុំខាតប្រាក់ជាច្រើន»។
លោក រតនៈ បានលើកឡើងថា កាលពីពេលថ្មីៗនេះលោកឮព័ត៌មានថា ទីតាំងនេះនឹងត្រូវយកទៅអភិវឌ្ឍជាអគារលក់ទំនិញវិញក្នុងពេលឆាប់ៗ ។
ប្រភពព័ត៌មានមួយបានឲ្យដឹងថា ទីតាំង ផ្សាររាត្រីកុងតឺន័រ មានទំហំជិត២ហិកតា ជាកម្មសិទ្ធិរបស់ក្រុមហ៊ុនរ៉ូយ៉ាល់គ្រុប របស់លោក គិត ម៉េង ហើយត្រូវបានក្រុមហ៊ុន Jet Group របស់លោកឧកញ៉ា ស្រី ចាន់ថន ជួលយកមកបើកជាផ្សាររាត្រី Jet’s Container Night Market ។
របាយការណ៍ស្រាវជ្រាវតម្លៃអចលនទ្រព្យក្នុងរាជធានីភ្នំពេញ ប្រចាំឆមាសទី ១ របស់ក្រុមហ៊ុនអចលនទ្រព្យ ឃី រៀលអ៊ីស្ទេត បានឲ្យដឹងថា តម្លៃអចលនទ្រព្យក្នុងទីតាំងខាងលើមានតម្លៃចន្លោះពី ៣,៥០០ ដុល្លារទៅដល់ ៦,០០០ ដុល្លារក្នុង១ម៉ែត្រការ៉េ ៕
