ខេត្តក្រចេះ ៖ លោកស្រី អ៊ិន ម៉ានិត្យ ប្រធានសាលាដំបូងខេត្តក្រចេះ នៅរសៀលថ្ងៃទី១០ ខែធ្នូ ឆ្នាំ២០១៨ បានចេញដីកាសម្រេចឃុំខ្លួនជនជាតិវៀតណាមចំនួន៤នាក់ ដាក់ពន្ធនាការ ក្រោមបទចោទប្រកាន់ «ពីបទបង្កើតឡគ្រប់ប្រភេទដោយគ្មានការអនុញ្ញាត និងបង្កើតមូលដ្ឋានកែច្នៃផលអនុផលធនធានធម្មជាតិគ្រប់ប្រភេទ» តាមបទបញ្ញាតិ្តមាត្រា៥៨ ចំណុច១ និងមាត្រា៦១ ចំណុច២ នៃច្បាប់ស្ដីពីដំបន់ការពារធម្មជាតិ ប្រព្រឹត្តនៅចំណុចត្រពាំងត្រាច ស្ថិតនៅភូមិឃ្សឹមក្រៅ ឃុំឃ្សឹម ស្រុកស្នួល ខេត្តក្រចេះ ។
លោក ឌួង ឆាយសាវុធ ប្រធានមន្ទីរបរិស្ថានខេត្តក្រចេះ បានឲ្យដឹងនៅល្ងាចថ្ងៃដដែលនេះថា ជនសង្ស័យទាំង៤នាក់ ដែលជាប់ពាក់ព័ន្ធនឹងករណីលួចបើកទីតាំងកែច្នៃផលអនុផលព្រៃឈើ ដោយខុសច្បាប់ ត្រូវបានកម្លាំងសមត្ថកិច្ច និងមន្ត្រីជំនាញកសាងសំណុំរឿងបញ្ជូនខ្លួនទៅកាន់សាលាដំបូងខេត្ត ដើម្បីបន្តទៅតាមនីតិវិធីច្បាប់ ។ ជនសង្ស័យចំនួន៤នាក់ មានជនជាតិវៀតណាមម្នាក់ ជាមេការ នៅទីតាំងធ្វើអាជីវកម្មសិប្បកម្មឡធ្យូងខុសច្បាប់ និងចំនួន៣នាក់ទៀត ត្រូវបានកម្លាំងកងរាជអាវុធហត្ថ ខេត្តក្រចេះ ឃាត់ខ្លួនបាន ខណៈបម្រុងដឹកជញ្ជូនធ្យូងនាំឆ្លងដែនទៅវៀតណាម ។
បើតាមមន្ត្រីជំនាញនៃមន្ទីរបរិស្ថាន ប្រាប់ថា ជនសង្ស័យទាំង៤នាក់ បានសារភាព និងទទួលស្គាល់ថា ខ្លួនពិតជាមានពាក់ព័ន្ធនឹងបើកធ្វើអាជីវកម្មកែច្នៃផលអនុផលព្រៃឈើ ដោយគ្មានច្បាប់ ។
សូមជម្រាបថា កម្លាំងកងរាជអាវុធហត្ថខេត្តក្រចេះ សហកាជាមួយមន្ត្រីរដ្ឋបាលព្រៃឈើស្រុកស្នួល និងមន្ត្រីបរិស្ថានខេត្ត បានបិទទីតាំងឡធ្យូងរបស់ជនជាតិវៀតណាមមួយកន្លែង ស្ថិតនៅក្នុងឃុំឃ្សឹម ស្រុកស្នួល ខេត្តក្រចេះ កាលពីរសៀលថ្ងៃទី៧ ខែធ្នូ ឆ្នាំ២០១៨ ។
ក្នុងប្រតិបត្តិការបង្ក្រាបទីតាំងឡធ្យូងខាងលើ កម្លាំងសមត្ថកិច្ចក៏បានឃាត់ខ្លួនមនុស្សពីរនាក់ក្នុងនោះ មានជនជាតិវៀតណាមម្នាក់ ព្រមទាំងរឹបអូសបានខ្យូងបានចំនួន១៥តោន ប្រគល់ឲ្យទៅខាងមន្ត្រីបរិស្ថាន ដើម្បីរក្សាទុក ។
លោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ បានរាយការណ៍ថា ការបង្ក្រាបឡធ្យូងនេះ ធ្វើឡើងបន្ទាប់ពីមន្ត្រីរបស់លោកស្ទាក់ចាប់បានរថយន្តមួយគ្រឿង ដឹកធ្យូងចំនួន១៣តោន ក្នុងទិសដៅនាំចូលទៅក្នុងប្រទេសវៀតណាម ។
បើតាមសមត្ថកិច្ចនៅស្រុកស្នួល បានបង្ហើបឲ្យដឹងថា ទីតាំងឡធ្យូងខាងលើនេះ ត្រូវបានក្រុមជនជាតិវៀតណាមធ្វើសកម្មភាពចាប់តាំងពីអំឡុងខែមេសា ឆ្នាំ២០១៨ មកម្ល៉េះ ហើយឈើដែលគេកាប់យកមកប្រើនោះ សុទ្ឋតែជាឈើមិនគ្រប់អាយុ ដែលកាប់ចេញពីតំបន់ដែនអភិរក្សជីវៈចម្រុះកែវសីមា ។
ប្រភពបានបង្ហើបឲ្យដឹងទៀតថា ជុំវិញសកម្មភាពនៃការកាប់អុសឈើតូចៗចូលឡធ្យូងលើនេះ គឺហាក់មានភាពមិនប្រក្រតី ដោយសារមានកាបើកឲ្យកម្មករវៀតណាម នៅបម្រើការក្នុងទីតាំងមួយនេះ ។
ចំណែកមន្ត្រីរដ្ឋបាលព្រៃឈើ បានឲ្យដឹងថា ទីតាំងសិប្បកម្មឡធ្យូងនេះ គឺជាតំបន់គ្រប់គ្រងរបស់មន្ទីរបរិស្ថានខេត្តក្រចេះ ហើយឡធ្យូងមានចំនួន១២ឡធំៗ ដែលកន្លងមកមន្ត្រីរដ្ឋបាលព្រៃឈើ ក៏បានធ្វើកិច្ចសន្យាម្ដងរួចមកហើយ ឲ្យម្ចាស់ទីតាំងសិប្បកម្មនេះបញ្ឈប់សកម្មភាពកាប់បំផ្លាញឈើ ដើម្បីយកមកផលិតធ្យូង ។
ប្រតិកម្មចំពោះការបិទឡធ្យូងនេះ លោក ដួង ឆាយសាវុធ ប្រធានមន្ទីរបរិស្ថានខេត្តក្រចេះ បានបកស្រាយថា សិប្បកម្មឡធ្យូង មួយកន្លែងនេះ ពិតជានៅក្នុងរង្វង់ផែនទីរបស់ដែនជម្រកសត្វព្រៃពិតប្រាកដមែន រួមទាំងនៅជិតស្នាក់ការរដ្ឋបាលព្រៃឈើសួនអាពាហ៍ពិពាហ៍ឃ្សឹមផងដែរ ប៉ុន្តែមិនគួរទម្លាក់ការទទួលខុសត្រូវដាក់មន្ទីរបរិស្ថានតែម្នាក់ឯងនោះទេ ។
មនុស្សដែលត្រូវចាប់ខ្លួនប្រតិបត្តិការបង្ក្រាបនេះ មានបុរសជនជាតិវៀតណាមម្នាក់ ឈ្មោះ ហូ សឹងតឿង អាយុ៣២ឆ្នាំ និងជនជាតិខ្មែរម្នាក់ទៀតឈ្មោះ គាំ សុបិន្ដ អាយុ៣២ឆ្នាំ ហើយត្រូវបានបញ្ជូនខ្លួនទៅកាន់ទីបញ្ជាការដ្ឋានកងរាជអាវុធហត្ថខេត្តក្រចេះ ដើម្បីរៀបចំបែបបទយកទៅដាក់គុក ។
យោងតាមប្រភពច្បាស់ការណ៍ជាច្រើន បានបង្ហើបឲ្យដឹងថា ឡធ្យូងមួយនេះ ក្រោមការជ្រោមជ្រែងពីមន្ត្រីមានអំណាចខ្លះ បានធ្វើសកម្មភាពកាប់បំផ្លាញឈើយកមកផលិតបានធ្យូង ជាយូរណាស់មកហើយ ដើម្បីយកធ្យូងទៅលក់ក្នុងប្រទេសវៀតណាម ចំណែកការណ៍ដែលមន្ត្រីកងរាជអាវុធហត្ថខេត្ត និងមន្ត្រីរដ្ឋបាលព្រៃឈើ នាំគ្នាយ៉ាងច្រើន ទៅបិទឡផលិតធ្យូងនេះ ដោយសារមានទំនាស់ផ្ទៃក្នុងរវាងមន្ត្រីពាក់ព័ន្ធ ក្រោយពីចែកប្រយោជន៍គ្នា មិនស្មើ ៕