ព្រះសីហនុ ៖ បរិស្ថាននៅមាត់សមុទ្រខ្មែរបច្ចុប្បន្ន ក្នុងក្រុងព្រះសីហនុ នៅតែចោទជាបញ្ហាមិនឈប់ ខណៈឆ្នេរសមុទ្រខ្មែរបានជាប់ជាឆ្នេរស្អាតជាងគេលើពិភពលោក តែផ្ទុយទៅវិញ ឆ្នេរខ្សាច់ដ៏សស្អាត និងទឹកសមុទ្រដ៏ថ្លាយង់ កំពុងត្រូវបានបំពុលដោយទឹកកខ្វក់ មានក្លិនស្អុយអសោច ហូរមកពីគ្រប់ទិសទី បានបង្ហូរចាក់ចូលទៅក្នុងសមុទ្រជាប្រចាំ នៅត្រង់ចំណុច ចន្លោះឆ្នេរសណ្ឋារគារអូរតែលសុខា និងសណ្ឋាគារស៊ីហ៊ូ ដែលជាសណ្ឋាគារលំដាប់ផ្កាយ៥ ។
ការបង្ហូរទឹកស្អុយនេះ ស្ថិតក្នុងភូមិ១ សង្កាត់លេខ៣ ក្រុងព្រះសីហនុ ទឹកសម្អុយមានពណ៌ខ្មៅ ពោរពេញដោយពពុះ បានហូរចូលសមុទ្រជារៀងរាល់ថ្ងៃ បង្កផលប៉ះពាល់ធ្ងន់ធ្ងរដល់បរិស្ថានទឹកសមុទ្រតំបន់នោះយ៉ាងអាក្រក់រកអ្វីប្រៀបមិនបាន ។
ភ្ញៀវទេសចរណ៍ជាច្រើន ដែលមកលេងកម្សាន្ត ក្នុងក្រុងព្រះសីហនុ បានធ្វើការរិះគន់ត្រង់ៗ ទៅលើគណៈកម្មការគ្រប់គ្រងតំបន់ឆ្នេរខេត្តព្រះសីហនុ ថា គ្មានការទប់ស្កាត់ ទឹកសម្អុយដែលបង្ហូរចូលសមុទ្រ គឺបានបំពុលបរិស្ថាន ហើយវាជាបញ្ហាប្រឈមដ៏ធ្ងន់ធ្ងរមួយ ដល់វិស័យទេសចរណ៍ជាតិ និងអន្តរជាតិ ព្រោះដំណើរកម្សាន្តមកខេត្តព្រះសីហនុ មនុស្សម្នាក់ៗផ្តោតសំខាន់ទៅលើការចុះងូតលេងកម្សាន្តទឹកសមុទ្រដ៏ថ្លាយង់ ប៉ុន្តែបើទឹកសមុទ្រគ្មានអនាម័យ តើមានភ្ញៀវណាគេចង់មកលេងទៀត ? នេះជាបញ្ហាមួយដែលថ្នាក់ដឹកនាំ អាជ្ញាធរខេត្តព្រះសីហនុ គួរពិចារណាឡើងវិញ ។
បញ្ហាទឹកសម្អុយខាងលើនេះ មិនមែនទើបតែកើតមាននោះទេ គឺកើតមានយូរឆ្នាំមកហើយ ប៉ុន្តែ កន្លងមកមិនទាន់មានការសាងសង់សណ្ឋាគារលំដាប់ផ្កាយ៥ ទឹកសម្អុយដែលហូរចាក់ចូលសមុទ្រនោះ បានហូរចូលសមុទ្រទៅផុតៗតែម្តង ។
ប៉ុន្តែសម្រាប់រយៈពេលប្រមាណ២ឆ្នាំចុងក្រោយនេះ បន្ទាប់ពីសណ្ឋាគារស៊ីហ៊ូរ ធ្វើផែទូក បិទចំច្រកទឹកហូរធ្វើឲ្យទឹកសម្អុយ ធ្វើអោយទឹកសម្អុយបានច្រាលបុកមកឆ្នេរខ្សាច់ ដែលហូរចាក់ចូលសមុទ្រមិនទៅមុខរួច នៅហូរវិលវល់ មិនទៅមុខមិនទៅក្រោយ បែរជាបាចសាចពេញលើឆ្នេរសមុទ្រ កន្លែងភ្ញៀវទេសចរចុះលេងទឹកយ៉ាងពេញបន្ទុកតែម្តង ជាហេតុធ្វើឱ្យភ្ញៀវខ្ពើមមិនអាចលេងទឹកបាន ។
លោក សាមុត សុធារិទ្ធ ប្រធានមន្ទីរបរិស្ថានខេត្តព្រះសីហនុ បានទទួលស្គាល់ថា ពិតជាមានបញ្ហានេះកើតឡើងមែន ។
លោកបញ្ជាក់ថា ជុំវិញបញ្ហាទឹកសម្អុយនេះ ខាងក្រសួងដែនដី បានចុះមកធ្វើ ការសិក្សា នឹងចាប់ផ្តើមធ្វើអាងចម្រោះហើយ ដើម្បីការពារមិនឲ្យទឹកសម្អុយហូរចូលសមុទ្របន្តទៀតទេ ។ ដូចនេះ នៅពេលអាងចម្រោះកសាងរួចរាល់ ឆ្នេរសមុទ្រខាងលើ នឹងល្អប្រសើវិញហើយ ៕
