បើតាមការចេញផ្សាយដោយសារព័ត៌មានចិន នៅព្រឹកថ្ងៃព្រហស្បតិ៍ ទី០៦ ខែធ្នូ ឆ្នាំ២០១៨ ថា នាយកហិរញ្ញវត្ថុរបស់ក្រុមហ៊ុនទូរគមនាគមន៍ចិនមួយឈ្មោះ ហួរវ៉េ «Huawei» ត្រូវបានចាប់ឃាត់ខ្លួន នៅប្រទេសកាណាដា និងប្រឈមការធ្វើបត្យាប័នទៅកាន់អាមេរិក ជាហេតុនាំអោយមានការប្រឆាំងតវ៉ាជាខ្លាំង ពីរដ្ឋាភិបាលក្រុងប៉េកាំង និងទាមទារអោយដោះលែងលោកស្រីជាបន្ទាន់ ។
លោកស្រី ម៉េង វ៉ានចូវ (Meng Wanzhou) ប្រធានផ្នែកហិរញ្ញវត្ថុក្រុមហ៊ុន Huawei ត្រូវជាកូនស្រីម្នាក់របស់ស្ថាបនិកក្រុមហ៊ុន Huawei គឺលោក រិន ចេងហ្វៃ (Ren Zhengfei) ត្រូវបានចាប់ខ្លួននៅក្នុងទីក្រុង វែនខូវើ (Vancouver) កាលពីថ្ងៃទី០១ ខែធ្នូកន្លងទៅ ពីបទសង្ស័យថា បានរំលោភបំពានលើទណ្ឌកម្មអាមេរិកប្រឆាំងអ៊ីរ៉ង់ ។
ស្ថានទូតចិនប្រចាំក្រុងអូតាវ៉ា ប្រទេសកាណាដា បានជម្រុញឱ្យអាជ្ញាធរកាណាដា ដោះលែង ដោយលើកឡើងយ៉ាងដូច្នេះថា «តបតាមសំណើរបស់សហរដ្ឋអាមេរិក កាណាដាបានចាប់ខ្លួនពលរដ្ឋចិនម្នាក់ ដែលមិនបានរំលោភលើច្បាប់អាមេរិក ឬកាណាដាទាល់តែសោះ… ដូច្នេះចិនប្រឆាំងយ៉ាងម៉ឺងម៉ាត់ចំពោះសកម្មភាពដែលរំលោភ និងបំផ្លាញសិទ្ធិមនុស្សរបៀបនេះ ក៏ដូចជម្រុញឱ្យភាគីកាណាដា ដោះលែងពលរដ្ឋចិនជាបន្ទាន់» ។
សេចក្តីថ្លែងការណ៍មួយពីក្រសួងយុត្តិធម៌អាមេរិក បាននិយាយាថា«លោកស្រី ម៉េង ត្រូវបានចាប់ខ្លួនកាលពីថ្ងៃ០១ធ្នូ។លោកស្រីត្រូវបានស្នើសុំអោយបញ្ជូនខ្លួនមកអាមេរិក ។និងសវនាការធានាខ្លួន នៅក្រៅឃុំមួយនឹងត្រូវធ្វើឡើងនៅថ្ងៃសុក្រ» ៕