ខេត្តសៀមរាប ៖ នៅព្រឹកថ្ងៃទី ០៥ ខែធ្នូ ឆ្នាំ២០១៨នេះ អដ្ឋិធាតុលោកសាស្ត្រាចារ្យវេជ្ជបណ្ឌិត បេអាត រិចឈ្នឺរ Beat Richner អតីតនាយកស្ថាបនិកមូលនិធិមន្ទីរពេទ្យគន្ធបុប្ផា បានធ្វើពិធីដង្ហែយកទៅតម្កល់ទុកនៅចេតិយនៅមន្ទីរពេទ្យគន្ធបុប្ផា ខេត្តសៀមរាបហើយ ។ ប្រជាពលរដ្ឋរាប់រយនាក់បានចូលរួមនៅក្នុងពិធីដង្ហែនេះ បានបង្ហាញទឹកមុខយ៉ាងក្រៀមក្រំបំផុត ស្ទើរគ្រប់គ្នាស្រក់ទឹកភ្នែក ពេលដង្ហែអដ្ឋិធាតុរបស់លោកមកដល់ ម្នាក់ៗបង្ហាញពីទឹកចិត្តស្ដាយ ស្រណោះពន់ពេក ចំពោះការឃ្លាតទៅឆ្ងាយ គ្មានថ្ងៃវិលត្រឡប់ ។
អដ្ឋិធាតុអតីតប្រធានមន្ទីរពេទ្យគន្ធបុប្ផា គឺលោកវេជ្ជបណ្ឌិត បេអាត រិចឈ្នឺរ ត្រូវបាននាំមកដល់ព្រលានយន្តហោះអន្តរជាតិសៀមរាប នៅវេលាម៉ោង៨ព្រឹក ថ្ងៃទី៥ ខែធ្ន ឆ្នាំ២០១៨នេះ ដើម្បីយកមកដាក់តម្កល់ក្នុងចេតិយ ទើបសាងសង់ហើយថ្មីៗ ស្ថិតនៅខាងមុខមន្ទីរពេទ្យកុមារគន្ធបុប្ផា ខេត្តសៀមរាប សម្រាប់គោរពបូជា ក្នុងចំណោមមហាជន ។
ពិធីដង្ហែឆ្លងកាត់តាមផ្លូវជាតិលេខ៦ បន្តមកដល់ស្តុបសណ្ឋាគារសុខាអង្គរ បត់តាមផ្លូវស៊ីវុត្ថាឆ្ពោះទៅកាន់ផ្សារចាស់តាមរង្វង់មូលនាគបាញ់ទឹក បន្តឆ្លងកាត់ស្ពានវត្តដំណាក់បត់ស្របតាមផ្លូវបណ្ដោយស្ទឹងសៀមរាប មកកាន់ស្ពានព្រះរាជដំណាក់ និងបន្តតាមផ្លូវហ្សាដឺហ្គោល ឆ្ពោះទៅមន្ទីរពេទ្យគន្ធបុប្ផាខេត្តសៀមរាប ដើម្បីចំតម្កល់ទុក និងនិមន្តព្រះសង្ឃជិត៧០០អង្គ ដើម្បីសម្តែងព្រះបរិត្ត បង្សុកូលតាមប្រពៃណីទំនៀមទម្លាប់ព្រះពុទ្ធសាសនា ។
សូមជម្រាបថា នៅព្រឹកថ្ងៃស្អែក ត្រូវនឹងថ្ងៃទី៦ ខែធ្នូ ឆ្នាំ២០១៨ ព្រះមហាក្សត្រ ព្រះករុណា ព្រះបាទ ព្រះបរមនាថ នរោត្តម សីហមុនី និងសម្តេចម៉ែ សម្តេចព្រះវររាជមាតាជាតិខ្មែរ នឹងយាងប្រទានភួងផ្កា និងគ្រឿងសក្ការៈបូជា នៅទីចេតិយ ដើម្បីឧទ្ទិសកុសលផលបុណ្យដល់ដួងវិញ្ញាណក្ខន្ធ លោកវិជ្ជបណ្ឌិត បេអាត រិចឈ្នឺរ ដែលអដ្ឋិធាតុរបស់លោកត្រូវបានដាក់តម្កល់ក្នុងចេតិយ ស្ថិតនៅខាងមុខមន្ទីរពេទ្យគន្ធបុប្ផា ខេត្តសៀមរាប ក្បែរសាលដែលលោកតែងតែប្រគំតន្ត្រីរៃអង្គាសប្រាក់សម្រាប់សង្គ្រោះកុមារកម្ពុជា ។
មហាជនក្នុងខេត្តសៀមរាប បាននាំគោរពវិញ្ញាក្ខន្ធ លោកវេជ្ជបណ្ឌិត បេអាត រិចឈ្នឺរ ជាអ្នកមានគុណ នៅមន្ទីរពេទ្យគន្ទបុប្ផា ដោយក្ដីរំជួលចិត្តពន់ពេកណាស់ ដើម្បីចូលរួមរំលែកទុក្ខ ចំពោះមរណភាព និងសម្តែងការសោកស្តាយ ចំពោះមរណភាពរបស់ស្ថាបនិកមន្ទីរពេទ្យគន្ធបុប្ផា ។
ការទទួលមរណភាពរបស់លោកវេជ្ជបណ្ឌិត បេអាត រិចឈ្នឺរ គឺជាការបាត់បង់ដ៏ធំធេង មិនត្រឹមតែចំពោះក្រុមគ្រួសារប៉ុណ្ណោះទេ តែក៏ជាការបាត់បង់នូវធនធានមនុស្សដ៏សំខាន់មួយរូប ដែលបានលះបង់កម្លាំងកាយចិត្ត ស្ទើរពេញមួយជីវិត លើការងារមនុស្សធម៌សម្រាប់ប្រជាជនកម្ពុជា តាមរយៈការបង្កើតមន្ទីរពេទ្យគន្ធបុប្ផា និងផ្តល់សេវាព្យាបាលដោយពុំគិតថ្លៃសម្រាប់មាតានិងកុមារ ដែលបានរួមចំណែកយ៉ាងសំខាន់ ក្នុងការអភិវឌ្ឍវិស័យសុខាភិបាល ក្នុងព្រះរាជាណាចក្រកម្ពុជា ។
ប្រជាពលរដ្នកម្ពុជាទាំងអស់ បានទទួលនូវភាពសោកសង្រេងជាពន់ពេក ចំពោះគ្រូពេទ្យទេវតា ដែលបានទទួលមរណភាព បន្សល់នូវភាពសោកស្តាយ និងស្រណោះជាពន់ពេក ដែលលោកបានជួយជីវិតកុមារកម្ពុជារាប់លាននាក់ គុណធម៌ដ៏ធំធេងទាំងនេះ ធ្វើឲ្យពលរដ្នកម្ពុជាមិនអាចបំភ្លេចបានឡើយ ៕