ភ្នំពេញ ៖ មានករណីផ្ទុះអាវុធមួយប្រាវរវាងសមត្ថកិច្ច និងបុរស២នាក់ ក្រោយសមត្ថកិច្ចខណ្ឌដង្កោដេញតាមឃាត់ខ្លួនបុរសទាំង២ កំពុងជិះម៉ូតូ Zoomer មួយគ្រឿង ព្យាយាមជិះគេចខ្លួន តាំងពីខណ្ឌដង្កោ រហូតដល់ខណ្ឌមានជ័យ ។លុះពេលសមត្ថកិច្ចខណ្ឌមានជ័យ តាមមកដល់ចំណុចផ្លូវលំ ប្លុកផ្ទះជួលមួយកន្លែង ជិតផ្សារដីថ្មី ក្នុងសង្កាត់ស្ទឹងមានជ័យ៣ ស្រាប់តែបុរសពីរនាក់នោះ បានដកកាំភ្លើង បាញ់មកលើសមត្ថកិច្ចចំនួន៤គ្រាប់ សំណាងមិនត្រូវ ហើយត្រូវសមត្ថកិច្ចសម្រេចចិត្តបាញ់តបតទៅវិញ បណ្ដាលឲ្យត្រូវជនសង្ស័យម្នាក់ ចំជើងម្ខាង ។
ហេតុការណ៍ខាងលើនេះ បង្កការភ្ញាក់ផ្អើលកាលពីវេលាម៉ោង៣រសៀល ថ្ងែទី៤ ខែធ្នូ ឆ្នាំ២០១៨ ស្ថិតនៅក្នុងភូមិដីថ្មី សង្កាត់មានជ័យ៣ ខណ្ឌមានជ័យ រាជធានីភ្នំពេញ ។
ជុំវិញករណីខាងលើនេះ នៅមិនទាន់ដឹងច្បាស់ថា ជាករណីអ្វី ខណៈដែលសមត្ថកិច្ចកម្លាំងព្រហ្មទណ្ឌក្រុង និងសមត្ថកិច្ចខណ្ឌដង្កោ កំពុងនាំជនសង្ស័យទៅសង្គ្រោះនៅមន្ទីពេទ្យសិន និងបន្តយកទៅអធិការដ្ឋាននគរបាលខណ្ឌដង្កោ ដើម្បីធ្វើការសាកសួរផងដែរ ។
ដោយឡែក បើតាមប្រភពច្បាស់ការណ៍មួយ បានបង្ហើបប្រាប់ឲ្យដឹងថា មុនពេលកើតហេតុ ក្រុមជនសង្ស័យមានគ្នា២នាក់ កំពុងផឹកស៊ី នៅសង្កាត់ព្រៃស ក្នុងខណ្ឌដង្កោ ហើយពួកគេបានដកកាំភ្លើងម៉ាក ឡុក បង្ហាញក្នុងន័យបង្អួតដល់អ្នកដទៃ ស្របពេលនោះ ក៏មានកម្លាំងសមត្ថកិច្ចឃើញ ស្រាប់តែជនសង្ស័យ ក៏នាំគ្នាជិះម៉ូតូម្នាក់មួយគ្រឿង ចេញពីកន្លែងផឹកស៊ី ជិះរត់គេចរហូត ទាំងមានកម្លាំងសមត្ថកិច្ចខណ្ឌដង្កោ បានសហការជាមួយកម្លាំងសមត្ថកិច្ចប៉ុស្ដិ៍ស្ទឹងមានជ័យ៣ ដេញតាមពីក្រោយ ខណៈមកដល់ផ្លូវទាល់ម្ដុំផ្សារដីថ្មី ជនសង្ស័យម្នាក់ ក៏ដកកាំភ្លើងបាញ់មកលើសមត្ថកិច្ចចំនួន៤គ្រាប់ ហើយត្រូវសមត្ថកិច្ចបាញ់វិញមួយគ្រាប់ចំជើងម្ខាង បណ្ដាលឲ្យដេកដួលលើម៉ូតូ ហើយសមត្ថកិច្ចបានចាប់វ៉ៃខ្នោះ និងដកហូតកាំភ្លើងខ្លីម៉ាកឡុកមួយដើម ចំណែកបក្សពួកម្នាក់ទៀតរត់គេចខ្លួនបាត់ ៕