ខេត្តព្រះសីហនុ ៖ ទាក់ទងសារព័ត៌មានមួយចំនួន បានបង្ហោះរូបភាពទាក់ទងមានជនមួយក្រុមសាក់រូបពេញខ្លួន និងកាន់ដាវ ថា ជាក្រុមចិននៅក្នុងប្រទេសកម្ពុជា នាថ្ងៃទី៤ ខែធ្នូ ឆ្នាំ២០១៨ ឧត្តមសេនីយ៍ទោ ជួន ណារិន្ទ បានចេញសារបញ្ជាក់ថា មិនមែននៅប្រទេសកម្ពុជាទេ ។
បើតាមផេកហ្វេសប៊ុកផ្លូវការលោក ជួន ណារិន្ទ សរសេរថា «ស្នងការដ្ឋាននគរបាលខេត្តព្រះសហនុ សូមគោរពរាយការណ៍ជូនសាធារណៈជន សូមមេត្តាជ្រាបថា ៖ កាលពីថ្មីៗ កន្លងមកនេះ មានសារព័ត៌មានមួយចំនួនតូច បានបង្ហោះថា រូបភាពជនខាងក្រោម ដែលមានសាក់រូបពេញខ្លួននេះគឺ ជាក្រុមចិន នៅក្នុងប្រទេសកម្ពុជា តែតាមពិត ក្រុមទាំងនេះ ជាជនជាតិវៀតណាម ហើយម្ចាស់ហ្វេសប៊ុកឈ្មោះ GIA DINH VUI TINH ជារឿយៗ បានបង្ហោះរូបក្រុមនេះធ្វើសកម្មភាពបង្អួតសាក់ ដាក់បណ្តាញសង្គមហ្វេសប៊ុករបស់ពួកគាត់ ជាអកុសលត្រូវសារព័ត៌មានមួយក្តាប់តូច ព្យាយាមបំពុលសង្គមខ្មែរយើង អោយអាប់អួរ មិនស្រាកស្រាន្ត ។ ដូច្នេះស្នងការដ្ឋាននគរបាលខេត្តព្រះសីហនុ សូមគោរពរាយការណ៏ជូនដល់សារធាណៈ មេត្តាយកចិត្តដាក់ ពិនិត្យអោយបានច្បាស់លាស់មុននិងវាយតម្លៃ និងសូមអោយបងប្អូនជនរួមជាតិ មេត្តាមានស្មារតីខ្ពស់ ក្នុងការលើកតម្កើង ថែរក្សាកិត្តិយស មុខមាត់ និងសេចក្តីថ្លៃថ្នូរ របស់ប្រទេសជាតិយើងទាំងមូល ។ សូមអរគុណ! » ។
ថ្មីៗនេះ មានបណ្តាញផ្សព្វផ្សាយមួយចំនួនតូច នៅប្រទេសកម្ពុជា បាននាំគ្នាបង្ហោះ និងស៊ែរបន្តគ្នា ពាក់ព័ន្ធនឹងរូបភាព ដែលពួកគាត់ជឿជាក់ថា ជារូបរបស់ក្រុមជនអន្ធពាលចិន ដែលមានរូបចាកសាក់ពេញខ្លួន ប្រមូលផ្តុំគ្នា កាន់អាវុធគ្រប់ដៃថា នៅក្នុងប្រទេសកម្ពុជា ដែលធ្វើឱ្យប្រជាពលរដ្ឋមានអារម្មណ៍មិនសប្បាយចិត្តចំពោះរូបភាព ដោយខ្លះបានរិះគន់មកលើអាជ្ញាធរកម្ពុជា ដែលមិនមានវិធានការជាដើម ប៉ុន្តែរូបភាពនោះការពិតមិនមែននៅកម្ពុជាឡើយ ៕