បាត់ដំបង ៖ នៅព្រឹកថ្ងៃទី៣ ខែធ្នូ ឆ្នាំ២០១៨ មានសិស្សស្រីប្រុសដែលមានអាយុពី១៣ទៅ១៥ឆ្នាំ នៅវិទ្យាល័យសំពៅលូន ប្រមាណ២០នាក់ បានដួលសន្លប់ ជាបន្តបន្ទាប់ រហូតនៅព្រឹកថ្ងៃទី៤ ខែធ្នូ ក៏មានសិស្សប្រមាណ១០នាក់ទៀត បានដួលសន្លប់ ហើយត្រូវបានដឹកទៅមន្ទីរពេទ្យបង្អែកសំពៅលូន ផងដែរ ។
សិស្សសាលាភាគច្រើនបានធូរស្រាល និងត្រឡប់ទៅលំនៅដ្ឋានវិញអស់ហើយ។ ចំពោះមូលហេតុយ៉ាងណានោះ នៅមិនទាន់ដឹងច្បាស់លាស់នៅឡើយទេ។
ប្រជាពលរដ្ឋខ្លះថា មកពីសិស្សហូបចំណីអាហារដែលគ្មានអនាម័យហើយ ។ អ្នកខ្លះថាមកពីសុខភាពរបស់សិស្សខ្សោយ ។ ប្រជាពលរដ្ឋ សូមឱ្យខាងអាជ្ញាធរសមត្ថកិច្ចពាក់ព័ន្ធ ចុះធ្វើការត្រួតពិនិត្យទៅលើករណីមួយនេះដែលនាំអោយសិស្សក្នុងវិទ្យាល័យដួលសន្លប់ ខាងលើផង ។
លោកអធិការស្រុក បានបញ្ជាក់ថា ចំពោះមូលហេតុមិនទាន់ច្បាស់លាស់ទេ ប៉ុន្តែ បើតាមគ្រូពេទ្យឱ្យដឹងថា ករណីសិស្សវិទ្យាល័យដួលសន្លប់នេះ ដូចជាករណីរបស់កម្មការនី តាមរោងចក្រនៅរាជធានី ខេត្ត គឺបណ្តាលមកពីសុខភាពរបស់សិស្សមួយចំនួនខ្សោយ ហើយដួលសន្លប់ ហើយសិស្សផ្សេងឃើញក៍ដួលបន្តគ្នា ដោយអ្នកខ្លះមិនបានហូបនំចំណីអាហារដែលលក់ក្នុងសាលាផងក៍ដួលសន្លប់ដែរ ។
គិតមកត្រឹមម៉ោង១០ព្រឹកថ្ងៃទី៤ ខែធ្នូនេះ សិស្សប្រហែលជិត៣០នាក់បានធូរស្រាលហើយ ត្រឡប់ទៅផ្ទះរៀងៗខ្លួន ។
បច្ចុប្បន្នទាំងសមត្ថកិច្ ក៍ដូចជាគ្រូពេទ្យ ដែរកំពុងស្រាវជ្រាវរកមូលហេតុឱ្យបានច្បាស់លាស់ ទើបប្រកាសជាផ្លូវការ ៕