បន្ទាយមានជ័យ ៖ ប្រភពច្បាស់ការណ៍មួយបានប្រាប់ឲ្យដឹងថា កម្លាំងមន្ត្រីគយនិងរដ្ឋាករតំបន់៥ បានចាប់រថយន្តស៊េរីទំនើប២គ្រឿង គ្មានពន្ធ ក្នុងនៅភូមិគ្រឹះឧកញ៉ា ហង្ស ស៊ីថា កាលពីវេលាម៉ោង៨ព្រឹក ថ្ងៃទី១ ខែធ្នូ ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ។
ប្រភពបញ្ជាក់ថា រថយន្តទំនើប២គ្រឿង ប្រភេទរថយន្តទេសចរណ៍ ពណ៌ស សុទ្ធតែមានតម្លៃជាង១០ម៉ឺនដុល្លារ ក្នុងមួយគ្រឿង ។ រថយន្តទាំងពីរគ្រឿង រួមមាន ១-ម៉ាក តូយ៉ូតាអាល់ហ្វារ៉ូ (Toyota Alpharo) និង២-ម៉ាក តូយ៉ូតា វែល ហ្វាយអឺ (Toyota Vell Fire) ពណ៌សដូចគ្នា ។
លោក សុទ្ធា វ៉ាន់ណារី មន្ត្រីគយនិងរដ្ឋាករចល័តតំបន់៥ នៃអគ្គនាយកដ្ឋានគយនិងរដ្ឋាករកម្ពុជា ប្រចាំខេត្តបន្ទាយមានជ័យ និយាយថា រថយន្តស៊េរីទំនើបទាំង២គ្រឿងនេះ ជារថយន្តចង្កូតស្តាំ គ្មានពន្ធ ត្រូវបាននាំចូលពីប្រទេសថៃដោយល្មើសច្បាប់ ហើយត្រូវបានយកមកលាក់ទុកក្នុងភូមិគ្រឹះរបស់ឧកញ៉ាម្នាក់ក្នុងខេត្តនេះ ។ ក្រោយពេលមន្ត្រីជំនាញធ្វើការស្រាវជ្រាវ និងកំណត់មុខសញ្ញាហើយ ក៏បានចុះបង្ក្រាបនិងឃាត់ចាប់រថយន្តស៊េរីទំនើបទាំង២គ្រឿង ។ រួចនាំយកទៅរក្សាទុក ដើម្បីចាត់ការតាមច្បាប់ នៅស្នាក់ការគយ និងរដ្ឋាករចល័តតំបន់៥ ។
ដោយឡែក មួយករណីទៀត នៅបន្ទាយមានជ័យដូចគ្នា កាលពីថ្ងៃទី៣០ ខែវិច្ឆិកា ឆ្នាំ២០១៨ កម្លាំងនគរបាលការិយាល័យប្រឆាំងបទល្មើស សេដ្ឋកិច្ច នៃស្នងការដ្ឋាននគរបាលខេត្តបន្ទាយមានជ័យ ដឹកនាំដោយលោកវរសេនីយ៍ទោ រស់ រៀម នាយការិយាល័យស្តីទី បានឃាត់រថយន្ត០១គ្រឿងម៉ាក FOD RAGER ពីរបាំង ចង្កូតស្តាំ ពណ៌ប្រផេះ ផលិតនៅឆ្នាំ២០១៦ នៅលើផ្លូវជាតិលេខ៥ ស្ថិតក្នុងភូមិយាង្មី ឃុំកូប ស្រុកអូរជ្រៅ បញ្ជូនមកស្នងការដ្ឋាននគរបាលខេត្តបន្ទាយមានជ័យ ។
លោកវរសេនីយ៍ទោ រស់ រៀម បានឲ្យដឹងថា រថយន្តចង្កូតស្តាំ ដែលឃាត់នេះសង្ស័យអ្នកទិញយកមកប្រើប្រាស់គ្មានពន្ធនាំចូល និងប្រើប្រាស់ប័ណ្ណសម្គាល់យានយន្ត ក្លែងក្លាយ ។
បើតាមការសាកសួរអ្នកបើកបររថយន្តឈ្មោះ នាង សារឿន ភេទប្រុស អាយុ៥២ឆ្នាំ នៅភូមិបឹងស្នោរ ឃុំស្លក្រាម ស្រុកស្វាយចេក បានប្រាប់សមត្ថកិច្ចថា ប្រហែលមួយសប្តាហ៍មុន ខ្លួនបានដូរដីជាមួយឈ្មោះស៊ុន សារឿន ភេទប្រុសអាយុ៥៨ឆ្នាំ នៅ ភូមិយាងថ្មី ឃុំកូប ស្រុកអូរជ្រៅ ដោយខ្លួនបានប្រគល់ដីឲ្យឈ្មោះស៊ុន សារឿន ចំនួន៣ហិកតា នៅភូមិក្តិបថ្ម ឃុំគោករមៀត ស្រុកថ្មពួក ជាថ្នូរនឹងរថយន្ត FOD RAGER នេះ តម្លៃ២ម៉ឺនដុល្លាអាមេរិក ។
ចំណែកចម្លើយឈ្មោះស៊ុន សារឿន បាននិយាយថា រយៈពេលប្រហែលជាបីខែមុន ខ្លួនបាដូរដីជាមួយនឹងរថយន្ត FODនេះ ជាមួយឈ្មោះ ជា សុខុម ភេទប្រុស មុខរបរជាយោធា នៅឯស្មាច់ ខេត្តឧត្តរមានជ័យ ដោយប្រគល់ដីចំនួន១ហិកតាកន្លះ នៅភូមិបឹងស្នោរ ឃុំស្លក្រាម ស្រុកស្វាយចេក ជាថ្នូរនឹងរថយន្ត FOD RAGER នេះ ។ ក្រោយពីដូរបានខ្លួនបានពឹងពាក់ប្អូនធម៌នៅភ្នំពេញ ធ្វើស្លាកលេខ និងប័ណ្ណសម្គាល់រថយន្ត ក្នុងតម្លៃ៥ពាន់ដុល្លា ឲ្យប្អូនធម៌គាត់រកពឹងគេជួយធ្វើឲ្យ ពេលយកស្រាប់ប័ណ្ណសម្គាល់យានយន្ត និងស្លាកលេខក្លែងក្លាយ គាត់បានព្យាយាមទូរស័ព្ទទៅអ្នកធ្វើ តែតេមិនចូល ក្រោយមកលឺថា អ្នកធ្វើនោះត្រូវបានសមត្ថកិច្ចចាប់ពីបទធ្វើ ប័ណ្ណយានយន្ត និងស្លាកក្លែងក្លាយ ។
ដោយផ្អែកលើឯកសារពាក់ព័ន្ធដែលដកហូតបាន និងចម្លើយសារភាពរបស់ឈ្មោះ នាង សារឿន និងឈ្មោះស៊ុន សារឿន ជនទាំង២នាក់នេះ គឺពិតជាប្រើប្រាស់ប័ណ្ណសម្គាល់យានយន្តក្លែងក្លាយប្រាកដមែន បច្ចុប្បន្នជនទាំង រួមរថយន្តត្រូវបានបញ្ជូនទៅ សាលាដំបូងខេត្ត ដើម្បីចាត់វិធានការច្បាប់ នៅថ្ងៃទី០១ ខែធ្នូ ឆ្នាំ២០១៨នេះផងដែរ ៕