ភ្នំពេញ ៖ នារីវ័យក្មេង ស្រស់ស្អាត២នាក់ បានស្រែកឈ្លោះប្រកែកគ្នាជាមួយបុរសម្នាក់ យ៉ាងតឹងសរសៃក រហូតបង្កការភ្ញាក់ផ្អើលដល់អ្នកដំណើរ និងសមត្ថកិច្ចចុះទៅជួយអន្តរាគមន៍ភ្លាមៗ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលវេលាម៉ោង ១២និង៣០នាទីរំលងអធ្រាត្រឈានចូលថ្ងៃទី២ ខែវិច្ឆិកា ឆ្នាំ២០១៨ ស្ថិតតាមបណ្ដោយផ្លូវលេខ២៧១ ត្រង់ចំណុចគល់ស្ពានស្ទឹងមានជ័យខាងជើង ក្នុងសង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។
តាមប្រភពព័ត៍មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញបុរសម្នាក់ រួមទាំង ព្រូរថយន្តម្នាក់ទៀត បានបើករថយន្តម៉ាក ហ៊ីយ៉ាន់ដាយ ក្បាលពណ៌ស ពាក់ស្លាកលេខ ភ្នំពេញ 3E-5028 ធ្វើដំណើរពីជើងទៅត្បូង ។ លុះបើកមកដល់ចំណុចកើតហេតុខាងលើ ក៏បានបើកវ៉ាជែងមកខាងឆ្វេង រួចបត់ ស្ដាំវិញទាំងកំរោល ក៏ជ្រុលទៅបុកកៀររថយន្តកាមរីហាយប្រីដ ពណ៌ខ្មៅ ពាក់ស្លាកលេខ ភ្នំពេញ 2L-0520 ធ្វើដំណើរស្របគ្នា បើកដោយនារីវ័យក្មេងពីរនាក់ បណ្ដាលរងការខូចខាតយ៉ាងដំណំ តែមិនមានអ្នក របួសនោះ ទេ ។ ភ្លាមនោះភាគីរងគ្រោះ និងភាគីបង្កហេតុមិនព្រមធ្វើការសម្របសម្រួលគ្នានោះទេ បែកជាឈ្លោះប្រកែក គ្នាយកត្រូវរៀងខ្លួន បង្កការភ្ញាក់ផ្អើល អ្នកដំណើរ និងសមត្ថកិច្ចចុះមកអន្តរាគមន៍ភ្លាមៗផងដែរ ។
ក្រោយកើតហេតុ សមត្ថកិច្ចមូលដ្ឋានបានចុះដល់កន្លែងកើតហេតុ ដោយឃើញថា មិនបង្កឲ្យប៉ះពាល់ដល់ សម្បត្តិរដ្ឋ ក៏បានឲ្យភាគីទាំងសងខាងសម្របសម្រួលគ្នា ដោយភាគីខាងរថយន្តហ៊ីយ៉ាន់ដាយ ព្រមយក រថយន្តកាមរីហាយប្រីដ ទៅជួសជុលឲ្យវិញ ដើម្បីបញ្ចប់រឿងតែម្តង ៕