ភ្នំពេញ ៖ តាមសេចក្តីរាយការណ៍ ជាបឋមបានឲ្យដឹងថា រថភ្លើងដឹកអ្នកដំណើរភ្ញៀវបរទេស១គ្រឿង បានបើកជ្រុលទៅបុករះ ខូចខាតរថយន្តតូចធំ និងម៉ូតូជាច្រើនគ្រឿង និងបានបន្តរុញចូលទៅបុកបង្គោលភ្លើង និងផ្ទះរបស់ប្រជាពលរដ្ឋបន្តបន្ថែមទៀត បណ្តាលឲ្យមនុស្សចំនួន២នាក់ បានរងបួសធ្ងន់ ។
ហេតុការណ៍នេះបានកើតឡើងនៅម៉ោង៧និង៤៥នាទី ថ្ងៃទី០៣ ខែធ្នូនេះ នៅមុខអាកាសយានដ្ឋានភ្នំពេញ ភូមិក្បាលដំរី សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ ។
ប្រភពព័ត៌មានពីកន្លែងកើតហេតុ អោយដឹងថា នៅមុនពេលកើតហេតុ គេឃើញរថយន្ត និងម៉ូតូ បានឈប់ជាបន្តបន្ទាប់ នៅចំណុចស្តុបខាងលើ ខណៈនោះមានរថភ្លើងបានធ្វើដំណើរ ដឹកភ្ញៀវអន្តរជាតិ ក្នុងទិសដៅពីជើងទៅត្បូង ចូលអាកាសយានដ្ឋានអន្តរជាតិភ្នំពេញ ក៏បានបុកពីក្រោយរថយន្តម៉ាកហ៊ីយ៉ាន់ដាយ ដែលឈប់រំលោភលើផ្លូវរថភ្លើង ។ រួចបន្តទៅបុករថយន្តកាមរីមួយគ្រឿងទៀត ចំ ចំហៀង ហើយរុញទៅផ្ទប់បង្គោលភ្លើង និងចូលផ្ទះប្រជាពលរដ្ឋ បណ្តាលឲ្យបាក់បង្គោលបាណូ ។ ខណៈនោះមានម៉ូតូ១គ្រឿង ក៏ត្រូវបានរថភ្លើង បុករុញបណ្តាលឲ្យអ្នកបើកបរ និងអ្នករួមដំណើរបានរងរបួសទាំង២នាក់ផងដែរ ។
ក្រោយកើតហេតុ ជនរងគ្រោះត្រូវបានបញ្ជូនទៅកាន់មន្ទីរពេទ្យ ហើយរថយន្តទាំង២គ្រឿង និងម៉ូតូ១គ្រឿង ត្រូវបាននគរបាលចុះទៅវាស់វែង បញ្ជូនទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយ ។ ដោយឡែករថភ្លើងក្រោយកើតហេតុបានតចូលអាកាសយានដ្ឋានហើយបានដាក់ភ្ញៀវហើយក៏បានត្រឡប់ក្រោយទៅវិញបាត់ទៅ ។
គួរបញ្ជាក់ថា ចាប់តាំងពីបង្កើតឲ្យមានផ្លូវរថភ្លើង នៅចំកណ្តាលផ្លូវថ្នល់ តែងតែបង្កឲ្យមានគ្រោះថ្នាក់ជាបន្តបន្ទាប់ ជួនកាលម៉ូតូបើកសុខៗ ក្រឡាច់ផ្លូវរថភ្លើងដួលបោកក្បាល និងខ្លះទៀត ត្រូវរថភ្លើងរ៉ូយ៉ាលអ៊ែរវ៉េ បុកបណ្តាលឲ្យរងរបួស ជាបន្តបន្ទាប់ជាច្រើនករណីផងដែរ ៕
