ខេត្តកំពង់ស្ពឺៈ បុរសកំណាចម្នាក់ ទើបនឹងចេញពីជក់កញ្ឆា ដើរមកដល់ផ្ទះ បង្កជម្លោះនៅក្នុងគ្រួសារ ហើយផ្ទុះនូវកំហឹងយ៉ាងក្រេវក្រោធ ស្ទុះទៅទាញកាំបិតប័ុតោង វាយក្បាលប្រពន្ធ បណ្ដាលឲ្យបែកហូរឈាមជោកខ្លួន (រងរបួសធ្ងន់) កាលពីវេលាម៉ោង១០យប់ ថ្ងៃទី១៨ ខែវិច្ឆិកា ឆ្នាំ២០១៨ នៅក្នុងភូមិក្រាំងពញា ឃុំវាលពង់ ស្រុកឧដុង្គ។
បើតាមសម្ដីប្រពន្ធរបស់ជនសង័្សយ បានឲ្យដឹងថា ប្ដីរបស់នាងជាមនុសុ្សញៀនកញ្ឆា ហើយគាត់តែងតែជក់ស្ទើរតែរៀងរាល់ថ្ងៃ និងមិនសូវគិតគូរពីរឿងរកស៊ីចិញ្ចឹមកូនប្រពន្ធនោះឡើយ។ ពីមួយថ្ងៃទៅមួយថ្ងៃ ប្ដីរបស់នាង គិតតែពីដើរបាត់ៗពីផ្ទះ ព្រលឹមចេញ ព្រលប់ចូល ហើយឧស្សាហ៍រករឿង និងវាយប្រពន្ធកូនជាញឹកញាប់។ លុះមកដល់ថ្ងៃកើតហេតុ បន្ទាប់ពីប្ដីរបស់ានាងវិលត្រឡប់មកពីជក់កញ្ឆាវិញ ក៏រករឿងនាងដូចសព្វមួយដង។ ប៉ុន្តែដោយសារនាងអត់ធ្វើទ្រាំនឹងទង្វើរបស់ប្ដីលែងបាន ទើបនាងតបត ស្រាប់តែប្ដីរបស់នាង បានស្ទុះទៅទាញកាបិតប័ុងតោ ចេញពីជើងក្រានបាយ (ចង្រ្កាន) យកមកវាយក្បាលនាងពេញទំហឹង បណ្ដាលឲ្យបែកហូរឈាមស្រោចពេញខ្លួន។
មន្រ្ដីនគរបាលស្រុកឧដុង្គ បានឲ្យដឹងថា ជនសង័្សយជាប់ពាក់ព័ន្ធនឹងអំពើហិង្សានៅក្នុងគ្រួសារ ហើយត្រូវបានសមត្ថកិច្ចនោះ ឈ្មោះ សាក់ អ៊ិន អាយុ៤៤ឆ្នាំ។ រីឯស្ត្រីរងគ្រោះឈ្មោះ អឿន ពៅអូន អាយុ៤៥ឆ្នាំ។ ពួកគេទាំង២នាក់ រស់នៅក្នុងភូមិកើតហេតុខាងលើ។
ក្រោយពេលកើតហេតុ អ្នកភូមិបានរាយការណ៍ទៅសមត្ថកិច្ចឲ្យចុះឃាត់ខ្លួនជនសង័្សយ នាំមកកាន់អធិការដ្ឋាននគរបាលស្រុក ដើម្បីសាកសួរ និងកសាងសំណុំរឿងចាត់ការតាមផ្លូវច្បាប់។ ដោយឡែកជនរងគ្រោះ ត្រូវបានសាច់ញាតិ និងអ្នកភូមិដឹកបញ្ជូនទៅព្យាបាល នៅក្នុងមន្ទីរពេទ្យបង្អែកស្រុក។