ខេត្ដរតនគិរីៈ បុរសល្មោភកាមម្នាក់ បានចាប់ប្អូនថ្លៃអាយុ១៣ឆ្នាំរំលោភសេពសន្ថវៈ រហូតបានសម្រេចជាបន្ដបន្ទាប់ចំនួន៦ដង ក៏បែកការដឹងដល់ម្ដាយរបស់នាង ប្ដឹងទៅសមត្ថកិច្ចឲ្យឃាត់ខ្លួន កាលពីរសៀល ថ្ងៃទី១៥ ខែវិច្ឆិកា ឆ្នាំ២០១៨ នៅក្នុងភូមិគ្លិះ ឃុំស៊ើង ស្រុកបកែវ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលឃាត់ខ្លួន ជនសង័្សយបានប្រើល្បិច នាំប្អូនថ្លៃរបស់គេ ទៅចាប់រំលោភ រហូតបានសម្រេចជាបន្ដបន្ទាប់ចំនួន៥លើក ហើយគំរាមនាងមិនឲ្យយករឿងអាស្រូវរបស់ខ្លួនទៅប្រាប់ឪពុកម្ដាយ និងអ្នកដទៃ។ លុះមកដល់វេលាម៉ោង៨ព្រឹក ថ្ងៃទី១៤ ខែវិច្ឆិកា ឆ្នាំ២០១៨ ជនសង័្សយបាននាំនាងទៅចាប់រំលោភម្ដងទៀត នៅក្នុងភូមិត្រុំ ឃុំឡាមិញ ស្រុកបកែវ ខេត្តរតនគិរី។ ប៉ុន្តែដោយសារក្មេងស្រីរងគ្រោះបានរងនូវការឈឺចាប់ខ្លាំងពេក ទើបនាងយករឿងរ៉ាវដ៏លាមកនេះ មកប្រាប់អាណាព្យាបាលរបស់នាង ហើយពួកគាត់បាននាំនាងទៅដាក់ពាក្យបណ្ដឹង នៅក្នុងប៉ុស្ដិ៍នគរបាលរដ្ឋបាល។
មន្រ្ដីនគរបាលស្រុកបកែវ បានឲ្យដឹងថា ជនសង័្សយជាប់ពាក់ព័ន្ធនឹងករណីចាប់រំលោភសេពសន្ថវៈលើអនីតិជន ហើយត្រូវសមត្ថកិច្ចឃាត់ខ្លួននោះ ឈ្មោះ ទីង ទឹម អាយុ៣២ឆ្នាំ ជនជាតិទំពួន សញ្ជាតិខ្មែរ មុខរបរធើ្វចម្ការ មានលំនៅក្នុងភូមិសំ ឃុំតេន ស្រុកអូរយ៉ាដាវ ខេត្តរតនគិរី។ រីឯក្មេងស្រីរងគ្រោះឈ្មោះ ល ស អាយុ១៣ឆ្នាំ ជនជាតិទំពួន មានលំនៅក្នុងស្រុកបកែវ។
មន្រ្ដីនគរបាលដដែល បានបន្ដថា ក្រោយពេលមានពាក្យបណ្ដឹងពីជនរងគ្រោះ សមត្ថកិច្ចបានស្រាវជ្រាវ និងចុះទៅដល់ផ្ទះរបស់ជនសង័្សយ។ ប៉ុន្ដែប្រពន្ធរបស់គេហាក់បីដូចជាមានគំនិតចង់កុហកសមត្ថកិច្ច ដោយប្រាប់ថា ប្ដីរបស់នាងទៅរកស៊ីអារឈើ នៅក្នុងព្រៃ។ ទោះជាប្រពន្ធរបស់ជនសង័្សយមានបំណងចង់កុហកក្ដី តែសមត្ថកិច្ចបានប្រើប្រាស់នូវជំនាញរបស់ខ្លួន ដោយបញ្ជាឲ្យប្រពន្ធរបស់គេចុចទូរស័ព្ទហៅប្ដី ឲ្យត្រឡប់មកផ្ទះ ហើយកុហកថា កូនឈឺ។
មន្រ្ដីនគរបាលដដែល បានបន្ដថា នៅពេលជនសង័្សយត្រឡប់មកដល់ផ្ទះ សមត្ថកិច្ចក៏ចាប់ខ្លួន រួចនាំមកកាន់អធិការដ្ឋាននគរបាលស្រុក ដើម្បីសាកសួរ។ នៅពេលនោះ ជនសង័្សយបានសារភាពថា ខ្លួនពិតជាបានប្រើល្បិចលួងលោមប្អូនថ្លៃស្រី និងនាំនាងទៅចាប់រំលោភបានសម្រេចចំនួន៦លើកប្រាកដមែន។
ជនសង័្សយបានប្រាប់សមត្ថកិច្ចបន្ដថា ការចាប់រំលោភលើកទី១ គឺរូបគេប្រើល្បិចបញ្ជោតនាងទៅរកត្រីនៅក្នុងអូរមួយ ហើយក៏ចាប់រំលោភតែម្ដង។ លុះក្រោយៗមក រូបគេបាននាំនាងចម្ការតែពីរនាក់ ហើយចាប់នាងរំលោភជាញឹកញាប់ តែដោយសារនាងអត់ទ្រាំនឹងទង្វើដ៏លាមករបស់ខ្លួនលែងបាន ទើបនាងយករឿងអាស្រូវហ្នឹង មកប្រាប់ម្តាយក្មេករបស់ខ្លួន ធ្វើឲ្យគាត់ខឹង ក៏ប្ដឹងទៅសមត្ថកិច្ចឲ្យចាប់ខ្លួនគេតែម្ដង។
ក្រោយពេលទទួលបានចម្លើយសារភាពពីជនសង័្សយ និងយោងតាមពាក្យបណ្ដឹងរបស់ជនរងគ្រោះ ទើបសមត្ថកិច្ចបានកសាងសំណុំរឿង បញ្ជូនជនសង័្សយទៅកាន់ស្នងការដ្ឋាននគរបាលខេត្ត ដើម្បីចាត់ការបន្ដតាមនីតិវិធី៕