ភ្នំពេញៈ អគ្គនាយកដ្ឋានកាំកុងត្រូលកម្ពុជា បានព្រមាននឹងចាត់វិធានការតាមផ្លូវច្បាប់លើម្ចាស់ស្ថានីយឥន្ធនៈណា ដែលលក់ប្រេងគ្មានគុណភាព និងបរិមាណ មិនគ្រប់ចំនួន តាមការកិច្ចសន្យាតម្រូវឲ្យម្ចាស់ស្ថានីយកែកំហុសខ្លួន។
លោក ឌឹម ថេង អគ្គនាយករង នៃអគ្គនាយកដ្ឋានកាំកុងត្រូល បានឲ្យដឹងថា ចាប់ពីពេលនេះតទៅ មន្ត្រីកាំកុងត្រូលនឹងសហការជាមួយព្រះរាជអាជ្ញារាល់ពេល ចុះត្រួតពិនិត្យស្ថានីយឥន្ធនៈនានា នៅទូទាំងកម្ពុជា។ ប្រសិនបើសមត្ថកិច្ចជំនាញរកឃើញថា ស្ថានីយណាមួយប្រព្រឹត្តកំហុសខាងលើ គឺម្ចាស់ស្ថានីយនោះ អាចប្រឈមនឹងផ្លូវច្បាប់។
អគ្គនាយករង នៃអគ្គនាយកដ្ឋានកាំកុងត្រូល បានបន្ដថា «ឥឡូវហ្នឹងដោយសារតែប្រហែលជាប្អូនបានដឹង ហើយក៏សារព័ត៌មានបានចុះផ្សាយច្រើនមកហើយដែរថា អត់ឃើញមានចាត់វិធានការអី គឺអគ្គនាយកដ្ឋានកាំកុងត្រូល នឹងសហការជាមួយព្រះរាជអាជ្ញាតែម្ដង រាល់ពេលចុះទៅហ្នឹង ព្រោះយើងបានផ្សាយដំណឹងនេះយូរហើយ »។
អគ្គនាយកដ្ឋានកាំកុងត្រូល បានព្រមានបែបនេះ បន្ទាប់ពីមន្ត្រីកាំកុងត្រូល បានចុះត្រួតពិនិត្យ និងរកឃើញមានម្ចាស់ស្ថានីយប្រេងមួយចំនួន បានលក់ប្រេងមិនគ្រប់បរិមាណ និងគ្មានគុណភាព។
ដោយឡែកលោកមេធាវី សុក សំអឿន ប្រធានក្រុមអ្នកច្បាប់អម្រិន្ទ បានគាំទ្រឲ្យមានវិធានការតាមច្បាប់ទៅលើម្ចាស់ស្ថានីយប្រេងឥន្ធនៈនានា ដែលក់ប្រេងមិនគ្រប់បរិមាណ តាមរយៈការវិធានការផាកពិន័យ។ ករណីនេះ យើងមើលដែរថា ជាចេតនា ឬក៏អចេតនា ហើយបើយើងនិយាយថា ខ្វះនោះ គឺខ្វះប៉ុន្មាន? បើខ្វះបន្តិចបន្តួច វាមិនមែនជាចេតនាកេងបន្លំទេ គាត់មានទៅខុសស្អី! […] ប្រសិនជាផាកពិន័យ អូខេ! ខ្ញុំគាំទ្របើដល់ថ្នាក់ដល់ជាប់គុកច្រវាក់ខ្ញុំមិនគាំទ្រទេ។
អគ្គនាយកដ្ឋានកាំកុងត្រូល បានរកឃើញស្ថានីយប្រេងឥន្ធនៈចំនួន១១កន្លែងនៅក្នុងខេត្តតាកែវ បានលក់ប្រេងមិនគ្រប់បរិមាណ ឬក៏មិនអនុលោមតាមគុណភាព កាលពីថ្ងៃម្សិលមិញនេះ៕