ភ្នំពេញៈ អគ្គីបានលេបត្របាក់អាសនៈមួយយ៉ាងសន្ធោសន្ធៅ បង្កឲ្យភ្ញាក់ផ្អើលដល់ប្រជាពលរដ្ឋ និងសមត្ថកិច្ចចេញមកជួយបាញ់ទឹកពន្លត់ កាលពីវេលាម៉ោង១ និង៥០នាទីរសៀល ថ្ងៃទី១៥ ខែវិច្ឆិកា ឆ្នាំ២០១៨ នៅក្នុងផ្ទះល្វែងជាន់ទី១ នៃបុរី លឹម សៀងហាក់ ស្ថិតក្នុងភូមិក្រោលគោ សង្កាត់គីឡូលេខ៦ ខណ្ឌឫស្សីកែវ។
មន្ត្រីនគរបាលខណ្ឌឫស្សីកែវ បានឲ្យដឹងថា គ្រោះអគ្គិភ័យនេះ បានកើតឡើងនៅក្នុងផ្ទះលេខ 65F នៃបុរី លឹម សៀងហាក់ មានម្ចាស់ឈ្មោះ នួន ស៊ីខន ភេទស្រី អាយុ៣១ឆ្នាំ មុខរបរលក់ដូរ មានលំនៅក្នុងផ្ទះកើតហេតុខាងលើ។ ករណីនេះ បណ្ដាលមកពីការទុស្សេខ្សែភ្លើង នៅលើអាសនៈផ្នែកខាងក្រោយ(ជាន់ទី១)។
មន្រ្ដីនគរបាលដដែល បានបន្ដថា នៅក្នុងការជួយអន្ដរាគមន៍បាញ់ទឹកពន្លត់អគ្គិភ័យនោះ សមត្ថកិច្ចបានបើករថយន្ដពន្លត់អគ្គិភ័យមកជួយចំនួន៨គ្រឿង ប៉ុន្តែបាញ់ទឹកអស់តែ៤រថយន្ដ ទើបធ្វើឲ្យភ្លើងរលត់អស់ទៅវិញទាំងស្រុង។ ទោះជាយ៉ាងណា នៅក្នុងហេតុការណ៍នេះ មិនបានបង្កឲ្យមានមនុស្សណាម្នាក់រងគ្រោះថ្នាក់នោះឡើយ។ ដោយឡែកសម្ភារដែលខូចខាតដោយសារគ្រោះអគ្គិភ័យនេះ សមត្ថកិច្ចមិនទាន់ថាមានអ្វីខ្លះនោះទេ ហើយរង់ចាំសាកសួរពីម្ចាស់ផ្ទះសិន៕