ខេត្តស្វាយរៀងៈ ជនបរទេស៣នាក់បានរកស៊ីជួញដូរ និងសេពថ្នាំញៀន ក៏ត្រូវសមត្ថកិច្ចចុះទៅបង្ក្រាប និងឃាត់ខ្លួន កាលពីវេលាម៉ោង៤ និង១៥នាទីល្ងាច ថ្ងៃទី១៤ ខែវិច្ឆិកា ឆ្នាំ២០១៨ នៅក្នុងបន្ទប់លេខ ៣០២ នៃផ្ទះជួលមួយកន្លែង ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត។
មន្ត្រីនគរបាលក្រុងបាវិត បានឲ្យដឹងថា ជនសង័្សយជាប់ពាក់ព័ន្ធនឹងករណីថ្នាំញៀន ហើយត្រូវសមត្ថកិច្ចឃាត់ខ្លួននោះ ទី១-ឈ្មោះ វ៉ាង យាំងឌឿន ភេទប្រុស អាយុ២២ឆ្នាំ ជនជាតិវៀតណាម មុខរបរមិនពិតប្រាកដ មានស្រុកកំណើតនៅភូមិសូករូក ឃុំជីបិន ស្រុកចៅថាញ់ ខេត្តតៃនិញ ប្រទេសវៀតណាម ទី២-ឈ្មោះ ដាំង ជីហ្វឿងហាំង ភេទស្រី អាយុ២៦ឆ្នាំ មុខរបរជាស្រ្ដីម៉ាស្សា មានស្រុកកំណើតនៅភូមិហ្វើងហូបាយ ឃុំចឹងហ្វូ ស្រុកម៉ៃឌូ ខេត្តសុកចាំង ប្រទេសវៀតណាម និងទី៣-ឈ្មោះ ភូ ជីវ៉ៃ ភេទប្រុស អាយុ២៨ឆ្នាំ ជនជាតិម៉ាឡេស៊ី មុខរបរជាអ្នកចាត់ការទូទៅ KTV មានស្រុកកំណើតនៅទីក្រុងកូឡាឡាំពួ ប្រទេសម៉ាឡេស៊ី។
មន្ត្រីនគរបាលដដែល បានបន្ដថា ក្នុងការឃាត់ខ្លួនជនជាតិវៀតណាមទាំង២នាក់ខាងលើនេះ សមត្ថកិច្ចដកហូតវត្ថុតាងមួយចំនួន រួមមាន ថ្នាំញៀន៣កញ្ចប់តូច, ទូរស័ព្ទដៃ២គ្រឿង, សម្ភារប្រើប្រាស់មួយចំនួន។ ដោយឡែកការឃាត់ខ្លួនជនជាតិម៉ាឡេស៊ីវិញ សមត្ថកិច្ចក៏ដកហូតបានវត្ថុតាងមួយចំនួនដែរ រួមមាន ទូរស័ព្ទដៃ១គ្រឿង, លិខិតឆ្លងដែន១, សម្ភារប្រើប្រាស់មួយចំនួន។
មន្រ្ដីនគរបាលដដែល បានបន្ដថា មុនពេលចុះទៅបង្រ្កាប និងចាប់ខ្លួននោះ សមត្ថកិច្ចបានទទួលព័ត៌មានពីប្រជាពលរដ្ឋដែលបានរាយការណ៍មកថា ពួកគាត់បានឃើញជនជាតិវៀតណាមចំនួន២នាក់កំពុងប្រើប្រាស់ថ្នាំញៀន។ បន្ទាប់ពីមានសេចក្ដីរាយការណ៍បែបនេះ សមត្ថកិច្ចបានចុះទៅឃាត់ខ្លួនពួកគេតែម្ដង។
មន្ត្រីនគរបាលដដែល បានបន្ដថា ក្រោយពេលឃាត់ខ្លួន នាំជនសង័្សយជាជនជាតិវៀតណាមទៅដល់អធិការដ្ឋាននគរបាល ជនសង័្សយឈ្មោះ វ៉ាង យាំងឌឿន បានសារភាពថា ថ្នាំញៀនដែលគេយកមកប្រើប្រាស់នោះ គឺទិញពីឈ្មោះ ភូ ជីវ៉ៃ ជាជនជាតិម៉ាឡេស៊ី។ តាមចម្លើយសារភាពនេះ សមត្ថកិច្ចបានប្រើប្រាស់ជំនាញរបស់ខ្លួន ដោយបញ្ជាឲ្យជនសង័្សយទាក់ទងតាមទូរស័ព្ទ រកទិញថ្នាំញៀនពីជនសង័្សយ និងបន្តស្រាវជ្រាវ រហូតដល់វេលាម៉ោង៦ និង៣០នាទីល្ងាច ទើបឃាត់ខ្លួនជនសង័្សយដល់បន្ទប់ជួលរបស់គេ ស្ថិតនៅខាងក្រោយផ្សារអន្តរជាតិ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត។
ក្រោយពេលឃាត់ខ្លួន សមត្ថកិច្ចបានធ្វើតេស្ដទឹកនោមរបស់ជនសង័្សយទាំង៣នាក់ រកឃើញមានផ្ទុកនូវសារធាតុញៀន ជាវិជ្ជមាន។ បន្ទាប់មក សមត្ថកិច្ចបានកសាងសំណុំរឿង បញ្ជូនជនសង័្សយទៅកាន់ស្នងការដ្ឋាននគរបាលខេត្ត ចាត់ការបន្ដតាមនីតិវិធី៕