ភ្នំពេញៈ មន្ត្រីយោធាជាមេខ្លោងចោរប្លន់ប្រដាប់អាវុធម្នាក់កំពុងធ្វើដំណើរជាមួយនឹងប្រពន្ធ ក៏ត្រូវសមត្ថកិច្ចរាជធានីភ្នំពេញ និងស្នងការដ្ឋាននគរបាលខេត្តកំពង់ស្ពឺ ឃាត់ខ្លួន កាលពីព្រឹក ថ្ងៃទី១៤ ខែវិច្ឆិកា ឆ្នាំ២០១៨ នៅតាមផ្លូវបេតុលេខ 93z ស្ថិតក្នុងភូមិផ្សារតូច សង្កាត់ទួលសង្កែ១ ខណ្ឌឫស្សីកែវ។
មន្ត្រីនគរបាលខណ្ឌឫស្សីកែវ បានឲ្យដឹងថា ជនសង័្សយដែលសមត្ថកិច្ចឃាត់ខ្លួនឈ្មោះ ហាត់ ឆាយ ហៅ ហាក់ ឆាយ មុខរបរជាមន្ត្រីយោធា អាយុ៤២ឆ្នាំ ស្នាក់នៅផ្ទះលេខ៣៦៩ ផ្លូវលេខ៩៣z ភូមិសាមគ្គី សង្កាត់ឫស្សីកែវ ខណ្ឌឫស្សីកែវ និងស្រុកកំណើតនៅភូមិកំពង់ក្តី ឃុំកំពង់រាប ស្រុកកោះសូទិន ខេត្តកំពង់ចាម។ នៅក្នុងការឃាត់ខ្លួនជនសង័្សយខាងលើនេះ គឺសមត្ថកិច្ចបានធ្វើឡើងតាមដីការបស់តុលាការខេត្ដកំពង់ស្ពឺ។
មន្ត្រីនគរបាលដដែល បានបន្ដថា បន្ទាប់ពីឃាត់ខ្លួនជនសង័្សយ សមត្ថកិច្ចបានឆែកឆេរក្នុងរថយន្ដ ម៉ាក CRV ដោយរកឃើញអាវុធខ្លីមួយដើម ម៉ាកឡុកចិន ពណ៌ខ្មៅ គ្រាប់មួយចំនួន ទូរស័ព្ទ២គ្រឿង និងឯកសារពាក់ព័ន្ធមួយចំនួន។ ក្រោយមក សមត្ថកិច្ចបាននាំខ្លួនទៅឆែកឆេរដល់ក្នុងផ្ទះរបស់ជនសង័្សយ ក៏រកឃើញម៉ូតូ ម៉ាក PCX មួយគ្រឿង អាវុធខ្លី ម៉ាក K54 មួយដើមទៀត គ្រាប់ជាច្រើនគ្រាប់ កាតគ្រីរថយន្ត និងម៉ូតូ១៤ ស្លាកលេខរថយន្តមួយបន្ទះ និងសម្ភារពាក់ព័ន្ធមួយចំនួនទៀត។
ក្រោយពេលឃាត់ខ្លួន សមត្ថកិច្ចបានធ្វើកំណត់ហេតុ បញ្ជូនជនសង័្សយទៅកាន់ស្នងការដ្ឋាននគរបាលខេត្តកំពង់ស្ពឺ។ ដោយឡែកប្រពន្ធរបស់ជនសង័្សយ មិនជាប់ពាក់ព័ន្ធ សមត្ថកិច្ចបានអនុញ្ញាតឲ្យត្រឡប់ទៅផ្ទះវិញ៕
