ខេត្តព្រៃវែងៈ ទូកងរបស់ប្រទេសកម្ពុជា មានប្រវែងជិត១០០ម៉ែត្រ និងមានចំណុះទូកជិត២០០នាក់ ជាប់ឯតទគ្គកម្មពិភពលោក «World Guinness Record » ជាផ្លូវការ ហើយបានធ្វើពិធីនេះឡើង កាលពីវេលាម៉ោង៩ព្រឹក ថ្ងៃទី១២ ខែវិច្ឆិកា ឆ្នាំ២០១៨ នៅក្នុងទឹកដី នៃអ្នកលឿងត្រើយខាងកើត ខេត្តព្រៃវែង ក្រោមអធិបតីភាពរបស់សម្ដេចក្រឡាហោម ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃ និងលោកស្រី ដោយមានការចូលរួមពីលោក Pravin Patel អ្នកវិច្ឆ័យរបស់ World Guinness Record។
នៅក្នុងពិធីនេះ ក៏មានការចូលរួមពីលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា, លោក ស សុខា អនុប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការផលិតទូកង ដ៏វែងជាងគេនៅលើពិភពលោក ព្រមទាំងលោក លោកស្រី ជាថ្នាក់ដឹកនាំ និងអ្នកពាក់ព័ន្ធជាច្រើនរូបទៀត។
លោក Pravin Patel បានបញ្ជាក់យ៉ាងដូច្នេះថា ទូកង នៃព្រះរាជាណាចក្រកម្ពុជា មានប្រវែង៨៧,៣ម៉ែត្រ បានបំបែកឯតទគ្គកម្មពិភពលោក (World Guinness Record) ជាផ្លូវការហើយ។ ទូកងរបស់កម្ពុជាដែលបំបែកឯតទគ្គកម្មនេះ ត្រូវបានប្រសិទ្ធនាមថា «កម្ពោជិកបុត្តាខេមរាតរី» ដែលមានអត្ថន័យថា «ទូកងរបស់កូនខ្មែរ រស់នៅក្នុងដែនដីកម្ពុជា»។
ទូកងនេះមានបណ្ដោយប្រវែង៨៧,៣ម៉ែត្រ ទទឹងប្រវែង១,៩៤ម៉ែត្រ និងជម្រៅ០,៨ម៉ែត្រ។ ក្បាលទូកងនេះ ត្រូវបានរចនាឡើងដោយជាក្បាលនាគ និងកន្ទុយហង្ស ប្រកបដោយក្បូរក្បាច់រចនាល្អប្រណីត ដែលផ្ទុកបានចំណុះបាន រហូតដល់ចំនួន១៧៩នាក់ ក្នុងនោះអ្នកអុំ១០០នាក់ មកពីទាហានជើងទឹក និង៧៩នាក់ មកពីនគរបាលជើងទឹក៕
