ភ្នំពេញៈ និស្សិត២នាក់បានភ្លើតភ្លើននឹងសម្ភារនិយម និងដើរលេងប៉ោឡែ រហូតបែកគំនិតអាក្រក់លួចម៉ូតូរបស់និស្សិតដូចគ្នា ក៏ត្រូវសមត្ថកិច្ចឃាត់ខ្លួន កាលពីវេលាម៉ោង៣រសៀល ថ្ងៃទី១០ ខែវិចិ្ឆកា ឆ្នាំ២០១៨ នៅមុខបន្ទប់ជួល ផ្លូវបេតុង ភូមិបុរី១០០ខ្នង សង្កាត់ទឹថ្លា ខណ្ឌសែនសុខ។
មន្ត្រីប៉ុស្ដិ៍នគរបាលរដ្ឋបាលសង្កាត់ទឹកថ្លា បានឲ្យដឹងថា ជនសង័្សយជាប់ពាក់ព័ន្ធនឹងករណីលួច ហើយត្រូវសមត្ថកិច្ចឃាត់ខ្លួននោះ រួមមាន ទី១-ឈ្មោះ តាំង ម៉េងតុង ភេទប្រុស អាយុ២១ឆ្នាំ និងទី២-ឈ្មោះ សាយ ឌុន ភេទប្រុស អាយុ២៤ឆ្នាំ។ ពួកគេទាំង២នាក់ (គ្មានសារធាតុញៀន) មានមុខរបរជានិស្សិតដូចគ្នា និងស្នាក់នៅបន្ទប់ជួលលេខ១២ ផ្លូវបេតុង ភូមិបុរី១០០ខ្នង សង្កាត់ទឹថ្លា ខណ្ឌសែនសុខ។ រីឯជនរងគ្រោះជាម្ចាស់ម៉ូតូគ្រោះឈ្មោះ ផេង ស្រីមុំ ភេទស្រី អាយុ២១ឆ្នាំ មុខរបរជានិស្សិត ស្នាក់នៅបន្ទប់ជួលលេខ១៧ ផ្លូវបេតុង ភូមិបុរី១០០ខ្នង សង្កាត់ទឹថ្លា ខណ្ឌសែនសុខ រាជធានីភ្នំពេញ។
មន្ត្រិនគរបាលដដែល បានបន្ដថា ក្រៅពីឃាត់ខ្លួនជនសង័្សយខាងលើនេះ សមត្ថកិច្ចបានដកហូតវត្ថុតាងមួយចំនួន រួមមាន ម៉ូតូចំនួន៣គ្រឿង រួមមាន ទី១-ម៉ូតូម៉ាកហុងដាឌ្រីម សេ១២៥ ពណ៌ខ្មៅ ផលិតឆ្នាំ២០១៤ ពាក់ស្លាកលេខ កំពង់ចាម 1L-0371 របស់ជនរងគ្រោះ, ទី២-ម៉ូតូម៉ាកហុងដាឌ្រីម សេ១២៥ ពណ៌ខ្មៅ ផលិតឆ្នាំ២០៧ ពាក់ស្លាកលេខ កំពង់ស្ពឺ 1W-5138 របស់ជនសង្ស័យ, និងទី៣-ម៉ូតូម៉ាកនិក ស៊េរី២០១៧ ពណ៌សលាយក្រហម ពាក់ស្លាកលេខ កំពង់ស្ពឺ 1K-2014 របស់ជនសង្ស័យ។
មន្ត្រីនគរលបាលដដែល បានបន្ដថា មុនពេលកើតហេតុ នាវេលាម៉ោង១២ថ្ងៃត្រង់ ថ្ងៃខែឆ្នាំដដែល ជនរងគ្រោះបានយកម៉ូតូរបស់ខ្លួនមកទុកនៅមុខបន្ទប់ជួល (ចំណុចកើតហេតុ) ដោយមិនបានចាក់ សោកម៉ូតូឡើយ រួចហើយដើរចូលក្នុងបន្ទប់ជួលរបស់ខ្លួន និងបិទទ្វារហូបបាយ។ រហូតមកដល់ម៉ោងកើតហេតុ ជនរងគ្រោះបានចេញមកក្រៅវិញ ស្រាប់តែបាត់ម៉ូតូរបស់ខ្លួន ក៏បង្កឲ្យមានការផ្អើលឆោឡោដឹងដល់ម្ចាស់ផ្ទះ និងអ្នកជិតខាង។
មន្រ្ដីនគរបាលដដែល បានបន្ដថា បន្ទាប់ពីកើតហេតុភ្លាម ជនរងគ្រោះបានមកដាក់ពាក្យបណ្តឹងនៅក្នុងប៉ុស្តិ៍នគរបាលរដ្ឋបាលទឹកថ្លា។ យោងតាមពាក្យបណ្ដឹងនេះ សមត្ថកិច្ចយើងបានស្រាវជ្រាវ និងសុំកិច្ចសហការពីម្ចាស់ផ្ទះ ហើយឆែកកាមេរ៉ាសុវត្ថិភាពមើល ក៏ឃើញពីសកម្មភាពរបស់ជនសង័្សយ បានបណ្ដើរម៉ូតូរបស់ជនរងគ្រោះ ចូលទៅក្នុងបន្ទប់របស់ពួកគេ(ជនសង័្សយ)។
ក្រោយពេលឆែកកាមេរ៉ាសុវត្ថិភាពរួចហើយ សមត្ថកិច្ចបានឃាត់ខ្លួនជនសង័្សយទាំង២នាក់ និងដកហូតនូវវត្ថុតាង នាំទៅកាន់អធិការដ្ឋាននគរបាលខណ្ឌសែនសុខ ដើម្បីសាកសួរ និងចាត់ការតាមច្បាប់៕