ភ្នំពេញៈ ស្រ្ដីមួយក្រុមបានចាញ់បោកគេ មកស៊ីឈ្នួលពពោះឲ្យជនបរទេស ក៏ត្រូវសមត្ថកិច្ចចុះទៅបង្រ្កាប និងឃាត់ខ្លួនចំនួន១៥នាក់ កាលពីថ្ងៃទី៨ ខែវិច្ឆិកា ឆ្នាំ២០១៨ នៅក្នុងទីតាំងមួយកន្លែង ស្ថិតក្នុងខណ្ឌសែនសុខ
លោក ទូច សារ៉េន នាយរងការិយាល័យនគរបាលប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជធានីភ្នំពេញ បានឲ្យដឹងថា នៅក្នុងការបង្រ្កាប និងឃាត់ខ្លួនជនសង័្សយជាប់ពាក់ព័ន្ធរបរស៊ីឈ្នួលពពោះនោះ មានការចូលរួមពីសមត្ថកិច្ចចម្រុះ និងអាជ្ញាធរ រួមមាន អភិបាលខណ្ឌសែនសុខ និងអធិការនគរបាលខណ្ឌ។ ជាលទ្ធផល នៃប្រតិបត្ដិការនេះ សមត្ថកិច្ចបានឃាត់ខ្លួនអ្នកពាក់ព័ន្ធចំនួន១៥នាក់ ក្នុងនោះមានស្ត្រីដែលស៊ីឈ្នួលពពោះចំនួន១១នាក់ និងប្រុស២នាក់ ហើយ២នាក់ផ្សេងទៀតដែលជាចុងភៅ។
ទោះជាយ៉ាងណា លោកនាយរងការិយាល័យនគរបាលប្រឆាំងការជួញដូរមនុស្ស និងការពារអនីតិជន មិនទាន់បានបញ្ជាក់លម្ពិតពីសកម្មភាព នៃការស៊ីឈ្នួលពពោះនេះនៅឡើយ ដោយលោកគ្រាន់តែប្រាប់យ៉ាងខ្លីថា មនុស្សទាំងអស់នេះកំពុងស្ថិតក្រោមការសួរនាំរបស់សមត្ថកិច្ចជំនាញ ដើម្បីកសាងសំណុំរឿងចាត់វិធានការតាមផ្លូវច្បាប់។
សូមបញ្ជាក់ថា ការស៊ីឈ្នួលពពោះជំនួសបែបនេះ គឺនៅក្នុងប្រទេសកម្ពុជា បានចាត់ទុកជាអំពើខុសច្បាប់ ហើយក្រសួងមហាផ្ទៃរបស់ប្រទេសកម្ពុជាក៏កំពុងតែចងក្រងច្បាប់ ដើម្បីផ្ដន្ទាទោសទៅលើអ្នកពាក់ពន្ធទៀតផង៕