សៀមរាប ៖ លោកជំទាវ លី អ៊ុំអេង ត្រូវបានសមត្ថកិច្ចចាប់ខ្លួន នៅថ្ងៃទី០៨ ខែវិច្ឆិកា ឆ្នាំ២០១៨នេះ បន្ទាប់ពីមានដីការបស់តុលាការ ពាក់ព័ន្ធនឹងការចេញសែកអត់សាច់ប្រាក់ក្នុងជំនួញដីធ្លី ។
ការចាប់ខ្លួននេះ បានធ្វើឡើងបន្ទាប់ពីលោក ងួន ណារ៉ា ប្រធានសាលាដំបូងខេត្តសៀមរាប និងជាចៅក្រមស៊ើបសួរ ចេញដីកាបង្គាប់ឱ្យចាប់ខ្លួន កាលពីថ្ងៃទី២៦ ខែតុលា ឆ្នាំ២០១៨ ក្រោមការចោទប្រកាន់ពីបទ «មិនបំពេញកាតព្វកិច្ចចំពោះឧបករណ៍ដែលអាចជួញដូរបាន» ប្រព្រឹត្តនៅក្រុងសៀមរាប ខេត្តសៀមរាប កាលពីថ្ងៃទី២៥ ខែឧសភា ឆ្នាំ២០១៨ ។
បើតាមដីការបស់តុលាការ មុនពេលចាប់ខ្លួន ចំពោះករណីនេះ គឺលោកស្រី លី អ៊ុំអេង បានគេចខ្លួនមិនទទួលខុសត្រូវ នៅពេលដែលសមត្ថកិច្ចបានទៅដល់គេហដ្ឋានរបស់លោកស្រី ។
សូមបញ្ជាក់ថា នាពេលកន្លងទៅ មានប្រជាពលរដ្ឋចំនួន៨គ្រួសារ បានចោទលោកស្រី លី អ៊ុំអេង ថារំលោភយកដីរបស់ពួកគាត់ប្រមាណជាង ១០ហិកតា នៅភូមិចុងកៅស៊ូ សង្កាត់ស្លក្រាម ក្រុង និងខេត្តសៀមរាប ។
តំណាងប្រជាពលរដ្ឋម្នាក់ ដែលស្កាត់ពីខេត្តសៀមរាប បានរៀបរាប់ថា ដីទំនាស់ខាងលើនេះ មានទំហំជាង១០ហិកតា ដែលគ្រប់គ្រងដោយពួកគាត់ ៨គ្រួសារ ខ្លះមាន១ហិកតា ខ្លះជាង១ហិកតា គឺពួកគាត់ទិញ និងមានធ្វើចុងសន្លឹកបញ្ជាក់ ដោយមន្ត្រីអាជ្ញាធរកាន់កាប់ត្រឹមត្រូវតាមច្បាប់ តាំងពីឆ្នាំ១៩៩៥មកម្ល៉េះ ។ លុះក្រោយមកទីតាំងដីខាងលើនេះ ត្រូវបានកំណត់ទៅជាដីតំបន់បុរីសណ្ឋាគារវប្បធម៌ និងទេសចរណ៏ស្ថិតក្រោមការគ្រប់គ្រងរបស់អាជ្ញាធរអប្បរា ។
កាលណោះ ខាងអាជ្ញាធរអប្បរា បានជូនដំណឹងអោយប្រជាពលរដ្ឋ ដែលជាម្ចាស់ដីមានឯកសារកាន់កាប់ត្រឹមត្រូវ ទៅដាក់ពាក្យបណ្ដឹងដើម្បី ធ្វើការដោះស្រាយ និងទទួលយកគោលនយោបាយផងដែរ ហើយពួកគាត់ក៏បានទៅដាក់ពាក្យបណ្ដឹងតាមរយៈឯកសារកាន់កាប់ និងសាក្សីដឹងឮគ្រប់ៗគ្នា ។ ក្នុងនោះ អ្នកខ្លះក៏ទទួលយកប្រាក់គោលនយោបាយ អ្នកខ្លះក៏មិនព្រមទទួលយក ព្រោះតែសំណងតិចពេក ហើយពួកគាត់ក៏នៅបន្តប្ដឹងទាមទារគ្រប់គ្រងដី និងរកដំណោះស្រាយតាមផ្លូវច្បាប់រហូតមក ។
លុះនៅថ្ងៃទី២៥ ខែកក្កដា ឆ្នាំ២០១៦ រាជរដ្ឋាភិបាលបានចេញអនុក្រឹត្យលេខ១៥៨ អនក្រ.បក ធ្វើប្រទានកម្ម នូវដីក្នុងតំបន់បុរីសណ្ឋាគារ វប្បធម៌ និងទេសចរណ៏ ដែលមិនទាន់ទទួលបានការដោះស្រាយ គោលនយោបាយពីអាជ្ញាធរអប្បរា ត្រូវប្រគល់ជូនប្រជាពលរដ្ឋវិញ ។
ប៉ុន្តែពេលដែលពួកគាត់យកឯកសារផ្លូវច្បាប់ ដើម្បីទៅដាក់ពាក្យសុំប័ណ្ណកម្មសិទ្ធិ ស្រាប់តែលេចមុខជំទាវ លី អ៊ុំអេង ចេញមុខមកអះអាងថា ដីខាងលើនេះ គឺជាដីរបស់លោកជំទាវទៅវិញ ដោយសំអាងថា លោកជំទាវមានលិខិតកាន់កាប់ (ចុងសន្លឹក)តាំងពីឆ្នាំ១៩៩៤មកម្ល៉េះ ។ ប៉ុន្តែតាមការពិនិត្យទៅលើចុងសន្លឹកដែលលោក ជំទាវ លី អ៊ុំអេង មាន គឺឯកសារខ្លះមានការកោសលប់ មានភាពមិនប្រក្រតី ហើយការប្ដឹងផ្ដល់គ្នាក៏កើតមានរហូតមក រហូតចុងក្រោយមន្ត្រីអជ្ញាធរជំនាញបានសម្រេច ចេញប័ណ្ណកម្មសិទ្ធិប្រគល់ដីខាងលើទៅអោយលោកជំទាវ លី អ៊ុំអេង អត្តនោម័តដោយគ្មានការឯកភាព ពីភាគីអាជ្ញាធរអប្បរាដែលជាសហប្រធាននោះឡើយ ។
មិនតែប៉ុណ្ណោះ ការចេញប័ណ្ណកម្មសិទ្ធិនូវដីជម្លោះ រួមជាមួយដីផ្សេងៗទៀតនៅក្បែរនោះ ទៅអោយលោកជំទាវ លី អ៊ុំអេង ក៏ជាន់ទៅលើដីរបស់អាជ្ញាធរអប្បរាជាង៣ហិកតាផងដែរ ។
ថ្មីៗនេះ ខណៈលោកជំទាវ លី អ៊ុំអេង ធ្វើការឈូសឆាយចាក់ដី លើកផ្លូវដើម្បីពុះឡូត៌ដីទំនាស់លក់ ក៏ត្រូវបានខាងអាជ្ញាធរអប្បរាសហការ ជាមួយអាជ្ញាធរមូលដ្ឋាន ចុះទៅហាមឃាត់ និងកាយផ្ដាច់ផ្លូវនៅក្នុងដីឡូត៌ទំនាស់ ព្រោះរំលោភចូលដីអប្បរា ស្រាប់តែលោកជំទាវចោទប្រកាន់ថា អាជ្ញាធរថា កាយផ្ដាច់ផ្លូវមិនអោយប្រជាពលរដ្ឋ ធ្វើដំណើរទៅវិញ ។
នេះពាក់ព័ន្ធវិវាទដីជាមួយរដ្ឋផង លោកជំទាវហ៊ានចោទប្រកាន់បំភ័ន្ត ទៅលើអាជ្ញាធរបែបនេះទៅហើយ ចុះទំរាំជាមួយប្រជាពលរដ្ឋស្លូតត្រង់ទៀត តើវាយ៉ាងណាទៅវិញ ?
សូមជម្រាបថា ខាងលើពាក់ព័ន្ធការអះអាងពីតំណាងភាគីប្រជាពលរដ្ឋទាំង៩គ្រួសារ ប្រាប់ទៅខាងអង្គភាពព័ត៌មាន Fresh News កាលពីរសៀលថ្ងៃទី២៣ ខែមករា ឆ្នាំ២០១៨ កន្លងមក៕
