រាជធានីភ្នំពេញ ៖ ដោយមានការចាត់តាំងពីបញ្ជាការដ្ឋានកងរាជអាវុធហត្ថលើផ្ទៃប្រទេស នាយអាវុធហត្ថចំនួន៤រូប នៃកងរាជអាវុធហត្ថ រាជធានីភ្នំពេញ បានចេញទៅចូលរួមប្រកួតបាញ់ស៊ីប (Sniping) អន្តរជាតិលើកទី២ នៅប្រទេសចិន នេះបើតាមហ្វេសប៊ុកផេករបស់កងអាវុធហត្ថរាជធានីភ្នំពេញ ។
ការប្រកួតបាញ់ស៊ីបអន្តរជាតិនេះ តាមការជូនដំណឹងរបស់ក្រសួងការពារជាតិ ដែលបានប្រព្រឹត្តទៅ កាលពីថ្ងៃទី១៨ ដល់ថ្ងៃទី២២ ខែតុលា ឆ្នាំ២០១៨ ។ គឺរៀបចំឡើងដោយកងកម្លាំងប៉ូលិសប្រដាប់អាវុធប្រជាជនចិន (PAP) និងមានក្រុមអ្នកប្រយុទ្ធជាង ១០០នាក់មកពីប្រទេសចំនួន២១ បានចូលរួម ក្នុងនោះរួមមានប្រទេសចិន, កម្ពុជា, ឈីលី, បេឡារុស្ស, កាហ្សាក់ស្ថាន, គុយវ៉េត, កៀហ្សីស្ថាន, ថៃ, សាធារណៈរដ្ឋអាហ្វ្រិកកណ្តាល, តាជីគីស្ថាន, ប៉ាគីស្ថាន, ហ្វីលីពីន, ស្រីលង្កា, អេស្ប៉ាញ, អ៊ូសបេគីស្ថាន, ហូល្លង់, ម៉ាសេដូន, ជីប៊ូទី, ហុងគ្រី, អ៊ីស្រាអែល, និងវៀតណាម ។
ការប្រកួតប្រជែងនេះ មានគោលបំណងបង្កើតវេទិកាមួយ ដែលអាចឱ្យកងកម្លាំងប្រដាប់អាវុធមកពីបណ្តាប្រទេសផ្សេងៗ ធ្វើតេស្តសមត្ថភាព ក្នុងការវិនិច្ឆ័យគោលដៅយ៉ាងលឿន,ត្រឹមត្រូវ និងបាញ់ច្បាស់ ហើយអ្នកប្រយុទ្ធម្នាក់ៗ អាចរៀនសូត្រ ពីគ្នាទៅវិញទៅមក មានការរីកចម្រើនរួមគ្នា ពង្រឹងចំណងមិត្តភាព និងផ្លាស់ប្តូរទស្សនៈជាមួយសមភាគីមកពីជុំវិញពិភពលោក ។
ការប្រកួតប្រជែងនេះផងដែរ គឺផ្តោតលើលក្ខណៈនៃប្រតិបត្តិការប្រឆាំងភេរវកម្ម ដែលមានចំនួនដប់ពីរព្រឹត្តិការណ៍ ក្នុងការវាយលុកលុយនិងការបាញ់កាំភ្លើងជាក់ស្តែងនៅលើសមរភូមិសិប្បនិម្មិត នៅភ្នំយ៉ន់ហានក្បែរទីក្រុងប៉េកាំង វិញ្ញាសារទាំង១២ព្រឹត្តិការណ៍ រួមមាន ៖
– បាញ់ទម្លាក់កាំបិត ក្នុងរយៈចម្ងាយ ៥០ម៉ែត្រ ទៅ ៨០ម៉ែត្រ
– បាញ់៤កាយវិកា ក្នុងរយៈចម្ងាយ ១០០ម៉ែត្រ ទៅ ១៥០ម៉ែត្រ
– បាញ់ស៊ើបការ ក្នុងរយៈចម្ងាយ ១២០ម៉ែត្រ ទៅ ១៥០ម៉ែត្រ
– បាញ់បន្លំសម្លេង ក្នុងរយៈចម្ងាយ ១៥០ម៉ែត្រ ទៅ ១៨០ម៉ែត្រ
– ក្លែងភេទឆ្មក់បាញ់ ក្នុងរយៈចម្ងាយ ១៦០ម៉ែត្រ ទៅ ២២០ម៉ែត្រ
– ក្លែងភេទបាញ់ តទល់ ក្នុងរយៈចម្ងាយ ១៨០ម៉ែត្រ ទៅ ២៤០ម៉ែត្រ
– បាញ់គោលដៅសំខាន់ៗ ក្នុងរយៈចម្ងាយ ៣០០ម៉ែត្រ ទៅ ៧០០ម៉ែត្រ
– បាញ់រំដោះចំណាប់ខ្មាំង ក្នុងរយៈចម្ងាយ ២៧០ម៉ែត្រ ទៅ ៣៣០ម៉ែត្រ
– បាញ់ចម្ងាយឆ្ងាយ ក្នុងរយៈចម្ងាយ ៦០០ម៉ែត្រ ទៅ ៧០០ម៉ែត្រ
– ស្វែងរកបាញ់ចម្ងាយឆ្ងាយ ក្នុងរយៈចម្ងាយ ៣០០ម៉ែត្រ ទៅ ៨០០ម៉ែត្រ
– បាញ់ប្រយុទ្ធទ្រង់ទ្រាយធំ ឡើងចុះភ្នំចម្ងាយ២៣០០ម៉ែត្រ
– បាញ់បិទសាម៉ែលចម្ងាយ ៨០ម៉ែត្រ ទៅ ១៥០ម៉ែត្រ ។
បន្ទាប់ពីបានត្រឡប់មកពីប្រទេសចិនវិញ ក្នុងដើមខែវិច្ឆិការនេះ អាវុធហត្ថរាជធានីភ្នំពេញទាំង០៤រូប ដែលទៅចូលរួមប្រកួត គឺមាន០២រូបទទួលបានវិញ្ញាប័ណ្ណបត្រ Sharp Blade-2018 International Sniping Competion នៃពានរង្វាន់ Special Contribution Award និងពានរង្វាន់ United Striving Award ផងដែរ ៕
