ខេត្តកំពង់ស្ពឺ៖ បុរសតិរច្ឆានម្នាក់គ្រាន់តែបាត់ប្រពន្ធរបស់ខ្លួន ក៏ចោទនាងលួចស្នេហាជាមួយនឹងមេការ ហើយដកកូនកាំបិតចាប់នាងអារកនៅនឹងមុខអ្នករួមការងារ បង្កឲ្យភ្ញាក់ផ្អើលឡើង កាលពីវេលាម៉ោង៧ និង៥៣នាទីព្រឹក ថ្ងៃទី៦ វិច្ឆិកា ឆ្នាំ២០១៨ នៅក្នុងការដ្ឋានសាងសង់សំណង់អគារមួយកន្លែង ស្ថិតក្នុងភូមិទួលគ សង្កាត់ស្វាយក្រវាន់ ក្រុងច្បារមន។
មន្រ្ដីនគរបាលក្រុងច្បារមន បានឲ្យដឹងថា ជនសង័្សយជាប្ដីឈ្មោះ សំ ភ័ណ្ឌ អាយុ៣១ឆ្នាំ មានស្រុកកំណើតនៅភូមិត្រពាំងខ្យង ឃុំបាកាន ស្រុកបាកាន ខេត្តពោធិ៍សាត់។ រីឯជនរងគ្រោះជាប្រពន្ធឈ្មោះ ស្រី នី អាយុ៣២ឆ្នាំ មានស្រុកកំណើតនៅស្រុកកែវសីមា ខេត្តមណ្ឌលគីរី។ ប៉ុន្តែពួកគេទាំង២នាក់ប្ដីប្រពន្ធបានមកធ្វើជាកម្មករសំណង់ និងស្នាក់នៅក្នុងការដ្ឋានខាងលើ។
មន្ត្រីនគរបាលដដែល បានបន្ដថា កាលពីក្បាលព្រលប់ ថ្ងៃទី៥ ខែវិច្ឆិកា ជនរងគ្រោះបានដើរទៅណាបាត់ ដោយមិនបានប្រាប់ដំណឹងដល់បុរសរបស់នាង។ ដោយសារតែបញ្ហាហ្នឹង ធ្វើឲ្យជនសង័្សយកើតរឿងប្រចណ្ឌប្រពន្ធរបស់ខ្លួន ហើយគេសួរនាំទៅប្រពន្ធ តែនាងបានឆ្លើយថា ទៅផ្សារ។ នៅពេលនោះ ពួកគេបានឈ្លោះប្រកែកគ្នាមួយប្រាវ ក៏ស្ងាត់ទៅវិញទៅ។
មន្ត្រីនគរបាលដដែល បានបន្ដថា រហូតមកដល់វេលាកើតហេតុ ពួកគេទាំង២នាក់ប្ដីប្រពន្ធបានឈ្លោះប្រកែកគ្នាម្ដងទៀត ស្រាប់តែបុរសជាប្ដីបានផ្ទុះកំហឹងយ៉ាងខ្លាំង ទាញកូនកាំបិតចិតបន្លែ ស្ទុះទៅចាប់ប្រពន្ធអារក នៅនឹងមុខអ្នករួមការងារ បណ្ដាលឲ្យរងរបួស។ ឃើញហេតុការណ៍បែបនេះ មិត្តរួមការងារជាមួយបានជួយអន្តរាគមន៍ចាប់បំបែក និងបញ្ជូនជនរងគ្រោះទៅសង្រ្គោះ នៅក្នុងមន្ទីរពេទ្យបង្អែកខេត្តកំពង់ស្ពឺ។
សមត្ថកិច្ចដដែល បានបន្ដថា បន្ទាប់ពីកើតហេតុភ្លាម សមត្ថកិច្ចបានចុះទៅឃាត់ខ្លួនជនសង័្សយនាំមកសាកសួរ ទើបគេសារភាពថា មូលហេតុដែលខ្លួនយកកាំបិតមកអារកប្រពន្ធ គឺដោយសារតែគេសង្ស័យថា ប្រពន្ធខ្លួនលួចមានទំនាក់ទំនងស្នេហាជាមួយជាងសំណង់ម្នាក់ នៅការដ្ឋាននេះ។
ក្រោយពេលសាកសួររួច សមត្ថកិច្ចជំនាញ នៃអធិការដ្ឋាននគរបាលក្រុងច្បារមន បានបញ្ជូនជនសង័្សយទៅកាន់ស្នងការដ្ឋាននគរបាលខេត្តកំពង់ស្ពឺ នៅព្រឹក ថ្ងៃទី៧ ខែវិច្ឆិកា ឆ្នាំ២០១៨នេះ ដើម្បីចោទប្រកាន់តាមផ្លូវច្បាប់។ ដោយឡែក ជនរងគ្រោះ បន្ទាប់ពីក្រុមគ្រូពេទ្យជួយសង្គ្រោះរួចមក រហូតមកដល់ពេលនេះ គាត់មានសភាពធូរស្រាលហើយ៕
