ខេត្តប៉ៃលិនៈ រថយន្តក្រឡុកស៊ីម៉ងត៍មួយគ្រឿង កំពុងបើកបរសុខៗ ស្រាប់តែដាច់ហ្វ្រាំង ជ្រុលចង្កូតទៅបុករះតូបលក់ដូរ កិនម៉ូតូ និងរថយន្ដ បង្កឲ្យភ្ញាក់ផ្អើលឡើង កាលពីវេលាម៉ោង១១ និង៣០នាទីព្រឹក ថ្ងៃទី៥ ខែវិច្ឆិកា ឆ្នាំ២០១៨ នៅក្បែរផ្សារសាមគ្គី ស្ថិតក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតមាននូវគ្រោះថ្នាក់ចរាចរណ៍នោះ គេឃើញរថយន្ដក្រឡុកស៊ីម៉ងត៍មួយគ្រឿង បានបើកបរក្នុងល្បឿនមធ្យម។ លុះពេលរថយន្តបើកមកដល់ចំណុចកើតហេតុ មិនដឹងជាយ៉ាងម៉េច ស្រាប់តែរេចង្កូតទៅបុករះតូបលក់ដូរ ម៉ូតូ និងរថយន្ដរបស់ប្រជាពលរដ្ឋ ធ្វើឲ្យម្ចាស់ និងអ្នកដំណើររត់គេច ចេញពីរថយន្ដបង្ក ទាំងបាតជើងសព្រាត។ ឃើញហេតុការណ៍បែបនេះ អ្នកបើកបរបានបើកទ្វាររថយន្ដលោតចុះ រត់គេចខ្លួនបាត់ស្រមោល។ ទោះជាយ៉ាងណា នៅក្នុងហេតុការណ៍នោះ ចាត់ទុកថា សំណាងហើយដែលមិនបានបង្កឲ្យមានគ្រោះថ្នាក់ដល់មនុស្ស។
មន្ត្រីនគរបាលចរាចរក្រុងប៉ៃលិន បានឲ្យដឹងថា រថយន្ដបង្ក ម៉ាក FUSO ពណ៌ខៀវ ពាក់ស្លាកលេខ បាត់ដំបង 5A-0032 មិនស្គាល់អត្ដសញ្ញាណរបស់អ្នកបើកបរ ពីព្រោះគេបានរត់គេចខ្លួនបាត់ស្រមោល។ នៅក្នុងហេតុការណ៍គ្រោះថ្នាក់ចរាចរណ៍នោះ បានបណ្ដាលឲ្យខូចខាតរថយន្តចំនួន១គ្រឿង ម៉ូតូចំនួន ០៩គ្រឿង (ធ្ងន់៤គ្រឿង និងស្រាល៥គ្រឿង) និងតូបលក់ដូរចំនួន៣ខ្នង ហើយនិងសម្ភារមួយចំនួនទៀត។
ក្រោយពេលកើតហេតុ សមត្ថកិច្ចបានយករថយន្ដបង្ក និងវត្ថុតាងពាក់ព័ន្ធទៅរក្សាទុក នៅក្នុងអធិការដ្ឋាននគរបាលក្រុងប៉ៃលិន ដើម្បីរង់ចាំដោះស្រាយតាមច្បាប់៕