ភ្នំពេញៈ ធនាគារជាតិ នៃកម្ពុជា (NBC) គាំទ្រឲ្យមានការទូទាត់ប្រាក់យន់របស់ចិន និងប្រាក់រៀលកម្ពុជា នៅក្នុងប្រព័ន្ធធនាគាររបស់ប្រទេសកម្ពុជា សម្រាប់ការដោះដូរទំនិញរបស់ពាណិជ្ជករ នៃប្រទេសទាំងពីរ តែមិនមានជាការចាយវាយសាច់ប្រាក់យន់ នៅក្នុងប្រទេសកម្ពុជានោះឡើយ។
ធនាគារជាតិ នៃកម្ពុជា បានរៀបចំសន្និសីទកាសែតមួយ នៅថ្ងៃទី៣០ ខែតុលា ឆ្នាំ២០១៨ នៅក្នុងបំណងពន្យល់ដល់សាធារណជនឲ្យចៀសវាងការយល់ថា ស្ថាប័នរបស់ខ្លួនគាំទ្រឲ្យមានការចរាចរសាច់ប្រាក់យន់ នៅក្នុងកម្ពុជា។
លោកស្រី ជា សិរី អគ្គនាយកបច្ចេកទេស នៃធនាគារជាតិ បានលើកឡើងថា ធនាគារជាតិគាំទ្រឲ្យមានការទូទាត់ទៅវិញទៅមក រវាងប្រាក់យន់ និងប្រាក់រៀលរបស់ពាណិជ្ជករ នៃប្រទេសទាំងពីរ ជាជាងការពឹងផ្អែកតែទៅលើដុល្លាររបស់សហរដ្ឋអាមេរិក។
លោកស្រី បានបន្ដថា «យើងចង់ឲ្យពាណិជ្ជករកម្ពុជាទូទាត់ឲ្យចិនជាប្រាក់យន់ ហើយយើងចង់ឲ្យចិនទូទាត់ឲ្យពាណិជ្ជកររបស់យើងវិញជាប្រាក់រៀល។ នេះជាជាយុទ្ធសាស្ត្រវែងឆ្ងាយ ដែលយើងកំពុងដើរតាមកន្លងនិន្នាការអន្តរជាតិ។ ម្យ៉ាងទៀត នៅពេលនេះយើងកំពុងតែជំរុញឲ្យមានការប្រើប្រាស់ប្រាក់រៀលដោយប្រយោលផងដែរ»។
លោកស្រី បានបន្ដថា មិនមែនតែចិននោះទេ កម្ពុជាចង់ទូទាត់ផ្ទាល់ រវាងរូបិយប័ណ្ណទ្វេភាគីជាមួយប្រទេសផ្សេងៗទៀត នៅក្នុងតំបន់ ដោយមិនចាំបាច់ទូទាត់ជាលុយដុល្លាររបស់អាមេរិកនោះឡើយ ហើយ កិច្ចសហការនេះ យើងមិនចង់ធ្វើតែជាមួយចិននោះទេ។ បច្ចុប្បន្នក្នុងតំបន់អាស៊ាន គឺគេចង់ទូទាត់ជារូបិយប័ណ្ណជាតិរៀងៗខ្លួនជាមួយប្រទេសក្នុងតំបន់ ដោយប្រទេសទាំងនេះមិនចង់ពឹងផ្អែកខ្លាំងទៅលើប្រាក់ដុល្លារអាមេរិកនោះទេ។ បើពឹងផ្អែកតែលុយដុល្លារអាមេរិកច្រើន ដូចសព្វថ្ងៃនេះ នៅពេលលុយអាមេរិកមានបញ្ហា យើងនឹងរងនូវផលប៉ះពាល់។
លោកស្រី បានបន្ដថា ទោះជាយ៉ាងណាក៏ដោយ នៅពេលនេះ ធនាគារជាតិ នៃកម្ពុជា មិនបានគាំទ្រឲ្យចាយក្រដាសប្រាក់យន់ នៅក្នុងប្រទេសកម្ពុជានោះឡើយ។ នេះមិនមែនបានន័យថា ឲ្យចិនដឹកលុយយន់យកមកប្រើប្រាស់ នៅក្នុងប្រទេសកម្ពុជានោះទេ យើងអត់ចង់បានករណីប្រាក់ដុល្លារអាមេរិក ដូចសព្វថ្ងៃនេះទេ។ តាមពិតទៅ អ្វីដែលយើងធ្វើនេះ គឺតែលុយក្នុងប្រព័ន្ធធនាគារប៉ុណ្ណោះ គឺមានតែតួលេខទេ។ ឧទាហរណ៍ពាណិជ្ជករកម្ពុជានាំឥដ្ឋការ៉ូពីចិន ដូច្នេះត្រូវយកលុយរៀល ឬដុល្លាររបស់ខ្លួន ដូរយកលុយយន់ ក្នុងប្រព័ន្ធធនាគារ ហើយទូទាត់ឲ្យភាគីចិន។
លោកស្រី បានបន្ដថា ដោយឡែកភាគីចិនវិញ បើទិញអង្ករពីពាណិជ្ជករកម្ពុជា ដែលពីមុនទូទាត់ជាប្រាក់ដុល្លារ បានន័យថា ចិនត្រូវដូរលុយយន់មកដុល្លារ ហើយឲ្យមកពាណិជ្ជករយើង។ ប៉ុន្តែអ្វីដែលយើងចង់ជំរុញ គឺចង់ឲ្យអាជីវករចិន យកលុយយន់របស់ខ្លួន មកដូរយកលុយរៀល ហើយទូទាត់ជាមួយនឹងអាជីវករខ្មែរយើង។
ទោះជាយ៉ាងណាលោកស្រី បានបញ្ជាក់ថា កម្ពុជា ជាប្រទេសសេរី គឺយើងអត់បិទមូលធនទេ ទាំងចេញ ទាំងចូលក្នុងប្រទេស ហើយលុយដែលប្រើប្រាស់កន្លងមក ក៏យើងអត់មានការហាមឃាត់ដែរ។ ប៉ុន្តែយើងចង់ឲ្យពលរដ្ឋយើងទុកចិត្តនឹងប្រាក់រៀល ពេលនោះពួកគាត់នឹងយកតែលុយរៀល។
បើតាមតួលេខបានបង្ហាញថា ការទូទាត់ប្រាក់យន់ ក្នុងការជួញដូរធំៗ មានការកើនឡើង។ នៅក្នុងឆ្នាំ២០១៧ កម្ពុជាបាននាំចូលទំនិញពីចិន មានចំនួនទឹកប្រាក់៥,២ពាន់លានដុល្លារអាមេរិក ក្នុងនោះកម្ពុជាទូទាត់ជាប្រាក់យន់ឲ្យចិន ដែលគិតជាដុល្លារស្មើ១៣០លានដុល្លារ។ ដោយឡែកកម្ពុជាបាននាំចេញទៅចិញវិញ មានទឹកប្រាក់ចំនួន៧៥៣លានដុល្លារ ហើយទូទាត់ជាប្រាក់យន់មកវិញ មានប្រមាណ៩ភាគរយ៕