ភ្នំពេញ ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃកម្ពុជា ចេញសេចក្តីសម្រេចមួយស្តីពី ការបង្កើតក្រុមការងារចម្រុះ ទទួល និង ដោះស្រាយ បណ្តឹងតវ៉ាផ្សេងៗ នៅមុខភូមិគ្រឹះសម្តេចតេជោហ៊ុន សែន និង សម្តេចកិត្តិព្រឹទ្ធបណ្ឌិតប៊ុន រ៉ានី ។
សេចក្តីសម្រេចចុះថ្ងៃទី១៦ ខែតុលា ឆ្នាំ២០១៨ បានបង្ហាញថា ក្រុមការងារចម្រុះនេះ គឺមាននាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទ និងជានាយករងខុទ្ទកាល័យសម្តេចតេជោ ជាប្រធាន អនុប្រធាន៣រូប និងមានសមាជិក១៨រូបទៀត ។
ក្រុមការងារចម្រុះនេះ មានភារកិច្ច ៖
ទទួលពាក្យបណ្ដឹងតវ៉ាផ្សេងៗ នៅមុខភូមិគ្រឹះសម្តេចតេជោហ៊ុន សែន និង សម្តេចកិត្តិព្រឹទ្ធបណ្ឌិតប៊ុន រ៉ានី នៅវិមានឯករាជ្យ រាជធានីភ្នំពេញ និងតាខ្មៅ ខេត្តកណ្ដាល រួចបញ្ជូនទៅជំនាញពាក់ព័ន្ធ ដើម្បីពិនិត្យសម្រេច ឬធ្វើរបាយការណ៍ ជូនសម្តេចតេជោហ៊ុន សែន ។
សហការជាមួយអាជ្ញាធរ មានសមត្ថភាពពាក់ព័ន្ធទាំងអស់ ទប់ស្កាត់ក្រុមតវ៉ាមានបាតុករច្រើននាក់ ដែលមានបំណងមកដាក់ពាក្យបណ្ដឹងតវ៉ាផ្សេងៗ ជូនសម្តេចតេជោ និងសម្តេចកិត្តិព្រឹទ្ធបណ្ឌិត ។
ព្យាយាមពន្យល់នីតិវិធី ជូនក្រុមអ្នកតវ៉ា ឱ្យយល់ពីភារកិច្ចរបស់ក្រុមការងារចម្រុះ និង ច្បាប់ជាធរមានផ្សេងៗ ។
ទប់ស្កាត់រាល់ការញុះញង់ពីក្រុមឆ្លៀតឱកាស ដែលកេងចំណេញមកលើក្រុមអ្នកតវ៉ា ។
អនុប្រធាន និង សមាជិក ក្រុមការងារចម្រុះ ត្រូវចូលរួមប្រជុំតាមការកោះអញ្ជើញរបស់ប្រធានក្រុមការងារ ។
ការបង្កើតក្រុមការងារនេះ ត្រូវបានគេមើលឃើញថា រាល់ពេលប្រជាពលរដ្ឋ យល់ថា ស្ថាប័នឬក្រសួងមួយចំនួន មិនអាចស្វែងរកយុត្តិធម៌បាន, ពួកគេតែងតែប្រមូលផ្តុំ ឬហែរក្បួនស្នើសុំអន្តរាគមន៍ពីសម្តេចតេជោ ជានិច្ច ៕