ភ្នំពេញ ៖ បុរសម្នាក់ស្រវឹងស្រាជោគជាំ បើករថយន្តឡុចស៊ីស LS460L មួយគ្រឿង ជ្រុលទៅបុករថយន្តមួយគ្រឿងទៀត ដែលម្ចាស់ចតស្ងៀម រួចបើករត់ត្រូវកម្លាំងសមត្ថកិច្ចដេញចាប់បាន ហើយរកវាយសមត្ថកិច្ច និងលោតមកវាយអ្នកសារព័ត៌មានថែមទៀត តែមិនបង្កឲ្យមានរងរបួសស្នាម ។
ហេតុការណ៍បានកើតឡើងកាលពីម៉ោង១១យប់ ថ្ងៃទី១៧ ខែតុលា ឆ្នាំ២០១៨ នៅចំណុចផ្លូវ១៩២៨ តាមបណ្តោយផ្លូវសម្តេចជាស៊ីម ក្នុងសង្កាត់គោកឃ្លាំង ខណ្ឌសែនសុខ រាជធានីភ្នំពេញ ។
តាមសម្តីម្ចាស់រថយន្តរងគ្រោះបានឲ្យដឹងថា រូបគាត់បានបើករថយន្តមួយគ្រឿងម៉ាក HILUX REVO ពណ៌ស ពាក់ស្លាកលេខ ភ្នំពេញ2A W6748 មកឈប់នៅចំណុចកើតហេតុ ស្រាប់តែមានរថយន្តមួយគ្រឿង ម៉ាកលុច្សស៊ីស LS 460L ពណ៌ទឹកប្រាក់ គ្មានស្លាកលេខ បើកបរដោយបុរសម្នាក់ស្រវឹងស្រាធ្លាក់ភ្នែក មកបុកពីក្រោយ ចំកាងខាងក្រោយផ្នែកខាងស្តាំ បណ្តាលឲ្យកំពិតតិចតួច ។
ម្ចាស់រថយន្តរងគ្រោះ បន្តថា មិនដឹងជាគាត់ជាកូនអ្នកណាទេ ប្រហែលជាមានអំណាចខ្លាំងហើយមើលទៅ គ្រាន់តែបើករថយន្តប៉ះរថយន្តខូចខាតបន្តិចបន្តួចសោះ មិនព្រមឈប់ដោះស្រាយ បើករថយន្តគេចពីកន្លែងកើតហេតុ ។
ខណៈនោះ សមត្ថកិច្ចឃើញ ក៏ជិះម៉ូតូដេញតាម រហូតឃាត់បានទាំងរថយន្ត និងអ្នកបើកបរ ស្រាប់តែម្ចាស់រថយន្តបង្កចេញពីរថយន្តមកបានស្រែកឡូឡាឆោឡោលផ្អើលអស់អ្នកជិតខាង និងលោតមកធាក់អ្នកសាព័ត៌មានដែលកំពុងថត និងសម្លុតហើយគំរាមរករឿងសមត្ថកិច្ចទៀតផង ។
ក្រោយកើតហេតុម្ចាស់រថយន្តត្រូវបានកម្លាំងសមត្ថកិច្ចជំនាញចាប់ដាក់ក្នុងរថយន្តនិងបញ្ជូនមកអធិការដ្ឋាននគរបាលខណ្ឌសែនសុខដើម្បីធ្វើការដោះស្រាយគ្នាទៅតាមផ្លូវច្បាប់៕