ភ្នំពេញៈ នារីវ័យក្មេងម្នាក់តូចចិត្តនឹងម្ដាយ មិនទិញចិញ្ចៀនពេជ្រ និងទូរស័ព្ទស៊េរីទំនើបឲ្យសមតាមបំណងរបស់ខ្លួន បែរជាគិតខ្លីជិះម៉ូតូស៊េរីទំនើប មកលោតទឹកសម្លាប់ខ្លួន បង្កឲ្យភ្ញាក់ផ្អើលឡើង កាលពីវេលាម៉ោង១១ និង៣០នាទីព្រឹក ថ្ងៃទី១៦ ខែតុលា ឆ្នាំ២០១៨ នៅលើស្ពានលីយ៉ុងផាត់ ស្ថិតក្នុងភូមិកណ្តាល សង្កាត់ព្រែកព្នៅ ខណ្ឌព្រែកព្នៅ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញនារីវ័យក្មងម្នាក់ មិនស្គាល់ឈ្មោះ បានជិះម៉ូតូមួយគឿង ម៉ាក Zoomer-X ពណ៌ក្រហមលាយស ពាក់ស្លាកលេខ ភ្នំពេញ 1HA-2732 មកឈប់ពីលើស្ពានលីយ៉ុងផាត់។ ស្របពេលអ្នកដំណើរមិនបានចាប់អារម្មណ៍ ស្រាប់តែនារីម្នាក់នោះ បានលោតពីលើស្ពានចុះទៅក្នុងទឹកលិចបាត់ ទើបបង្កឲ្យមានការភ្ញាក់ផ្អើលដល់អ្នកធ្វើដំណើរចោមរោមមើល តែមិនបានឃើញនារីរងគ្រោះនោះទេ។
មន្រ្ដីនគរបាលខណ្ឌព្រែកព្នៅ បានឲ្យដឹងថា នារីដែលគិតខ្លីលោតទឹកសម្លាប់ខ្លួននោះ សមត្ថកិច្ចបានស្គាល់អត្តសញ្ញាណហើយ គឹនាងឈ្មោះ សែ ពុធារី អាយុ២៤ឆ្នាំ ស្នាក់នៅភូមិកៀនឃ្លាំង សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។
បើតាមសម្ដីសាច់ញាតិរបស់ជនរងគ្រោះ បានឲ្យដឹងថា មុនពេលកើតមាននូវគ្រោះអកុសលបែបនេះ នារីរងគ្រោះបានសុំឪពុកម្ដាយរបស់នាងទិញទូរស័ព្ទស៊េរីទំនើប និងចិញ្ចៀនពេជ្រ។ ប៉ុន្តែការទាមទាររបស់នាងមិនបានសម្រេចដូចបំណង ទើបធ្វើឲ្យនាងកើតទុក្ខ និងមួម៉ៅនៅក្នុងចិត្ត។ លុះមកដល់ថ្ងៃកើតហេតុ នារីរងគ្រោះប្រាប់ឪពុកម្ដាយរបស់នាងថា មកលេងផ្ទះបងប្អូននៅម្តុំព្រែកលាប។ ប៉ុន្តែរហូតមកដល់រសៀលថ្ងៃដដែល ស្រាប់តែមានការភ្ញាក់ផ្អើលថា មាននារីវ័យក្មេងម្នាក់លោតទឹកសម្លាប់ខ្លួនពីលើស្ពានលីយ៉ុងផាត់។
សាច់ញាតិរបស់ជនរងគ្រោះ បានបន្ដទៀតថា បន្ទាប់ពីទទួលបានដំណឹងបែបនេះភ្លាម ពួកគាត់បានប្រញាប់ប្រញាល់ទៅកាន់ទីនោះ។ បន្ទាប់មក ពួកគាត់បានរត់ទៅកាន់ប៉ុស្តិ៍នគបាលព្រែកព្នៅ ដើម្បីសួរនាំ ទើបដឹងថា នារីដែលលោតទឹកសម្លាប់ខ្លួននោះ គឺជាកូនរបស់ពួកគាត់។
ក្រោយពេលកើតហេតុ សមត្ថកិច្ច និងក្រុមគ្រួសារកំពុងតាមស្វែងរកសាកសពរបស់នារីរងគ្រោះ ដើម្បីដឹកទៅរៀបចំធ្វើបុណ្យតាមប្រពៃណី នៅឯគេដ្ឋានរបស់ជនរងគ្រោះ។ បន្ទាប់មក នគរបាលប៉ុស្តិ៍ព្រែកព្នៅបានប្រគល់ម៉ូតូរបស់ជនរងគ្រោះឲ្យទៅក្រុមគ្រួសារ យកទៅប្រើប្រាស់វិញ៕