ខេត្តមណ្ឌលគិរី ៖ យុវជនម្នាក់ដែលគេស្គាល់ថា ជាកូនប្រុសរបស់លោកអភិបាលខេត្តមណ្ឌលគិរី ត្រូវរថយន្តធុនធំ ថយក្រោយកិនបណ្តាលឱ្យរងរបួសធ្ងន់ កាលពីវេលាម៉ោង៦និង៤១នាទីព្រលប់ថ្ងៃទី១៦ តុលា ២០១៨ ។
យុវជនរងគ្រោះមានឈ្មោះអ៊ុក ដានឿន អាយុ២៥ឆ្នាំ មុខរបរមន្ត្រីសាលាក្រុងសែន មនោរម្យ ត្រូវជាកូនប្រុសរបស់លោកអភិបាលខេត្តមណ្ឌលគិរី មានលំនៅក្នុងភូមិដោះក្រមុំ សង្កាត់សុខដុម ក្រុងសែនមនោរម្យ ។
ចំណែកឯអ្នកបើកបររថយន្ត មានឈ្មោះ ទូច ភេទប្រុស អាយុ៣៨ឆ្នាំ មុខរបរបើកបររថយន្ត មានលំនៅក្នុងភូមិកណ្តាល សង្កាត់ស្ពានមានជ័យ ក្រុងសែនមនោរម្យ ក្រោយកើតហេតុបានរត់គេចខ្លួនបាត់ស្រមោល ។
បើតាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញយុវជនរងគ្រោះខាងលើ បានជិះម៉ូតូ១គ្រឿង ម៉ាក DUCITI ពណ៌ក្រហម គ្មានស្លាកលេខ ធ្វើដំណើរក្នុងទិសដៅ ពីកើតទៅលិច ក្នុងល្បឿនមធ្យម លុះមកដល់ចំណុចផ្លូវ៧៦ ទល់មុខកន្លែងលាងឡាន សុភត្ត្រា ស្ថិតក្នុងភូមិចម្ការតែ សង្កាត់ស្ពានមានជ័យ ក្រុងសែនមនោរម្យ ក៏មានរថយន្តធុនធំ១គ្រឿង ម៉ាកហ៊ីយ៉ាន់ដាយត្រៃល័រ ពណ៌លឿង ពាក់ស្លាកលេខ ត្បូងឃ្មុំ 3A-0168 កំពុងបើកថយក្រោយ ទើបធ្វើឱ្យជនរងគ្រោះមើលមិនឃើញ ក៏ជ្រុលទៅបុករថយន្តធុនធំ១គ្រឿងនោះ ចំពាក់កណ្តាលរថយន្តយ៉ាងពេញទំហឹង ធ្វើឱ្យដួលម៉ូតូ ក៏ត្រូវរថយន្តកិន ទាំងមនុស្សទាំងម៉ូតូ បណ្តាលឱ្យរងរបួសធ្ងន់តែម្តង ដោយសារតែរបួសជើងធ្ងន់ធ្ងរ យុវជនរងគ្រោះត្រូវបញ្ជូនមកសង្គ្រោះនៅមន្ទីរពេទ្យ នៅរាជធានីភ្នំពេញ ទាំងយប់ផងដែរ ៕
