ភ្នំពេញ ៖ ជនស្លៀកពាក់ស៊ីវិលមួយក្រុម មានគ្នា៧នាក់ គឺជាប៉ូលីសមន្ទីរប្រឆាំងគ្រឿងញៀនក្រសួងមហាផ្ទៃ ជាអ្នកផ្ទុះអាវុធរហូតដល់៦គ្រាប់ ដើម្បីបង្ក្រាបបទល្មើស បែរជាធ្វើឱ្យពលរដ្ឋស្លូតត្រង់២នាក់ ដួលសន្លប់ ត្រូវបញ្ជូនទៅមន្ទីរពេទ្យដើម្បីសង្គ្រោះភ្លាមៗផងដែរ ។
ហេតុការណ៍នេះបានលើតឡើងកាលពីវេលា២០និង៣០នាទី ថ្ងៃទី១៦ ខែតុលា ឆ្នាំ២០១៨ កម្លាំងនគរបាលមន្ទីរប្រឆាំងគ្រឿងញៀន ប្រហែល៧នាក់ ចុះបង្ក្រាបបទល្មើសគ្រឿងញៀន នៅចំណុចផ្ទះគ្មានលេខ ផ្លូវលេខ៣៦៩ ភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ ឃាត់ខ្លួនជនសង្ស័យ២នាក់ ស្រីម្នាក់ និងប្រុសម្នាក់ ។
តាមសម្ដីប្រជាពលរដ្ឋដែលនៅកន្លែងកើតហេតុ បានរៀបរាប់ប្រាប់ឲ្យដឹងថា នៅមុនពេលកើតហេតុ គេឃើញនារីជនជាតិវៀតណាមម្នាក់ បានដើរចូលមកក្នុងភូមិកើតហេតុខាងលើ មួយសន្ទុះក្រោយមក ស្រាប់តែមានកម្លាំងសមត្ថកិច្ចចម្រុះមួយក្រុម ស្លៀកពាក់ស៊ីវិល ពាក់មួកសុវត្ថិភាពបាំងមុខជិត មានទាំងរថយន្តមានទាំងម៉ូតូ មិនដឹងថា តាមនារីជនជាតិវៀតណាមខាងលើមកពីណាទេ ក៏ឆ្មក់ចូលមកតាមក្រោយ ចំណែកឯនារីជនជាតិវៀតណាមរូបនោះ បានរត់ឡើងផ្ទះប្រជាពលរដ្ឋ ទើបកម្លាំងសមត្ថកិច្ចចម្រុះទាំងនោះរត់ដេញតាមចាប់បានមនុស្សស្រីម្នាក់ និងយុវជនម្នាក់ទៀត ដាក់ខ្នោះជាប់គ្នា រួចបម្រុងនាំខ្លួនចេញក្រៅ ស្រាប់តែប្រជាពលរដ្ឋដែលនៅក្បែរនោះមកឃើញទាន់ ក៏ស្រែកឆោឡោឡើងបង្កការភ្ញាក់ពេញមួយភូមិ នាំគ្នារត់មករារាំងសមត្ថកិច្ចមិនអោយនាំខ្លួនចេញទៅ ដោយសារតែប្រជាពលរដ្ឋច្រើនពេក និងព្យាយាមរារាំងមិនឲ្យនាំយុវជនប្រុសស្រីទាំង២នាក់នោះចេញ ទើបសមត្ថកិច្ចបាញ់ឡើងលើ៣គ្រាប់ ដើម្បីគំរាមប្រជាពលរដ្ឋ តែនៅមិនអាចបំបែកបាន ទើបសមត្ថកិច្ចបន្តបាញ់ឡើងលើ៣គ្រាប់ផ្ទួនៗគ្នាទៀត ទើបបង្កឲ្យមានការភ្ញាក់ផ្អើលដល់ប្រជាពលរដ្ឋមានការភិនភ័យ នាំគ្នាស្រែកឆោឡោឡើង ធ្វើឲ្យក្មេងស្រីម្នាក់ និងស្ត្រីចំនាស់ម្នាក់សន្លប់ស្ដូកស្ដិងតែម្ដង ។ ដោយឃើញបែបនេះសមត្ថកិច្ចចម្រុះទាំងនោះ នាំគ្នាដកខ្លួនចេញពីកន្លែងកើតហេតុបាត់អស់ ដោយបន្សល់ទុកយុវជនប្រុសស្រីទាំង២នាក់ជាប់ខ្នោះនៅកន្លែង ព្រមទាំងសំបកផ្ទុះផងដែរ ។
ក្រោយពីសមត្ថកិច្ចស្លៀកពាក់ស៊ីវិលទាំងនោះចេញបាត់អស់ទៅ គេឃើញមានកម្លាំងសមត្ថកិច្ចខណ្ឌច្បារអំពៅ និងសមត្ថកិច្ចប៉ុស្តិ៍ព្រែកប្រា ព្រមទាំងកងរាជអាវុធហត្ថខណ្ឌ បានចុះមកធ្វើការសាកសួរ រួចដំណើររឿងហេតុ និងជួយទាក់ទងហៅរថយន្តសង្គ្រោះឲ្យមកដឹកអ្នកដែលសន្លប់យកទៅសង្គ្រោះនៅឯមន្ទីរពេទ្យផងដែរ ។
ពាក់ព័ន្ធក្នុងករណីផ្ទុះអាវុធខាងលើនេះ លោកនាយប៉ុស្តិ៍នគរបាលព្រែកប្រា បានប្រាប់យ៉ាងខ្លីថា លោកមិនដឹងកម្លាំងសមត្ថកិច្ចខាងណាចុះទៅបង្ក្រាប និងផ្ទុះអាវុធក្នុងភូមិសាស្ត្ររបស់លោកនោះទេ ហើយលោកក៏កំពុងតែរវល់ធ្វើស្រាវជ្រាវនូវសាច់រឿងទាំងនោះផងដែរ ។
សូមបញ្ជាក់ថា ប្រជាពលរដ្ឋរិះគន់ថា ពេលសមត្ថកិច្ចស្លៀកពាក់ស៊ីវិលបង្ក្រាបបទល្មើសបែបនេះ ធ្វើឱ្យពលរដ្ឋមិនដឹងថា ជាករណីអ្វីពិតប្រាកដនោះទេ ទើបមានការភ័ន្តច្រឡំថា ជាករណីប្លន់ ឬករណីគំនុំ អ្វីផ្សេងទៅវិញ ។
ដោយឡែក បើតាមរបាយការណ៍ពីនគរបាលខណ្ឌច្បារអំពៅ បានអោយដឹងថា កម្លាំងនគរបាលមន្ទីរប្រឆាំងគ្រឿងញៀនប្រហែល៧នាក់ ចុះបង្ក្រាបបទល្មើសគ្រឿងញៀន នៅចំណុចផ្ទះគ្មានលេខ ផ្លូវលេខ៣៦៩ ភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ ដោយឃាត់ខ្លួនជនសង្ស័យ២នាក់ ស្រីម្នាក់និងប្រុសម្នាក់ ពេលឃាត់ខ្លួនបានហើយ នគរបាលបានវាយខ្នោះ ពេលនោះត្រូវបានប្រជាពលរដ្ឋនៅភូមិនោះនាំគ្នាតវ៉ា មិនព្រមឱ្យនាំជនសង្ស័យទាំង២នាក់ទៅទេ។ពេលនោះក៏មានការប្រទាញប្រទង់គ្នា រួចសមត្ថកិច្ចបានផ្ទុះអាវុធ៥ទៅ៦គ្រាប់ ជនសង្ស័យទាំង២នាក់នាំគ្នាគេចខ្លួន រីឯសមត្ថកិច្ចបានដកកម្លាំងទៅវិញអស់ ។
ក្រោយកើតហេតុ សមត្ថកិច្ចមូលដ្ឋានចុះទៅត្រួតពិនិត្យកន្លែងកើតហេតុ រកឃើញសំបកគ្រាប់អាវុធខ្លីចំនួន៤សំបក និងខ្នោះដៃមួយគូ ដែលប្រជាពលរដ្ឋដោះចេញពីជនសង្ស័យ ៕