ខេត្តក្រចេះ៖ បុរសម្នាក់ល្មោភកាមម្នាក់ បានចាប់រំលោភកូនដើម រហូតបានសម្រេចជាបន្តបន្ទាប់ចំនួន៦លើក ទើបបែកការដឹងដល់សមត្ថកិច្ចចុះទៅឃាត់ខ្លួន បញ្ជូនទៅកាន់តុលាការ កាលពីរសៀល ថ្ងៃទី១៥ ខែតុលា ឆ្នាំ២០១៨ ។
មន្រ្ដីនគរបាលស្រុកសំបូរ បានឲ្យដឹងថា ជនសង័្សយជាប់ពាក់ព័ន្ធនឹងករណីចាប់រំលោភកូនស្រីរបស់ប្ដីដើម ហើយត្រូវសមត្ថកិច្ចឃាត់ខ្លួននោះ ឈ្មោះ ហុក ណារ៉េត ហៅតឿ អាយុ៣៣ឆ្នាំ រស់នៅភូមិស្រែស្បូវ ឃុំក្បាលដំរី ស្រុកសំបូរ ខេត្តក្រចេះ។ រីឯក្មេងស្រីរងគ្រោះ ឈ្មោះ ក ស អាយុ១២ឆ្នាំ រស់នៅក្នុងខេត្តក្រចេះ។
មន្ត្រីនគរបាលដដែល បានបន្ដថា កាលពីថ្ងៃទី១៤ ខែតុលា ឆ្នាំ២០១៨ សមត្ថកិច្ចនគរបាលជំនាញបានទទួលពាក្យបណ្ដឹងពីម្ដាយរបស់ក្មេងស្រីរងគ្រោះពីករណីប្ដីចុងរបស់គាត់ ចាប់រំលោភសេពសន្ថវៈទៅលើកូនស្រីបង្កើតរបស់គាត់។ ក្រោយពេលមានពាក្យបណ្ដឹងបែបនេះ សមត្ថកិច្ចបានចុះទៅឃាត់ខ្លួនជនសង័្សយ នាំមកសាកសួរ។
មន្រ្ដីនគរបាលដដែល បានបន្តថា នៅចំពោះមុខសមត្ថកិច្ចជនសង័្សយបានសារភាពថា មុនពេលកើតហេតុ ប្រពន្ធរបស់គេ (ម្ដាយបង្កើតរបស់ក្មេងស្រីរងគ្រោះ) បានទៅស៊ីឈ្នួលច្រូតស្រូវឲ្យអ្នកភូមិ។ ស្របពេលឃើញឱកាសល្អ គឺកូនស្រីរបស់ប្ដីដើមនៅតែ២នាក់នឹងរូបគេ ហើយគ្មានអ្នកណានៅជិតទៀង ទើបរូបគេបានចាប់នាងរំលោភសេពសន្ថវៈ រហូតបានសម្រេចជាបន្តបន្ទាប់ចំនួន៦ដង។
ជនសង័្សយ បានបន្ដថា ក្រោយពេលរំលោភក្មេងស្រីរងគ្រោះរួចហើយ រូបគេបានគំរាមវាយ និងសម្លាប់ក្មេងស្រីរងគ្រោះចោល ប្រសិនបើនាងធ្វើឲ្យបែកការ ពីរឿងអាស្រូវរបស់ខ្លួន។ ប៉ុន្តែក្មេងស្រីរងគ្រោះ នៅតែយករឿងរ៉ាវដែលបានកើតឡើងទៅប្រាប់ម្ដាយ និងអ្នកដទៃ ទើបពួកគេបាននាំគ្នាទៅដាក់ពាក្យ បណ្ដឹង សុំឲ្យសមត្ថកិច្ចជួយអន្តរាគមន៍ ស្វែងរកយុត្តិធម៌ឲ្យក្មេងស្រីរងគ្រោះ ហើយត្រូវនគរបាលស្រុកសំបូរ ចាប់ឃាត់ខ្លួន កាលពីថ្ងៃទី១៤ ខែតុលា។
ក្រោយពេលឃាត់ខ្លួនរួចមក សមត្ថកិច្ចបានចុះទៅឃាត់ខ្លួនជនសង័្សយនាំមកកាន់អធិការដ្ឋាននគរបាលស្រុក ដើម្បីសាកសួរ រួចហើយកសាងសំណុំរឿង បញ្ជូនទៅកាន់សាលាដំបូងខេត្ត ចាត់ការតាមច្បាប់៕
