ភ្នំពេញ ៖ ដើម្បីបំពេញតំរូវការកើនឡើងនៃភ្ញៀវទេសចរជាតិ និងអន្តរជាតិចេញចូលក្នុងប្រទេសកម្ពុជា អាកាសយានដ្ឋានអន្តរជាតិភ្នំពេញ បានអភិវឌ្ឍន៍រីកចម្រើនជាដំណាក់កាលៗ ក្នុងនោះបានដាក់ឲ្យប្រើប្រាស់ប្រព័ន្ធបច្ចេកវិទ្យាទំនើប សម្រាប់ចំណតថ្មី បម្រើជូនភ្ញៀវមកទទួល ក៏ដូចជាជូនដំណើរបងប្អូននៅឯអាកាសយានដ្ឋានអន្តរជាតិភ្នំពេញ ។
ព្រលានយន្តហោះអន្តរជាតិភ្នំពេញ បានដាក់អោយប្រើប្រាស់ប្រព័ន្ធចំណតយានយន្តថ្មី ដែលក្នុងនោះមានចំណតរថយន្តថ្មី ធំទូលាយ និងបំពាក់ដោយប្រព័ន្ធបច្ចេកវិទ្យាស្វ័យប្រវត្តិល្បឿន លឿនជាងបីដង សុវត្ថិភាព និងភាពបត់បែនបានងាយស្រួល និងបង្កើនច្រកចូល និងច្រកចេញ ច្រើនជាងមុន មានផ្លូវបើកបរ តាមបទដ្ឋានបច្ចេកទេស មិនធ្វើឲ្យមានការកកស្ទះ ឬយឺតយូរ ដូចពីមុនទៀតឡើយ ។ ហើយជាមួយម៉ាស៊ីនទូទាត់ប្រាក់ថ្លៃចំណត ដោយស្វ័យប្រវត្តិ ដោយតម្រូវឲ្យម្ចាស់យានយន្តធ្វើការទូទាត់ប្រាក់ថ្លៃចំណត មុននឹងចាកចេញពីព្រលាន ។
ចំណតយានយន្តថ្មីនេះ ត្រូវបានចែកជា២ប្រភេទ គឺចំណតធម្មតា និងច្រកផ្លូវលឿន ពណ៌ស្វាយ ។
+ ចំណតធម្មតា ៖ គឺសម្រាប់ការចតធម្មតា ដោយគិតទៅតាមពេលវេលានៃការចតរបស់យានយន្តនីមួយៗ ប៉ុន្តែបើចតលើពីតារាងពេលវេលា ដែលបានកំណត់ត្រូវបង់ប្រាក់ថែម ១០០០៛ រៀងរាល់ ៣០នាទី រហូតដល់ ១២ម៉ោង។ បើលើស ១២ម៉ោង ត្រូវបង់បន្ថែម ៤០០០៛ ក្នុង១ម៉ោង។ ចំពោះម៉ូតូសណ្តោងរ៉ឺម៉ក មានអត្រាតម្លៃស្មើរថយន្ត ។
+ ច្រកផ្លូវលឿនស្វាយ ៖ ជាច្រកផ្លូវលឿនពិសេសសម្រាប់ដាក់អ្នកដំណើរ ឬឥវ៉ាន់ចុះមួយភ្លែតៗតែប៉ុណ្ណោះ ហើយតម្លៃរបស់វាថ្លៃជាងចំណតធម្មតា ប៉ុន្តែរ៉ឺម៉កពីខាងក្រៅអនុញ្ញាតឲ្យប្រើប្រាស់ច្រកផ្លូវលឿនស្វាយនេះបានត្រឹម១០នាទី ដោយមិនគិតថ្លៃ។ បើចតលើច្រកពិសេសនេះលើពីតារាង ដែលបានកំណត់គឺត្រូវបង់ប្រាក់បន្ថែម ៤០០០០៛ រៀងរាល់៣០នាទី ។
ជាក់ស្តែងកន្លងទៅថ្មីៗនេះ បុរសម្នាក់ទំនងមិនបានដឹង ចូលចតខុសផ្លូវ បានចតរថយន្តក្នុងចំណត (ច្រកផ្លូវលឿនស្វាយ) ក្នុងព្រលានយន្តហោះអន្តរជាតិភ្នំពេញ រយៈពេល១ម៉ោង ៣២នាទី អស់ប្រាក់ចំនួន១០ម៉ឺនរៀល (ប្រមាណជា២៥ដុល្លារ) ។
យោងតាមប្រភពពីលោក Ramady Moun បានសរសេររៀបរាប់នៅលើហ្វេសបុកថា « តាមពិតចំណតរថយន្តដែលថ្លៃជាងគេបង្អស់លើលោកនេះ គឺនៅព្រលានយន្តហោះអន្តរជាតិភ្នំពេញសោះ ។ ចតឡានរយៈពេលមួយម៉ោងសាមសិបពីរនាទី ត្រូវបង់ប្រាក់ដប់ម៉ឺនរៀល (១០០០០០៛) ដូចជាធ្វើស្រែលើខ្នងរាស្ត្រខ្មែរជ្រុលពេកទេដឹង ? សំបុត្រចូលទស្សនាអង្គរវត្ត ក៏មិនថ្លៃដល់ថ្នាក់នេះដែរ នៅអូស្ត្រាលី សិង្ហបុរី ទោះបីស្រុកបារាំង ដែលពួកវិនិយោគលោភលន់នេះមកក៏មិនថ្លៃដល់អញ្ចឹងដែរលោកព្រះ » ៕
