ភ្នំពេញ ៖ កម្លាំងប្រជាការពារសង្កាត់ឬស្សីកែវម្នាក់ ត្រូវបានខ្មាន់កាំភ្លើងបាញ់រះបណ្តាលឱ្យចំជើងខាងស្តាំរួងរបួសធ្ងន់ ខណៈពេលកំពុងបំពេញភារកិច្ច ដេញបង្ក្រាបក្រុមក្មេងទំនើងដែលកំពុងវ៉ៃកាប់ចាក់គ្នាតាមដងផ្លូវ បង្កឱ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចខណ្ឌឬស្សីកែវ កាលពីវេលាម៉ោង១២និង៣០នាទីរំលងអាធ្រាត្រ ឈានចូលថ្ងៃទី១២ ខែតុលា ឆ្នាំ២០១៨ នៅត្រង់ចំណុចទល់មុខផ្ទះល្វែងA4 ស្ថិតតាមផ្លូវបេតុង ភូមិគង្គារផុស សង្កាត់ទួលសង្កែទី២ ខណ្ឌឬស្សីកែវ ។
តាមប្រភពពីសមត្ថកិច្ចប៉ុស្តិ៍នគរបាលរដ្ឋបាលទួលសង្កែទី២ បានប្រាប់ឱ្យដឹងថា នៅមុនពេលកើតហេតុ កម្លាំងពួកគាត់បានសហការជាមួយកម្លាំងប្រជាការពារសង្កាត់ឬស្សីកែវ បានចេញល្បាតពួនស្ទាក់តាមភូមិសាស្ត្រនានា ក្នុងមូលដ្ឋានដើម្បីទប់ស្កាត់ និងតាក់បន្ថយបទល្មើសផ្សេងៗ និងរក្សាសុវត្ថិភាពជូនបងប្អូនប្រជាពលរដ្ឋក្នុងមូលដ្ឋាន។ ខណៈពេលល្បាត មកដល់ចំណុចជិតរង្វង់មូលកាំកូស៊ីធី ក៏បានប្រទះឃើញក្រុមក្មេងទំនើងមួយក្រុម កំពុងវាយតប់គ្នាតាមដងផ្លូវយ៉ាងអាណាធិបតេយ្យ។ ពេលនោះកម្លាំងពួកគាត់ក៏បម្រុង ចូលទៅអន្តរាមគន៍ តែខណៈពេលដែលក្រុមក្មេងទំនើងទាំងនោះ ឃើញសមត្ថកិច្ចភ្លាមក៏បានឡើងជិះម៉ូតូរត់គេចខ្លួន។
បន្ទាប់មកកម្លាំងពួកគាត់ក៏បានជិះម៉ូតូប្រដេញតាមពីក្រោយ រហូតទៅដល់ត្រង់ចំណុចកើតហេតុខាងលើ កម្លាំងក៏បានឃាត់ម៉ូតូក្រុមក្មេងទំនើងបម្រុងនឹងឆែកឆេរ និងសួរនាំ ស្រាប់តែលេចមុខបុរសម្នាក់ស្លៀកពាក់ស៊ីវិល ដោយដៃមានកាន់កាំភ្លើងខ្លី១ដើម ម៉ាក Lock ពណ៍ខ្មៅ បានផ្ទុះអាវុធចំនួនមួយគ្រាប់បណ្តាលឱ្យចំជើងខាងស្តាំប្រជាការពារខាងលើរងរបួសបាក់ឆ្អឹង បង្កឱ្យមានការភ្ញាក់ផ្អើលឡើងយ៉ាងខ្លាំង ។
ប្រភពដដែលបន្តថា បន្ទាប់មកខ្មាន់កាំភ្លើងបានស្រែចោទប្រកាន់មកលើកម្លាំងពួកគាត់ថាជាចោរ។ ពេលនោះទោះបីជាកម្លាំងពួកគាត់បានស្រែប្រាប់ថាជាកម្លាំងសម្ថកិច្ចយ៉ាងណាក្តី ក៏ខ្មាន់កាំភ្លើងរូបនោះ នៅតែបន្តបាញ់ឡើងលើជាច្រើនគ្រាន់ទៀត។ ភ្លាមៗនោះកម្លាំងពួកគាត់ក៏បានយកកាំភ្លើងAK ចូលទៅភ្ជុងគំរាមខ្មាន់កាំភ្លើងនោះ រួចដកហូតកាំភ្លើងខ្លីមួយដើមខាងលើយករក្សាទុកធ្វើជាវត្ថុតាង រួចវាយខ្នោះ។ ចំណែកឯប្រជាការពារដែលរងរបួសខាងលើ ត្រូវបានរថយន្តសង្គ្រោះបន្ទាប់ដឹកយកទៅមន្ទីរពេទ្យកាល់ម៉ែត ដើម្បីជួយសង្គ្រោះផងដែរ ។
សមត្ថកិច្ចបានឱ្យដឹងថាទៀតថាខ្មាន់កាំភ្លើងខាងលើមានឈ្មោះ ឡាយ អ៊ីងឃីង ភេទប្រុស អាយុ២៧ឆ្នាំ ជាមន្ត្រីអាវុធហត្ថលើផ្ទៃប្រទេស។ ក្រោយពេលកើតហេតុ សមត្ថកិច្ចបានរកឃើញសំបកគ្រាប់ចំនួន១០គ្រាប់ ហើយបានរើសយកមករក្សាទុកដើម្បីធ្វើជាភ័ស្តុតាង ចំណែកឯបុរសដែលជាខ្មាន់កាំភ្លើងខាងលើ រួមទាំងវត្ថុតាង ត្រូវបានកម្លាំងសមត្ថកិច្ច ឃាត់ខ្លួនយកទៅសាកសួរ និងឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌឬស្សីកែវ ដើម្បីធ្វើការសាកសួរនិងចាក់ការទៅតាមនីតិវិធី ៕
