រាជធានីភ្នំពេញ ៖ ស្ត្រីម្នាក់ដែលយកស្កុតមករុំដៃជើង និងមាត់កូន ភ្ញាក់ខ្លួនស្រឡាំងកាំង នៅពេលកម្លាំងសមត្ថកិច្ចបានចុះទៅឃាត់ខ្លួនដល់ផ្ទះ ហើយនាំមកសាកសួរនៅប៉ុស្តិ៍គោកឃ្លាង កាលពីនៅយប់ថ្ងៃទី១១ តុលា ២០១៨ នេះ បន្ទាប់ពីវីដេអូឃ្លីបមួយត្រូវបានបែកធ្លាយ ហើយអ្នកលេងនិយមលេងហ្វេសប៊ុល បង្ហោះចែកចាយបន្តគ្នា ធ្វើអោយមានការរិះគន់ជុំវិញទង្វើធ្វើទារុណកម្មលើកូនក្មេងនោះ ។
នៅប៉ុស្តិ៍ប៉ូលិស ស្ត្រីដែលយកស្កុតមករុំដៃជើង និងមាត់កូន បានឲ្យដឹងថា គាត់មានឈ្មោះ សុទ្ធ ធារី អាយុ២៨ឆ្នាំ មុខរបរនៅផ្ទះ មានប្តីឈ្មោះ ឈឹម វីរៈ អាយុ៣២ឆ្នាំ មុខរបររត់ម៉ូតូឌុប មានទីលំនៅក្នុងភូមិតំណាក់ សង្កាត់គោកឃ្លាង ខណ្ឌសែនសុខ មានកូន២នាក់ ប្រុសអាយុ៧ឆ្នាំ និងស្រីអាយុ១ខួប៦ខែ មានឈ្មោះ ផល លីណា ។
ស្ត្រីឈ្មោះ សុទ្ធ ធារី បន្តថា រឿងវីដេអូឃ្លីប ឃើញរុំស្កុតមាត់ក្មេងប្រុសនោះ មិនមែនកូនប្រុសទេ ជាកូនស្រី ហើយវាកើតឡើងតាំងពីជាង៦ខែមុនមកម្ល៉េះ ។
ស្ត្រីដដែល បានរៀបរាប់ឲ្យដឹងថា នៅគ្រានោះ កូនស្រីគាត់មានអាយុ១ខួប នាងជាក្មេងរពឹស ខណៈក្រុមគ្រួសារនៅជុំគ្នា គាត់ក៏យកស្កុតរុំមាត់កូនស្រីពៅ បំណងលេងជាមួយកូនទេ នៅចំពោះមុខក្រុមគ្រួសារទាំងអស់ ហើយមានប្អូនប្រុសបង្កើតម្នាក់ បានយកទូរស័ព្ទរបស់គាត់ម៉ាកអាហ្វូន មកថតលេង ហើយក៏មិនបានបង្ហោះចូលហ្វេសប៊ុកដែរ ក្រោយមកប្រមាណជាកន្លះខែមិននេះ ប្អូនប្រុសគាត់ ក៏ជួបគ្រោះថ្នាក់ចរាចរណ៍ ដួលបោកក្បាលសន្លប់ បាត់បង់ទាំងលុយកាក់ បាត់ទាំងទូរស័ព្ទមួយគ្រឿងដែលមានវីដេអូនៅក្នុងនោះទៀតផង លុះរយៈពេល២ទៅ៣ថ្ងៃនេះ ស្រាប់តែបែកធ្លាយវីដេអូដែលគាត់យកស្កុតរុំមាត់កូននោះ មកបង្ហោះលើបណ្តាញសង្គមព្រោងព្រាត ធ្វើអោយមានមតិរិះគន់បែបនេះ ។
នៅប៉ុស្តិ៍ប៉ូលិស បើតាមសាក្សីស្ត្រីម្នាក់ ត្រូវជាយាយរបស់ក្មេងស្រីតូចនោះ និងក្រុមគ្រួសារទាំងអស់គ្នា ហ៊ានអះអាងចំពោះមុខសមត្ថកិច្ច ដូចៗគ្នាថា សកម្មភាពនេះ គឺលេងជាមួយកូនទេ មិនមែនម្តាយធ្វើទារុណកម្មកូនទេ ហើយសាម៉ីខ្លួន(សុទ្ធ ធារី) ក៏បានធ្វើការសូមទោសជាសាធារណៈ ពីទង្វើរបស់ខ្លួន ហើយសមត្ថកិច្ចក៏មិនបានឃុំឃាំងអ្វីដែរ ក្រោយពីសូមទោសរួច ក៏អនុញ្ញាតិឲ្យវិលត្រឡប់ទៅផ្ទះវិញ ។
សូមរម្លឹកថា កាលពីថ្ងៃទី១១ តុលា ម្សិលមិញនេះ បើតាមវីដេអូឃ្លីបមួយ ត្រូវបានមហាជនរិះគន់ និងទាមទារឲ្យសមត្ថកិច្ច មានវិធានការទៅតាមផ្លូវច្បាប់លើស្ត្រីម្នាក់ ខឹងកូនតូចបានយកស្កុត ចងដៃ ចងជើងបិទមាត់មិនអោយស្រែក ។
វីដេអូឃ្លីបនេះត្រូវគេបង្ហោះចែកចាយនៅតាមបណ្តាញសង្គមហ្វេកបុក បានបង្ហាញឲ្យឃើញថា ស្ត្រីម្នាក់ទំនងខឹងកូនតូច អាយុប្រហែលជាជាងមួយឆ្នាំ កំពុងស្រែកយំ ធ្វើឲ្យស្ត្រីជាម្តាយ ដែលកំពុងបោកខោអាវមិនកើត បានយកស្កុតមក ចងរុំដៃពាត់ទៅក្រោយ ចងជើង បិទមាត់ មិនអោយស្រែក និងធ្វើអ្វីបាន ។
អ្នកនិយមលេងនៅបណ្តាញសង្គម ប្រតិកម្មថា ចុះក៍អាក្រក់ម្ល៉េះ ? នាងម្ដាយនេះចាប់កូនខ្លួនបង្កើតអែង រុំដៃជើងបិទមាត់នឹងស្កុត អីក៍អាក្រក់ម្ល៉េះនាងម្ដាយនេះ! ក្មេងវាដឹងស្អីវា ខុសត្រូវអីមិនគួរធ្វើបាបក្មេងម្លឹងទេ ។ ជួយ Share ម្នាក់មួយផងបងប្អូនដើម្បីអោយអង្គការការពារកុមារបានឃើញ និងបានទៅជួយដល់ប្អូនម្នាក់នេះផង ៕
