ក្រុងកំពង់សោម ៖ ជារៀងរាល់ឆ្នាំ ក្នុងរយៈពេល៣ថ្ងៃចុងក្រោយ នៃពិធីបុណ្យភ្ជុំបិណ្ឌ ខេត្តគោលដៅទេសចរណ៍សំខាន់ៗមួយចំនួននៅកម្ពុជា មានភ្ញៀវទៅទស្សនាច្រើន ក្នុងនោះខេត្តសៀមរាប បានទទួលស្វាគមន៍ភ្ញៀវទេសចរជាតិ និងអន្តរជាតិច្រើនជាងគេ បន្ទាប់មកគឺខេត្តព្រះសីហនុ មានមនុស្សម្នាជាច្រើននាំគ្នាសម្រុកទៅកំសាន្តលេងសមុទ្រនៅក្រុងកំពង់សោម ធ្វើឲ្យតូបលំហែកាយជាច្រើននៅតាមមាត់សមុទ្រ សឹងតែរកកន្លែងអង្គុយគ្មាន ។
ប៉ុន្តែនៅឆ្នាំនេះ ខុសប្លែកពីឆ្នាំមុនៗ ដោយសារតែខេត្ត នៅជាប់មាត់សមុទ្រមួយនេះ បែរជាស្ងាត់ជ្រងំ សោះកក្រោះ មិនសូវមានមនុស្សច្រើនដូចមុនឡើយ បើទោះបីជាថ្ងៃបុណ្យភ្ជុំក៏ដោយ ។
ភាពស្ងាត់ជ្រងំ ដូចចោរលួចសេះនេះ ក៏ព្រោះតែ នៅតាមឆ្នេរ ពិសេសអូរឈើទាល ចិនបានម៉ៅយកតូបលក់ដូរទាំងអស់នោះ ហើយបង្កើតមុខរបរលក់ដូររបស់ពួកគេ ។ ដល់អីចឹង ធ្វើឲ្យជនជាតិកម្ពុជា មិនអាចបានឃើញឆ្នេរសមុទ្រខ្មែរទៀតទេ ព្រោះកន្លែងលក់ដូររបស់ចិនទាំងនោះ លក់ថ្លៃ នាំឲ្យខ្មែរមិនអាចមកលេងនៅឆ្នេរសមុទ្រនៅខេត្តព្រះសីហនុបានទៀតទេ ។
នៅរដូវបុណ្យទាន ពិសេសនៅពេលបុណ្យភ្ជុំបិណ្ឌនេះ មិនមានអ្នកទេសចរណ៍ច្រើនទេ សូម្បីតែពលរដ្ឋខ្មែរ ក៏លែងហ៊ាន ទៅលេងសមុទ្រទៀតដែរ គឺសមុទ្រពេលនេះ ប្រែជាស្ងាត់ឈឹង ។
នៅឆ្នេរអូរឈើទាល តូបលក់ដូរទាំងអស់ ជារបស់ជនជាតិចិន លែងមានខ្មែរលក់ទៀតហើយ ។ បញ្ហានេះ នាំឲ្យបាត់ភ្ញៀវទេសចរណ៍ មិនថា ទេសចរណ៍បរទេសទេ សូម្បីតែជនជាតិខ្មែរ ក៏លែងហ៊ានទៅលេងដែរ ។ នេះជានយោបាយរបស់អាជ្ញាធរខេត្តព្រះសីហនុ ដែលបំបាត់អ្នកទេសចរណ៍ សូម្បីតែជាតិសាសន៍ខ្មែរ ក៏លែងហ៊ានចូលលេងឆ្នេរសមុទ្រខ្មែរដែរ ។
ងាកទៅមើលឆ្នេរសមុទ្រវិញ ពោរពេញដោយសំរាម កខ្វល់ នៅខេត្តព្រះសីហនុ ដែលនៅពេលបុណ្យភ្ជុំបិណ្ឌនេះ ត្រូវបានគេថតបង្ហោះពេញហ្វេសប៊ុកយ៉ាងព្រោងព្រាត ។
រីឯ កន្លែងស្នាក់នៅវិញ ជនជាតិចិន បានចូលមកជួលផ្ទះរបស់អ្នកនៅកំពង់សោម ពិសេសផ្ទះសំណាក់ បិទទ្វារទុកចោល ហើយបើបើកធ្វើអាជីវកម្ម ក៏ក្នុងតម្លៃថ្លៃដែរ ។ ក្រៅពីនោះ ឆ្នេរសមុទ្រទាំងអស់ នៅកំពង់សោម ខេត្តព្រះសីហនុ ត្រូវបានអាជ្ញាធរខេត្ត បានកាត់ទៅឲ្យវិស័យឯកជន សង់សំណង់ ថែមទៀត ។
សូមបញ្ជាក់ថា យោងតាមតួលេខក្រសួងទេសចរណ៍ កាលពីឆ្នាំ២០១៧ កន្លងមកនេះថា ក្នុងឱកាសបុណ្យភ្ជុំបិណ្ឌ តំបន់គោលដៅទេសចរណ៍នានាក្នុងប្រទេសកម្ពុជាទទួលបានភ្ញៀវទេសចរជាតិ និងអន្តរជាតិសរុបចំនួន១លាន៥ម៉ឺននាក់ មានកំណើនប្រមាណជិត១៦% បើធៀបនឹងឆ្នាំ២០១៦ មានប្រមាណ១លាន១ម៉ឺននាក់ ។
តួលេខដដែលបញ្ជាក់ទៀតថា សៀមរាប គឺជាខេត្តទេសចរណ៍ទទួលបានភ្ញៀវច្រើនជាងគេ ដែលមានភ្ញៀវជាតិ និងអន្តរជាតិសរុបជាង១៤ម៉ឺន៣ពាន់នាក់ ខណៈខេត្តព្រះសីហនុ ទទួលបានភ្ញៀវទេសចរសរុបប្រមាណ៩ម៉ឺន២ពាន់នាក់ ។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុ ឱ្យដឹងថា កំណើនភ្ញៀវទេសចរទៅទស្សនា និងសម្រាកកម្សាន្តនៅខេត្តព្រះសីហនុ បានកើនឡើងជាបន្តបន្ទាប់ពីមួយឆ្នាំទៅមួយឆ្នាំ ជាពិសេស នៅពេលមានបុណ្យទានម្ដងៗដូចជា ព្រឹត្តិការណ៍ចូលឆ្នាំសកល ចូលឆ្នាំខ្មែរ និងបុណ្យភ្ជុំបិណ្ឌជាដើម ។
គួរឲ្យកត់សម្គាល់ ឆ្នាំ២០១៨នេះ មិនដឹងមានបាតុភូតអ្វីកើតឡើងទេ បានជានាំឲ្យប្រជាពលរដ្ឋខ្មែរមិនអាចមកលេងនៅឆ្នេរសមុទ្រ នៅខេត្តព្រះសីហនុ បានទៀត ?
គួរបញ្ជាក់ថា ខេត្តផ្សេងៗទៀតជាគោលដៅទេសចរណ៍ដូចជា ខេត្តបាត់ដំបង កំពត បន្ទាយមានជ័យ កំពង់ធំ រតនគិរី និងក្រចេះ ក៏ទទួលបានកំណើនភ្ញៀវទេសចរទៅទស្សនាកម្សាន្តក្នុងឱកាសបុណ្យភ្ជុំបិណ្ឌច្រើនដែរ ដោយសារតែតំបន់ទាំងនោះមានហេដ្ឋារចនាសម្ព័ន្ធផ្លូវស្អាតល្អ ភ្ជាប់ពីផ្លូវជាតិទៅដល់រមណីយដ្ឋានទេសចរណ៍តែម្ដង ទើបភ្ញៀវទេសចរសម្រុកទៅលេងនៅទីនោះ ខណៈតំបន់រមណីយដ្ឋានផ្សេងទៀត ដែលកាលពីមុនមានកំណើនភ្ញៀវច្រើននោះបានធ្លាក់ចុះ ពីព្រោះពួកគេស្វែងរកតំបន់ថ្មីៗសម្រាប់កម្សាន្ត ៕