ខេត្តព្រះសីហនុ ៖ ក្រុមទាហានដែលអះអាងខ្លួនថា ជាអ្នកយាមដីអោយអ្នកមានអំណាចម្នាក់ (ថ្នាក់ឧបនាយករដ្ឋមន្ត្រី សុំមិនបញ្ចេញឈ្មោះ) បានចាប់ប្រជាពលរដ្ឋម្នាក់ញាត់ចូលក្នុងរថយន្ត កាលពីថ្ងៃទី៦ ខែតុលា ២០១៨ រហូតមកដល់ព្រឹក ថ្ងៃទី៨ ខែតុលានេះ នៅមិនទាន់ដោះលែងមកវិញទេ ។
ការចាប់ខ្លួនរុញចូលរថយន្តនេះ កើតឡើងនៅចំណុចភ្លូ ឃុំអណ្តូងថ្ម ស្រុកព្រៃនប់ ខេត្តព្រះសីហនុ ខណៈពេលដែលបុរសជនរងគ្រោះកំពុងតែដើរលើផ្លូវ ។ ប៉ុន្តែ មិនដឹងរឿងអ្វីពិតប្រាកដនោះទេ ។
ប្រភពពីប្រជាពលរដ្ឋ បានអោយដឹងថា បុរសដែលក្រុមទាហានចាប់ខ្លួននោះមានឈ្មោះ យ៉េន ថុន អាយុជាង៤០ឆ្នាំ រស់នៅឃុំអណ្តូងថ្ម ស្រុកព្រៃនប់ ខេត្តព្រះសីហនុ ។
ប្រភពដដែលបន្តទៀតថា ក្រុមទាហានទាំងនោះ ជាទាហានខេត្ត តែមិនបញ្ជាក់ប្រាប់អង្គភាពណាទេ ក្នុងចំណោមទាហាននោះ គឺពួកគាត់ស្គាល់ឈ្មោះ ចាក និងឈ្មោះ ប៉ាក ។ ហើយទាហានទាំងនោះតែងតែដើរសំឡុតគំរាមកំហែងនៅតំបន់នោះ និងថែមទាំងបានប្រើឈ្មោះឧបនាយករដ្ឋមន្ត្រីម្នាក់ផងដែរ និងមានទាំងកាំភ្លើងអាកាថែមទៀត ។
បើតាមលោក យន្ត មីន អភិបាលខេត្តព្រះសីហនុ បានបញ្ជាក់ប្រាប់កាសែតក្នុងស្រុកមួយ នៅព្រឹកថ្ងៃទី០៨ តុលា នេះថា ប្រជាពលរដ្ឋដែលគេចាប់ខ្លួននោះ ពេលនេះ បើតាមមន្ត្រីរដ្ឋបាលព្រៃឈើបានរាយការណ៍មកលោកថា ជនរងគ្រោះកំពុងនៅទីស្នាក់ការដ្ឋបាលព្រៃឈើខេត្ត ។ លោក យន្ត មីន បន្តថា «ចាំមើលខ្ញុំពិនិត្យមើលសិន អាចជួយបានរបៀបម៉េច?» ។
ចំណែកលោក ឌី សុភី ប្រធានរដ្ឋបាលព្រៃឈើខេត្តព្រះសីហនុ បានឆ្លើយថា លោកអត់ដឹងរឿង ទៅវិញ ។
រីឯ ទាហានឈ្មោះ ចាក បានអះអាងថា ការចាប់ប្រជាពលរដ្ឋនេះ ដោយសារបុរសនោះ បានកាប់គម្របព្រៃឈើ ។
ដោយឡែក រឿងមួយផ្សេងទៀត បានកើតឡើងនៅរសៀលថ្ងៃទី០៥ ខែតុលា ឆ្នាំ២០១៨នេះ អាជ្ញាធរ និងកម្លាំងសមត្ថកិច្ចចម្រុះទាំងនគរបាលជាតិ និងកងរាជអាវុធហត្ថខេត្ត ដោយមានជនស្លៀកពាក់ស៊ីវិលម្នាក់ ឈរបញ្ជាឲ្យកម្លាំងកម្មករមានពូថៅ និងម៉ាស៊ីនត្រង់តឺន័រ កាត់ផ្តួលរំលំខ្ទមរបស់ប្រជាពលរដ្ឋអស់ជាច្រើនខ្នង ដោយគ្មានដីកាពីរុះរើ ពីសាលាដំបូងខេត្តព្រះសីហនុឡើយ ។
សកម្មភាពចុះរុះរើផ្ទះប្រជាពលរដ្ឋរាប់រយគ្រួសារនេះ ពីសំណាក់កងកម្លាំងប្រដាប់អាវុធ ដែលគេអះអាងថា ផ្ទះពលរដ្ឋទាំងនោះ ជាសំណង់អនាធិបតេយ្យខុសច្បាប់ ស្ថិតក្នុងភូមិអុង ឃុំរាម ស្រុកព្រៃនប់ ខេត្តព្រះសីហនុ ។
ប្រជាពលរដ្ឋ បានចាត់ទុកថា ការធ្វើសកម្មភាពទាំងកំរោល ចុះរើវាយកម្ទេចលំនៅស្ថានរបស់ពួកគាត់ គ្មានប្រាប់ពីហេតុផល និងមិនបានបង្ហាញដីកាពីតុលាការ ឬលិខិតណែនាំពីថ្នាក់ណាទាំងអស់ គឺរំលោភបំពានយកតែម្តង ។
តាមសេចក្តីរាយការណ៍ពីកន្លែងកើតហេតុ បានឲ្យដឹងថា ការចុះរុះរើខ្ទមរបស់ប្រជាពលរដ្ឋជាច្រើនគ្រួសារនេះ ដោយសារពលរដ្ឋសាងសង់លើដីព្រៃលិចទឹករបស់រដ្ឋ ។
សូមបញ្ជាក់ថា នៅប៉ូលសេដ្ឋកិច្ចខេត្តព្រះសីហនុ កំពុងមានការអភិវឌ្ឍន៍ យ៉ាងខ្លាំង ធ្វើឲ្យតម្លៃដីធ្លី ក្នុងភូមិសាស្ត្រខេត្តជាប់សមុទ្រមួយនេះ មានការហក់ឡើងខ្ពស់កប់ពពក ហើយដីរបស់រដ្ឋ ភាគច្រើន ត្រូវចូលទន្ទ្រានកាន់កាប់ពីសំណាក់អ្នកមានអំណាច និងទឹកលុយ រួមនិងជនខិលខូចមួយចំនួន ទើបធ្វើឲ្យសង្គ្រាមដីធ្លី ស្ថិតក្នុងខេត្តព្រះសីហនុកើតមានមិនចេះចប់ និងស្មុគស្មាញដោះស្រាយមិនចេញតែម្តង ៕
