ភ្នំពេញ ៖ នៅព្រឹកថ្ងៃទី០៥ ខែតុលា ឆ្នាំ២០១៨ នេះរាជរដ្ឋាភិបាលកម្ពុជាចេញ ស.ជ.ណ សម្រេចបញ្ឈប់ការសិក្សាស្រាវជ្រាវបង្កើតខេត្តថ្មី ដែលគ្រោងបំបែកចេញពីខេត្តកណ្តាល និងខេត្តមណ្ឌលគិរី-រតនគិរី ។
ការសម្រេចរបស់រាជរដ្ឋាភិបាលកម្ពុជា បានធ្វើឡើងភ្លាមៗបន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បញ្ជាឲ្យលុបចោលការសិក្សានេះ នៅក្នុងពិធីអបអរសាទរទិវាគ្រូបង្រៀន ៥ តុលា ។
នៅក្នុងលិខិតទីស្តីការគណៈរដ្ឋមន្ត្រី ផ្ញើជូនសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់យ៉ាងដូច្នេះ «ទីស្តីការគណៈរដ្ឋមន្ត្រីសូមជម្រាបជូន សម្តេចក្រឡាហោម ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃជ្រាប ចំពោះករណីស្នើសុំបង្កើតថ្មីចំនួន២ ចេញពីខេត្តកណ្តាល ខេត្តមណ្ឌលគិរី និងខេត្តរតនគិរី រាជរដ្ឋាភិបាលសម្រេចបញ្ឈប់ការសិក្សាស្រាវជ្រាវចាប់ពីពេលនេះតទៅ» ។
គ្រាដែលខេត្តថ្មីមិនទាន់ទាំងសម្រេចថាបង្កើត ឬយ៉ាងណាផងនោះ បែរជាមានអ្នករត់ការយកតំណែងគ្រប់គ្រងក្នុងខេត្តទាំងនេះបាត់ទៅហើយ ករណីនេះ សម្តេចស្មានតែគេសិក្សាស្ងាត់ៗ ដូចខេត្តត្បូងឃ្មុំ ។ ប៉ុន្តែគម្រោងបំបែកខេត្តថ្មីនេះ បែរជាក្លាយជាសាច់ជ្រូក៣ជាន់ សម្រាប់មន្ត្រីខិលខូចទៅវិញ ។ ដូច្នេះនៅថ្ងៃនេះ ត្រូវលុបចោលទាំងអស់ ចឹងហើយសម្តេចបានចារប៊ិចក្រហម នៅលើលិខិតស្នើសុំតែងតាំងចៅហ្វាយខេត្ត ចៅហ្វាយខេត្តរង នៅខេត្តគ្រោងបង្កើតថ្មីនោះថា «ប្រញាប់ងាប់ទៅណា?» ៕
