សៀមរាប៖ ថ្មីៗនេះ មានការភ្ញាក់ផ្អើលជាថ្មីម្ដងទៀត បន្ទាប់ពីបានរកឃើញអតីតព្រះសង្ឃកម្ពុជាក្រោមព្រះនាម មាស វិចិត្រ បានក្លាយជាមនុស្សឡប់សតិគួរឱ្យអាណិត ក្រោយពីបាត់ខ្លួនអស់រយៈពេលអស់រយៈពេលជាង ១ឆ្នាំ នៅខេត្តសៀមរាប ។
អតីតសង្ឃរូបនេះ មានស្រុកកំណើតមានកំណើតនៅភូមិជ្រៃតាសូរ ឃុំកីយ៉ា ស្រុកមាត់សមុទ្រ នៃខេត្តព្រះត្រពាំង បាននិមន្តមកគង់នៅវត្តទួលសង្កែ នៃទីក្រុងភ្នំពេញរយៈពេលជាង ១០ឆ្នាំហើយ។ កាលពីថ្ងៃទី១៨ ខែមិថុនា ឆ្នាំ ២០១៧ ព្រះសង្ឃព្រះ នាម មាស វិចិត្រ និងតាអាចារ្យម្នាក់ឈ្មោះ នី បានទៅលេងសាច់ញាតិនៅសង្កាត់ក្របីរៀល ក្រុងសៀមរាប ហើយនិមន្តត្រឡប់វិញទាំងយប់ ក៏បាត់ខ្លួនតាំងពីពេលនោះមក ។
យ៉ាងណាមិញបើតាមប្រភពពីសាច់ញាតិរបស់អតីតខាងលើបានឱ្យដឹងថា ក្រោយមកប្រហែល ១០ថ្ងៃ គេក៏បានឃើញព័ត៌មាននៅលើបណ្ដាញសង្គមហ្វេសប៊ុក និយាយអំពីក្រុមប្រជាការពារនៅភូមិស្រង៉ែ ចាប់ខ្លួនព្រះសង្ឃមួយអង្គ និងតាអាចារ្យម្នាក់សង្ស័យពីបទដើរលួចឆក់ ដោយក្នុងនោះសភាពរបស់អ្នកទាំងពីរមានអាការៈភ័យញ័រ ហើយគេថែមទាំងបានដោះស្ប៉ងចីវរសង្ឃ និងសម្លៀកបំពាក់របស់តាអាចារ្យចេញ ឱ្យស្លៀកការ៉ុងជំនួស ដែលមើលហើយគួរឱ្យអាសូរជាពនពេក ។
បន្ទាប់ពីបានឃើញភ្លាមសាច់ញាត់ក៏បានទៅដល់ប៉ុស្ដិ៍នគរបាលសង្កាត់ស្រង៉ែ ហើយនាយប៉ុស្តិ៍នគរបាលសង្កាត់ស្រង៉ែ លោក ស៊ាវ ធឿត ឆ្លើយបដិសេធថា ប៉ូលិសរបស់លោកមិនបានចាប់ខ្លួនព្រះសង្ឃកម្ពុជាក្រោម និងតាអាចារ្យម្នាក់នោះទេ គឺប្រជាការពារភូមិស្រង៉ែ ជាអ្នកចាប់ខ្លួនមកប្រគល់ឱ្យប៉ូលិសប៉ុស្តិ៍។ លោកមេប៉ុស្តិ៍អះអាងទៀតថា ប៉ូលិសក៏មិនបានដោះស្បង់ចីវរព្រះសង្ឃ និងតាអាចារ្យ ឱ្យស្លៀកការុងដែរ គឺអ្នកទាំងពីរនោះស្លៀកខ្លួនឯង ហើយនៅពេលដែលប៉ូលិសរកមិនឃើញកំហុស ក៏ដឹកអ្នកទាំងពីរទៅបេនឡាននៅក្នុងក្រុងសៀមរាប ដើម្បីឱ្យជិះរថយន្តក្រុងត្រឡប់ទៅផ្ទះវិញ ប៉ុន្តែអ្នកទាំងពីរនាំគ្នារត់ចុះពីលើម៉ូតូ ហើយគេចខ្លួនបាត់មិនដឹងទៅទីណាឡើយ ។
សូមបញ្ជាក់ថា ទើបតែប៉ុន្មានថ្ងៃនេះប៉ុណ្ណោះដែលមានប្រជាពលរដ្ឋនៅក្រុងសៀមរាប ប្រទះឃើញអតីតសង្ឃរងគ្រោះមានស្មារតីខុសប្រក្រតី តែពុំឃើញតាអាចារ្យឡើយ ហើយរហូតមកទល់ពេលនេះ ត្រូវបានគេដឹងថា បានព្រះសង្ឃគង់នៅវត្តកេសរារាម ក្រុងសៀមរាប យកមកឱ្យស្នាក់នៅដើម្បីទំនាក់ទំនងរកសាច់ញាតិ ៕
សហការី KBN
