ខេត្តព្រះសីហនុៈ រថយន្តដឹកទំនិញមួយគ្រឿង បានបើកបោះពួយយ៉ាងលឿន ជ្រុលចង្កូតទៅបុករ៉ូឡូកិនថ្នល់ពេញទំហឹង បណ្ដាលឲ្យមនុស្ស២នាក់រងរបួស កាលពីវេលាម៉ោង១២ និង៤៥នាទីរសៀល ថ្ងៃទី២០ ខែកញ្ញា ឆ្នាំ២០១៨ នៅលើផ្លូវជាតិលេខ៤ ត្រង់ចន្លោះគីឡូម៉ែត្រ ២១៤-២១៥ ស្ថិតក្នុងភូមិចំណោតរាម ឃុំបិតត្រាំង ស្រុកព្រៃនប់។
មន្ត្រីនគរបាលចរាចរស្រុកព្រៃនប់ បានឲ្យដឹងថា រថយន្តដឹកទំនិញ ម៉ាក KAI ពណ៌ខៀវ ស្លាកលេខភ្នំពេញ 3C-7781 បើកបរដោយឈ្មោះ ង៉ែត ភិរម្យ ភេទប្រុស អាយុ២៩ឆ្នាំ (រងរបួសមធ្យម) មានលំនៅក្នុងស្រុកឈូក ខេត្តកំពត។ រីឯកម្មករធ្វើផ្លូវដែលររបួសនោះ ឈ្មោះ សុខ គា ភេទប្រុស អាយុ ២៦ឆ្នាំ មានលំនៅភូមិ១ សង្កាត់លេខ១ ក្រុង-ខេត្តព្រះសីហនុ។
ប្រភពព័ត៌មានពីកន្លែអកើតហេតុ បានឲ្យដឹងថា មុនពេលកើតមាននូវគ្រោះថ្នាក់ចរាចរណ៍នោះ គេឃើញរថយន្តដឹកទំនិញមួយគ្រឿង បានបើកបរយ៉ាងលឿន ក្នុងទិសដៅពីភ្នំពេញ ឆ្ពោះទៅកាន់ខេត្តព្រះសីហនុ។ លុះពេលរថយន្តបង្កបើកមកដល់ចំណុចកើតហេតុ ស្រាប់តែជ្រុលចង្កូតទៅបុករ៉ូឡូកិនថ្នល់ដែលកំពុងធ្វេីផ្លូវពេញទំហឹង ធ្វើឲ្យរថយន្តនោះក្រឡាប់ធ្លាក់ចេញពីផ្លូវ បណ្ដាលឲ្យអ្នកបើកបររថយន្ត និងកម្មកម្នាក់រងរបួស។
ក្រោយពេលកើតហេតុ សមត្ថកិច្ចបានចុះទៅពិនិត្យ និងបញ្ជូនអ្នករងរបួសទៅសង្រ្គោះ នៅក្នុងគ្លីនិកមិត្តភាពឃ្លាំងលើ។ ដោយឡែក រថយន្ត និងរ៉ូឡូកិនថ្នល់ ត្រូវសមត្ថកិច្ចយកទៅផ្ញើ នៅក្នុងមន្ទីរសាធារណការ និងដឹកជញ្ជូនខេត្ត រង់ចាំដោះស្រាយនាពេលក្រោយ៕
